Founga ke Fekuki Ai mo e Loto-Siʻí
ʻOKÚ KE loto-siʻi? ʻI he kuonga ko eni ʻo e veiveiuá mo e fekeʻikeʻí, ʻoku pehē ʻa e kakai tokolahi. ʻOku loto-siʻi ʻa e niʻihi koeʻuhi ko ʻenau taʻemaʻungāué. ʻOku fekuki ʻa e niʻihi mo e haʻahaʻa ʻo ha fakatuʻutāmaki. Ko e niʻihi kehe foki ʻoku nau fāinga mo e ngaahi palopalema fakafāmili, ko ha puke lahi, pe ngaahi ongoʻi tuēnoa. Kapau ʻokú ke loto-siʻi, ko fē ʻe lava ke ke hanga ki ai ki ha tokoní? Kuo maʻu ʻe he laui miliona ʻi māmani lahi ʻa e fiemālie ʻi hono lau ʻa e Folofola ʻa e ʻOtuá, ko e Tohi Tapú. ʻOku fakafiemālieʻi kinautolu ʻe he ngaahi lea ʻa e ʻapositolo ko Paulá, ʻa ia naʻá ne pehē: “Fakafetai ki he Otua, moe Tamai a ho tau Eiki ko Jisu Kalaisi, koe Tamai ae gaahi aloofa, moe Otua oe fiemalie kotoabe; Aia oku ne fakafiemalieʻi akimautolu i he e mau mamahi kotoabe.” (2 Kolinito 1:3, 4, PM) Ko e hā ʻoku ʻikai ke lau ai eni mo e ngaahi kupu Fakatohitapu kehe ʻi hoʻo Tohi Tapú tonu? Ko hono fai iá ʻe ‘fakafiemalie ia ki ho lotó, bea fakatuu mau ai koe.’—2 Tesalonaika 2:17, PM.
Ko e tokoni ke fekuki ai mo e loto-siʻí ʻe toe lava ke maʻu ia fakafou ʻi he feohi mo e faʻahinga ʻoku nau tauhi kia Sihová. ʻOku pehē ʻe he Palovepi 12:25: “Ka hu ʻa e hohaʻa ki he loto ʻo ha tangata, ʻoku ne pelukiʻi ia: ka ʻoku fakafiefiaʻi ʻe ha lea lelei.” ʻI heʻetau maʻu ʻa e ngaahi fakataha faka-Kalisitiané, ʻoku tau fanongo ai ki he “lea lelei” ko iá, ʻa ia “ʻoku melie ki he loto, pea ko e faitoʻo ki hoto ngaahi hui.” (Palovepi 16:24) Ko e hā ʻoku ʻikai te ke maʻu ai ha fakataha ʻi ha Fale Fakatahaʻanga ʻo e Kau Fakamoʻoni ʻa Sihová ke ke hokosia tonu ai ʻa e ola fakaivimālohi ʻe lava ke hoko kia koe ʻi ha fakatahataha pehē?
ʻE toe lava ke ke maʻu ʻaonga mei he mālohi ʻo e lotú. Kapau ʻokú ke ongoʻi lōmekina ʻi he ngaahi loto-moʻua ʻo e moʻuí, vahevahe ʻa hoʻo ngaahi ongoʻi loloto tahá kiate ia ʻokú ne “ogoʻi ae lotu.” (Sāme 65:2, PM) Ko hotau Tokotaha-Fakatupú, ʻa Sihova ko e ʻOtuá, ʻokú ne mahinoʻi lelei ange kitautolu ʻi heʻetau mahinoʻi kitautolú. ʻE lava ke tau falala ki heʻene tokoní. ʻOku talaʻofa mai kia kitautolu ʻe heʻene Folofolá: “Li hoʻo kavenga kia Sihova, he te ne poupou koe ʻe ia: ʻe ʻikai te ne tuku ʻa e maʻoniʻoni ke ueʻia ʻo taʻengata.” (Sāme 55:22) ʻIo, “ko kinautolu oku tatali kia Jihova e fakafoou ho nau malohi.”—Aisea 40:31, PM.
Kuo ʻomai ʻe Sihova ko e ʻOtuá kia kitautolu ʻa e ngaahi tokonaki mālohi ʻa ia ʻe lava ke ne tokoniʻi kitautolu ke tau fekuki lavameʻa ai mo e loto-siʻí. Te ke ngāueʻaki ia?