Ko ha Liliu “Lelei Anga-Kehe”
FAKATATAU ki ha fakafuofua ʻe taha, naʻe pulusi ʻa e ngaahi liliu faka-Pilitānia foʻou ʻo e Ngaahi Konga Tohi Tapu Faka-Kalisi Kalisitiane ʻoku aʻu hono lahí ki he 55 ʻi he vahaʻa ʻo e 1952 mo e 1990. Ko e ngaahi fili ʻa e kau liliú ʻi heʻenau fai ʻa e liliú ʻoku ʻuhinga iá ʻe ʻikai ke fakalea tatau ai ha ongo liliu ʻe ua. Koeʻuhi ke fakapapauʻi ʻa e alafalalaʻanga ʻo e ngāue ʻa e kau liliú, ko Jason BeDuhn, ʻa e palōfesa maʻu mataʻitohi ʻo e ngaahi fakatotolo fakalotú ʻi he ʻUnivēsiti Tokelau ʻo ʻAlisoná, ʻi Flagstaff, ʻAlisona, U.S.A., naʻá ne sivisiviʻi pea fakahoa ki he tuʻunga tonu matemateé ʻa e ngaahi liliu lalahi ʻe valu, ʻo kau ai ʻa e New World Translation of the Holy Scriptures, ʻoku pulusi ʻe he Kau Fakamoʻoni ʻa Sihová. Ko e hā ʻa e olá?
Neongo naʻe ʻikai te ne loto-tatau mo e niʻihi ʻo e ngaahi fili fakaeliliú, naʻe ui ʻe BeDuhn ʻa e New World Translation ko ha liliu “lelei anga-kehe,” “ʻoku lelei mamaʻo ange” pea “faʻa lelei ange” ʻi he niʻihi ʻo e ngaahi liliu naʻe vakaiʻí. ʻI he fakalūkufuá, ko e fakamulituku ia ʻa BeDuhn, ko e New World Translation “a e taha ʻo e ngaahi liliu tonu matematē taha ʻo e ngaahi liliu faka-Pilitānia ʻo e Fuakava Foʻoú ʻoku ala maʻu lolotongá” pea “ko e tonu matematē taha ia ʻi he ngaahi liliu kuo fakafehoanakí.”—Truth in Translation: Accuracy and Bias in English Translations of the New Testament.
Naʻe fakahaaʻi foki ʻe BeDuhn, naʻe fakamoʻulaloa ʻa e kau liliu tokolahi ki he tenge “ke toe fakalea pe fakalahi ʻa e meʻa ʻoku leaʻaki ʻe he Tohi Tapú koeʻuhi ke fakalato ʻa e meʻa ʻoku loto mo fiemaʻu ʻe he kau lautohi fakaeonopōní ke leaʻakí.” ʻI he tafaʻaki ʻe tahá, ʻoku kehe ʻa e New World Translation ia, ko e fakamatala ia ʻa BeDuhn, koeʻuhi “ko e tonu matematē lahi ange ʻa e NW ʻi he tuʻunga ko ha liliu totonu mo tokanga ʻo e muʻaki ngaahi kupuʻi lea ʻa e kau hiki ʻo e Fuakava Foʻoú.”
Hangē ko ia ʻoku fakahaaʻi ʻe he Kōmiti Liliu Tohi Tapu New World ʻi he talateu ki heʻene tohí, ko “ha meʻa mātuʻaki falalaʻanga ia” ke liliu ʻa e Tohi Tapu Māʻoniʻoní mei honau muʻaki ngaahi leá ki he lea fakaeonopōní. ʻOku hoko atu ʻa e Kōmití ʻo pehē: “Ko e kau liliu ʻo e tohí ni, ʻa ia ʻoku nau manavahē mo ʻofa ki he Faʻu-Tohi Fakaʻotua ʻo e Tohi Tapu Māʻoniʻoní, ʻoku nau ongoʻi ha fatongia makehe kiate Ia ke ʻoatu ʻa ʻene ngaahi fakakaukaú mo ʻene ngaahi fanongonongó ʻi he tonu matematē taha ʻe ala lavá.”
Talu mei hono ʻuluaki pulusi ʻi he 1961, kuo ʻai ke ala maʻu ai ʻa e New World Translation of the Holy Scriptures ʻi he lea ʻe 32 ʻo tānaki atu ki ai ʻa e pulusinga ʻe ua ʻi he founga ki he kau kuí. Ko e Ngaahi Konga Tohi Tapu Faka-Kalisi Kalisitiane ʻa e New World Translation, pe ko e “Fuakava Foʻoú,” ʻoku ala maʻu ia ʻi he lea lahi ange ʻe 18 tānaki atu ki ai ʻa e pulusinga ʻe taha ʻi he founga ki he kau kuí. ʻOku mau fakaafeʻi atu koe ke ke lau ʻa e Folofola ʻa e ʻOtuá ʻi he liliu fakaeonopooni “lelei anga-kehe” ko ení, ʻa ia ʻoku ala maʻu nai ʻi hoʻo leá tonu.