Ko e Pole ʻo Hono Akoʻi ʻo e Fānaú he ʻAho Ní
ʻI HE efiafi poʻulí, ʻoku teuteu ai ha tokotaha ʻoku ʻoʻona ha falekai ke tāpuni ʻa hono falekaí pea ʻalu ki ʻapi. ʻOku toki hū atu ai ha ongo fefine ʻe toko ua mo ha kiʻi leka ʻo ʻota ha meʻakai. ʻI heʻene mātuʻaki helaʻiá, ʻoku fakataueleʻi ai ʻa e tokotaha ʻoku ʻoʻona ʻa e falekaí ke ne tala ange kia kinautolu kuo tāpuni ʻa e falekaí, ka ʻokú ne fili pē ke tokangaʻi ʻenau fiemaʻú. Lolotonga ʻa e pō talanoa mo kai ʻa e ongo fefiné, ʻoku lele takai holo ʻa e kiʻi leká ʻi he falekaí, ʻo fakangangana ʻa e pisiketé ʻi he falikí pea laiki ʻaki hono vaʻé. ʻI he ʻikai taʻotaʻofi iá, ʻoku malimali pē ʻa e faʻē ia ʻa e kiʻi leká. ʻI he iku ʻo mavahe ʻa e kau kaí, ko e tokotaha ongosia ʻoku ʻoʻona ʻa e falekaí kuo pau ke ne hanga ʻo fakamaʻa ʻa e ʻulí.
Hangē ko ia ʻoku ngalingali ʻoku mou ʻiloʻí, ko e tuʻunga moʻoni ko eni ʻi he moʻuí ʻoku fakatātaaʻi ai ʻa e ngaahi fāmili lahi, ʻoku ʻikai lele lelei ai ʻa hono akoʻi ʻo e fānaú. ʻOku kehekehe ʻa e ngaahi ʻuhingá. ʻOku tukuange tavale ʻe he ngaahi mātuʻa ʻe niʻihi ʻenau fānaú ke nau fai pē ʻa e meʻa ʻoku nau loto ki aí, ʻo fakakaukau ko e fānaú ʻoku totonu ke ʻohake kinautolu ʻi ha ʻātakai tauʻatāina. Pe koeʻuhi ʻoku nau moʻui mātuʻaki femoʻuekina, ʻoku ʻikai nai ai ke vaheʻi ʻe he mātuʻá ʻa e taimi ke ʻoange ai ki heʻenau fānaú ha tokanga lelei mo e akoʻi ʻoku fiemaʻú. ʻOku ongoʻi ʻe he ngaahi mātuʻa ʻe niʻihi ko e ako ʻa ʻenau kiʻi tamá ʻa e meʻa mahuʻinga tahá, ko ia ʻoku nau ʻoange ai ki he kiʻi tamá ʻa e tauʻatāina meimei taʻefakangatangata, kehe pē ke ne maʻu ha tuʻunga lelei ʻi he akó pea hū ki ha kolisi ʻiloa.
Neongo ia, ʻoku pehē ʻe he niʻihi ko e ngaahi tuʻunga ʻa e ngaahi mātuʻá mo e sōsaietí fakalūkufua ʻoku fiemaʻu ke fakatonutonu. ʻOku nau fakaʻuhinga ʻoku hoko ʻa e fānaú ʻo kau ʻi he faihia kehekehe pea ko e fakamālohi ʻi he ʻapiakó ʻoku fakalalahi ia ʻi he ʻaho ki he ʻaho. Ko ia ai, ko ha pule ʻo ha akoʻanga lotoloto ʻi Seoul, Lepupilika Kōleá, naʻá ne fakamamafaʻi ko e akoʻi fakaeʻulungāangá ʻoku totonu ke muʻomuʻá. Naʻá ne pehē: “Hili hoʻo langa hake ha anga ʻoku leleí ʻoku hoko mai ai hono fakahūhū ʻo e ʻiló.”
Ko e ngaahi mātuʻa tokolahi ʻa ia ʻoku nau loto ke hū ʻenau kiʻi tamá ki he kolisí pea lavameʻa ʻi he moʻuí ʻoku nau fakaongotuli ki he ngaahi lea fakatokangá. Kapau ko ha mātuʻa koe, ko e faʻahinga tokotaha fēfē ʻokú ke loto ke hoko ki ai hoʻo kiʻi tamá? Ko ha tokotaha lahi fakataha mo ha ʻiloʻi ʻo e tuʻunga fakaeʻulungāangá mo e fatongiá? Ko ha taha ʻoku faifakaʻatuʻi ki he niʻihi kehé, ʻa ia ʻoku feʻunuʻaki ngofua, pea ʻokú ne maʻu ha laumālie fakatuʻamelie? Kapau ko ia, kātaki ʻo vakai ki he kupu hoko maí.