ʻUhinga kia Kitautolu ʻa e Anga-Fakatōkilalo ʻa Sihová
KO Tēvitá ko ha tangata ia naʻá ne ʻiloʻi ʻa e faingataʻá. Naʻá ne tofanga ʻi hono ngaohikovia ʻi he nima ʻo Tuʻi Saulá, ʻa ʻene tamai-ʻi-he-fono meheká. Naʻe feinga tuʻo tolu ʻa Saula ke tāmateʻi ʻa Tēvita ʻaki ha tao pea naʻá ne tuli taʻetuku ia ʻi ha ngaahi taʻu, ʻo fakamālohiʻi ai ke ne hoko ko e tokotaha hola takai holo. (1 Samiuela 18:11; 19:10; 26:20) Neongo ia, naʻe fakamoʻoniʻi ʻa e kau ʻa Sihova mo Tēvitá. Naʻe fakahaofi ia ʻe Sihova ʻo ʻikai meia Saula pē kae pehē foki mei he ngaahi fili kehe. Ko ia ai, ʻe lava ke tau mahinoʻi ʻa e fakakaukau ʻa Tēvitá ʻi hono fakahaaʻi ʻi ha foʻi hiva: “Ko hoku moʻunga ʻa Sihova, mo e kolo kiate au; ko hoku haoʻanga foki—ʻio, oʻoku; . . . Pea kuo ke [Sihova] ʻomi kiate au ho pa fakamoʻui: pea ko hoʻo fakaalaala [pe anga-fakatōkilaló] kuo u hoko ai ʻo fuʻu lahi.” (2 Samiuela 22:2, 36) Naʻe lavaʻi ʻe Tēvita ha tuʻunga lahi ʻi ʻIsileli. Naʻe anga-fēfē leva ʻa e kau ki ai ʻa e anga-fakatōkilalo ʻa Sihová?
ʻI he taimi ʻoku lau ai ʻa e Tohi Tapú kia Sihova ʻokú ne anga-fakatōkilaló, ʻoku ʻikai ʻuhinga ia aí ʻokú ne fakangatangata ʻi ha faʻahinga founga pe ʻokú ne fakamoʻulaloa ki he niʻihi kehé. ʻI hono kehé, ko e ʻulungāanga fakaʻofoʻofa ko ení ʻoku fakahaaʻi ai ʻokú ne maʻu ʻa e manavaʻofa lahi ki he faʻahinga ʻo e tangatá ʻa ia ʻoku nau feinga loto-moʻoni ke maʻu ʻa ʻene hōifuá pea fakaaʻu ʻa ʻene mēsí kia kinautolu. ʻI he Sāme 113:6, 7, ʻoku tau lau ai: “[Ko Sihová] ʻoku ne afeitaulalo ke vakai ʻa e ngaahi meʻa ʻa langi mo mamani. ʻOku ne fokotuʻu mei he efu ʻa e lauvale.” Ko ʻene “afeitaulalo” ʻoku ʻuhingá ʻokú ne “punou hifo ke sio” pe “ʻokú ne fakatōkilaloʻi Ia ke sio.” (Today’s English Version; Young’s Literal Translation of the Holy Bible) Ko ia ko Sihova tonu mei hēvani naʻá ne ‘punou hifo,’ pe ‘fakatōkilaloʻi ia tonu,’ koeʻuhi ke ne tokanga kia Tēvita, ko ha tangata taʻehaohaoa kae anga-fakatōkilalo ʻa ia naʻá ne holi ke tauhi ki he ʻOtuá. Ko ia ai, ʻoku toe fakapapauʻi mai ʻe Tēvita kia kitautolu: “Ko e maʻolunga ʻa Sihova, ka ʻoku ne tokaʻi ʻa e maʻulalo [pe anga-fakatōkilaló].” (Sāme 138:6) Ko e founga mohu meesi, kātaki mo manavaʻofa naʻe feangainga ai ʻa Sihova mo Tēvitá ʻoku totonu ke ne fakalototoʻaʻi ʻa e faʻahinga kotoa ʻoku nau feinga ke fai ʻa e finangalo ʻo e ʻOtuá.
Neongo ko Sihova ʻi he tuʻunga ko e Haú ʻokú ne maʻu ʻa e tuʻunga hakeakiʻi lahi taha ʻi he ʻunivēsí, ʻokú ne loto-lelei ke feangainga mo kitautolu taki taha. ʻOku ʻomai ʻe he meʻá ni kia kitautolu ʻa e tuipau ʻe lava ke tau falala ki heʻene tokoni taʻematukutukú naʻa mo e ʻi he ngaahi tuʻunga faingataʻa tahá. ʻOku ʻikai ha ʻuhinga ke manavahē ai naʻá ne fakangaloʻi kitautolu. ʻI he fekauʻaki mo hono kakai ʻi ʻIsileli ʻo e kuonga muʻá, ʻoku totonu ʻa e lau fekauʻaki mo Sihova ko e tokotaha “naʻa ne manatua [kinautolu] ʻi [heʻenau] vaivai: he ʻoku tolonga ʻo taʻengata ʻene ʻaloʻofa.”—Sāme 136:23.
ʻI he tuʻunga ko e kau sevāniti ʻa Sihova ʻi he lolotonga ní, te tau tofanga nai ʻi he faingataʻa ʻo hangē ko ia naʻe hoko kia Tēvitá. Mahalo pē te tau fehangahangai mo e manuki mei he faʻahinga ʻoku ʻikai te nau ʻiloʻi ʻa e ʻOtuá, pe mahalo pē ʻoku tau fāinga mo e mahamahakí pe hokosia ʻa e mamahi he mate ʻa ha taha ʻofeina. Ko e hā pē hotau tuʻungá, kapau ʻoku totonu hotau lotó, ʻe lava ke tau fakaofiofi kia Sihova ʻi he lotu, ʻo kole ki heʻene mēsí. ʻE ‘punou hifo’ ʻa Sihova ke siofi kitautolu pe fanongo mai ki heʻetau ngaahi lotú. Naʻe tohi ʻe he tokotaha-tohi-saame fakamānavaʻí: “Ko e fofonga ʻo Sihova ʻoku lalama ki he kau maʻoniʻoni, pea ʻoku ne fakaongo ke maʻu ʻenau tangi.” (Sāme 34:15) ʻIkai ʻoku maongo ki ho lotó ke fakakaukauloto atu ki he ʻulungāanga ʻofeina ʻo Sihova ko e anga-fakatōkilaló?
[Fakatātā ʻi he peesi 30]
Hangē tofu pē ko ʻene fanongo ki he ngaahi lotu ʻa Tēvitá, ʻoku loto-lelei ʻa Sihova ke fanongo mai ki heʻetau ngaahi lotu ʻi he ʻaho ní