Houa Kaí—Meʻa Lahi Ange Ia ʻi ha Taimi Kai Pē!

ʻOKU fiefia ʻa e tokotaha kotoa ʻi ha kai lelei. Tānaki atu ki he kaí ha fepōtalanoaʻaki lelei mo ha feohi māfana mo e kakai ʻokú ke ʻofa aí, pea ʻe hoko ia ko ha taimi fakafiefia ʻa ia ʻokú ne fakalato ʻa e meʻa lahi ange ia ʻi heʻetau fiekaiá pē. ʻOku tokolahi ʻa e ngaahi fāmili ʻoku nau tōʻongaʻaki ke fakatahataha ʻo ʻikai siʻi hifo he tuʻo taha he ʻahó ke maʻu meʻatokoni. Ko e houa kaí ʻoku ʻoange ai ki ha fāmili ha faingamālie ke lāulea ki he ngaahi meʻa pe ngaahi palani ʻo e ʻahó. Ko e ngaahi mātuʻa ʻoku nau fanongo ki he ngaahi fakamatala mo e talanoa ʻa ʻenau fānaú ʻoku nau maʻu ai ha fakaataata ki he fakakaukau mo e ngaahi ongoʻi ʻa ʻenau fānaú. ʻI he faai atu e taimí, ko e feohi fakaivifoʻou fakafiefia naʻe maʻu ʻi he houa kaí ʻokú ne langa hake ʻi ha fāmili ha ongoʻi ʻo e malu, falala mo e ʻofa, ʻa ia ʻokú ne tānaki atu ki he fokotuʻutuʻu fakafāmilí ʻa e tuʻumaʻu.

ʻI he ʻahó ni, koeʻuhi ko e tokolahi ʻa e ngaahi mēmipa ʻo e fāmilí ʻoku nau moʻua pea femoʻuekina maʻu peé, ʻoku nau ʻiloʻi ʻoku faingataʻa ke fakatahataha ki ha kai. ʻI he ngaahi feituʻu ʻe niʻihi ʻo e māmaní, ʻoku ʻikai tali ai ʻe he anga fakafonuá ke kai fakataha ha fāmili pe naʻa mo e talanoa ʻi he lolotonga ʻa e houa kaí. Ko e ngaahi fāmili kehé ia ʻoku nau angaʻaki ʻa e fakamoʻui ʻa e TV lolotonga ʻa e kaí, ʻo toʻo atu ai ha faingamālie pē ki ha fetalanoaʻaki mohu ʻuhinga.

Kae kehe, ko e ngaahi mātuʻa Kalisitiané ʻoku nau ʻāʻā maʻu pē ki ha ngaahi faingamālie ke langa hake ai ʻa honau ngaahi fāmilí. (Palovepi 24:27) ʻI he taimi fuoloá, naʻe tala ai ki he ngaahi mātuʻá ko e taha ʻo e ngaahi faingamālie lelei taha ke fakahaaʻi ai ʻa e folofola ʻa e ʻOtuá ki heʻenau fānaú ko ‘ʻenau nofo ʻi honau falé.’ (Teutalonome 6:7) Ko e tangutu fakataha maʻu pē ki ha houa kaí ʻoku ʻoange ai ki he ngaahi mātuʻá ha faingamālie makehe ke fakahūhū ki heʻenau fānaú ha ʻofa loloto kia Sihova pea mo ʻene ngaahi tefitoʻi moʻoni māʻoniʻoní. ʻI hono fakatupulekina ha ʻatimosifia fakafiefia mo fakafiemālié, ʻe lava ke ke ʻai ai ʻa e houa kaí ko ha hokosia fakafiefia mo fakatupu langa hake foki ia ki ho fāmilí. ʻIo, ʻai ʻa e houa kaí ko ha meʻa lahi ange ia ʻi ha taimi kai pē!