Ke Fai pe ʻOua ʻe Fai ki he Niʻihi Kehé?
“KO E meʻa ʻoku ʻikai te ke loto ke fai kiate koé, ʻoua ʻe fai ia ki he niʻihi kehé.” Ko e lea fakaeʻulungāanga ko ení ʻoku taku ko e lea ia ʻa e faiako Siaina ʻiloa mo e filōsefa ko Konifusioó. ʻI he ʻahó ni, ko e taʻu nai ia ʻe 2,500 ki mui ai, ʻoku kei maʻu pē ʻe he tokolahi ʻa e tui ʻo pehē, ʻoku fai ʻe ha tokotaha ʻa hono fatongia fakaeʻulungāangá ʻi he fakaʻehiʻehi pē mei hono fai ha maumau ki he niʻihi kehé.
Ko e moʻoni, ko e lao fakaeʻulungāanga ko eni ʻa Konifusioó ʻoku ʻi ai hono ngaahi ʻaonga. Ko e Tohi Tapú, ʻi he tafaʻaki ʻe tahá, ʻokú ne fakahaaʻi ha toe tafaʻaki ʻe taha ʻo e tōʻonga mo e fengāueʻaki fakaetangatá. Tānaki atu ki he meʻa ʻe ui nai ko e angahala ʻi hono fai ʻo ha meʻa, ʻa ia, ko hono fai ha ngaahi hala ki hoto kaungā faʻahinga ʻo e tangatá, ʻoku lau ʻa e Tohi Tapú ʻo fekauʻaki mo e angahala ʻo e ʻikai ke fai ʻa e meʻa ʻoku totonú. Naʻe tohi ʻe he ākonga Kalisitiane ko Sēmisí: “Ko ia ʻoku ne ʻilo ha lelei ke fai ka ʻoku ʻikai fai, ko haʻána angahala ia.” (Semisi 4:17) ʻI he ʻikai ke fakahinohinoʻi pē ʻa e kau Kalisitiané ke ʻoua te nau fai ha meʻa kovi ki he niʻihi kehé, naʻe ʻomai ʻe Sīsū Kalaisi ʻa e akonaki ko ení: “ʻIlonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.”—Mātiu 7:12.
Naʻe muʻaki fakataumuʻa ʻe he ʻOtuá ke fefaiʻaki ʻe he faʻahinga ʻo e tangatá kotoa ʻia kinautolu ʻo hangē ko ia te nau saiʻia ke fai ange kia kinautolú. Naʻá ne fokotuʻu ʻa e faʻifaʻitakiʻanga lelei tahá ʻi hono fakahāhā ʻa e tokanga ki he lelei ʻa e niʻihi kehé ʻi he founga ʻo ʻene fakatupu ʻa e tangatá: “Pea naʻe fakatupu ʻe he ʻOtua ʻa e tangata ʻi he imisi oʻona, ʻio i he imisi ʻo e ʻOtua naʻa ne fakatupu ia; naʻa ne fakatupu ʻakinaua ko e tangata mo e fefine.” (Senesi 1:27) ʻOku ʻuhinga ení naʻe foaki anga-ʻofa ʻe he ʻOtuá ki he tangatá ha konisēnisi, ʻa ia ʻi he taimi ʻoku akoʻi totonu aí, te ne tataki kinautolu ke nau fefaiʻaki ʻa e founga ʻoku nau loto ke fai ange kia kinautolú.
ʻOku faingataʻaʻia ʻo ʻikai ha ʻamanaki mo ha tokoni ʻa e tokolahi he ʻahó ni ʻi he ngāue ʻa e kakai taʻefakakaukau mo siokita. ʻOku hā mahino, ko e meʻa ʻoku fiemaʻú ʻoku laka ia ʻi he ʻikai pē ke fai ʻa e meʻa ʻoku kovi mo fakatupu maumau ki he niʻihi kehé, ka ʻi hono kehé, ke fai ʻa e meʻa lelei mo ʻaonga kia kinautolu. Koeʻuhi ko e meʻá ni, ʻoku fai loto-lelei ai ʻe he Kau Fakamoʻoni ʻa Sihová ha ngāue pau ke tokoniʻi ʻa e niʻihi kehé ke nau ako fekauʻaki mo e ʻamanaki fakaofo ʻoku maʻu ʻi he Folofola ʻa e ʻOtuá. ʻI he taimi ʻoku nau ʻaʻahi ai ki honau ngaahi kaungāʻapí mo e ongoongo lelei mei he Tohi Tapú, ʻoku nau fai ia ʻi he laumālie ʻo e ʻofá, ʻi hono fai ki he niʻihi kehé ʻa e meʻa ʻoku nau loto ke fai ange kia kinautolú.