‘ʻEke pe ko Hai ʻOku Tāú’
Ko Tāmasikusí ko ha kolo moʻumoʻua ia ʻi he ʻuluaki senituli ʻo Hotau Kuongá. ʻI hono takatakai ʻe he ngaahi ngoue fuaʻiʻakaú, naʻe hangē ia ha feituʻu moʻui ʻi he toafá ki he ngaahi fononga kāmeli ʻoku aʻu ki ai mei he ngaahi fonua ʻi he hahaké. ʻIkai fuoloa hili ʻa e pekia ʻa Sīsū Kalaisí, naʻe ʻi ai ha fakatahaʻanga Kalisitiane ʻi Tāmasikusi. Naʻe ʻi he lotolotonga ʻo hono kau mēmipá ʻa e kau Siu ʻa ia naʻa nau hoko nai ko e kau muimui ʻo Sīsū lolotonga ʻa e Kātoanga Penitekosi ʻi Selusalema ʻi he 33 T.S. (Ngāue 2:5, 41) Ko e kau ākonga ʻe niʻihi mei Siutea naʻa nau hiki nai ki Tāmasikusi ʻi he malanga hake ʻa e fakatangá hili hono tolomakaʻi ʻo Sitīvení.—Ngāue 8:1.
Ngalingali lolotonga ʻa e 34 T.S., ko ha Kalisitiane mei Tāmasikusi ko hono hingoá ko ʻAnanaia naʻá ne maʻu ai ha vāhenga-ngāue ngalikehe. Naʻe tala ange kiate ia ʻe he ʻEikí: “Tuu, o alu ki he hala oku ui koe Totonu, bea ke fehui i he fale o Jutasi kiate ia oku ui ko Saula, mei Tasusi: bea vakai, he oku lotu ia.”—Ngāue 9:11, PM.
Ko e hala naʻe ui ko Totonú naʻe kilomita nai ʻe 1.5 ʻa hono lōloá pea naʻe lele ia ʻi he loto-mālie ʻo Tāmasikusí. Mei he tā tongitongi heni ʻi he senituli hono 19, ʻoku lava ke tau fakaʻuta atu ai ki he fōtunga ʻo e halá ʻi he kuonga muʻá. ʻI he vakai atu ki hono natulá, naʻe pau nai kia ʻAnanaia ke ne kumi ʻi ha vahaʻa taimi ke maʻu ai ʻa e fale ʻo Siutasí. Kae kehe, naʻe ʻilo ia ʻe ʻAnanaia, pea ko ʻene ʻaʻahí naʻe iku ai ki he hoko ʻa Saula ko e ʻapositolo ko Paulá, ko ha tokotaha fanongonongo faivelenga ʻo e ongoongo leleí.—Ngāue 9:12-19.
Naʻe fekauʻi atu ʻe Sīsū ʻa ʻene kau ākongá pea tala ange kia kinautolu ke nau ‘ʻeke pe ko hai ha faʻahinga ʻoku tāu’ mo e ongoongo leleí. (Mātiu 10:11) Hangehangē naʻe kumi moʻoni ʻa ʻAnanaia kia Saulá. ʻI he hangē ko ʻAnanaiá, ʻoku kumi fiefia ʻa e Kau Fakamoʻoni ʻa Sihová ki he faʻahinga tāú pea ʻoku nau fiefia ʻi he taimi ʻoku tali ai ʻe he kakaí ʻa e ongoongo lelei ʻo e Puleʻangá. Ko hono maʻu kinautolú ʻoku ʻai ai ke tuha ʻa e feingá kotoa.—1 Kolinito 15:58.
[Fakatātā ʻi he peesi 32]
Ko e “hala oku ui koe Totonu” he ʻaho ní
[Maʻuʻanga ʻo e Tā ʻi he peesi 32]
From the book La Tierra Santa, Voliume II, 1830