Faitau ʻAki ʻa e Ngaahi Leá—Ko e Hā ʻOku Fakamamahi Aí?
“Oku mei fē ʻa e ngaahi tau, pea mei fe ʻa e ngaahi fetuʻusi ʻoku ʻiate kimoutolu?”—SEMISI 4:1.
NAʻE ʻikai fakahanga ʻe he tokotaha-tohi Tohi Tapu ko Sēmisí ʻa e foʻi fehuʻi ko ení ki he kau sōtia ʻo e ngaahi kongakau Lomá, ʻa ia naʻa nau fakahoko ʻa e ngaahi tau ʻo e ikuna ʻi he taimi ko iá; pea naʻe ʻikai te ne fakatotoloʻi ʻa e ngaahi fakaueʻiloto naʻe ʻi mui ʻi he faitau fakaetautoitoi ʻa e kau Sicarii Siú, pe ko e Kau Tangata Toʻo Hele Tui ʻo e ʻuluaki senituli T.S. Naʻe ʻi he fakakaukau ʻa Sēmisí ʻa e ngaahi fakakikihi ʻa ia naʻe kau ki ai ʻo aʻu ki he tokosiʻi ko ha ongo meʻa ʻe toko ua. Ko e hā hono ʻuhingá? Koeʻuhi ʻi he hangē ko e ngaahi taú, ʻoku fakatupu ʻauha ʻa e ngaahi feingatau fakafoʻituituí. Fakatokangaʻi ange ʻa e ngaahi fakamatala Fakatohitapu ko ení.
Ko e ngaahi foha ʻo e pēteliake ko Sēkopé naʻa nau fehiʻa lahi ʻi honau tehina ko Siosifá ʻo nau fakatau atu ai ia ko ha pōpula. (Senesi 37:4-28) Ki mui ai, naʻe feinga ʻa Tuʻi Saula ʻo ʻIsilelí ke ne tāmateʻi ʻa Tēvita. Ko e hā hono ʻuhingá? Koeʻuhi naʻá ne meheka kia Tēvita. (1 Samiuela 18:7-11; 23:14, 15) ʻI he ʻuluaki senitulí, naʻe fakahohaʻasi ai ʻe ha ongo fefine Kalisitiane ko ʻIuotia mo Siniteke ʻa e melino ʻa ha fakatahaʻanga fakakātoa ʻi heʻena fakakikihí.—Filipai 4:2.
ʻI he ngaahi taimi ki muí ni ange maí, naʻe fakaleleiʻi ai ʻe ha ongo tangata ʻena ngaahi faikehekehé ʻi he ngaahi fepōlepolei, ʻo na fepaki ʻaki ʻa e ongo heletā pe ko e ongo pekenene. Naʻe faʻa hoko ʻo mate ai ʻa e taha ʻi he ongo fepōlepoleí pe hoko ʻo konga tangata ʻi he kotoa ʻo ʻene moʻuí. ʻI he ʻahó ni, ko e faʻahinga ʻoku nau fepōlepoleí ʻoku nau faʻa ngāueʻaki ʻa e meʻatau ko e ngaahi lea fefeka mo fakalotomamahi. Neongo ʻoku ʻikai nai ke lilingi ai ha toto, ʻoku maumauʻi ʻe he ngaahi ʻohofi fakaeleá ʻa e ongoʻí mo e ngaahi ongoongó. ʻOku faʻa faingataʻaʻia ʻa e faʻahinga tonuhiá ʻi he “ngaahi tau” ko ení.
Fakakaukau atu ki he meʻa naʻe hoko ʻi he ngaahi taʻu kuo maliu atú ʻi he taimi naʻe tukuakiʻi ai ʻe ha pātele ʻIngilani ha pātele ʻe taha ki hono ngāuehalaʻaki ʻa e paʻanga ʻa e siasí. Naʻe hoko ʻo ʻiloa ʻa ʻena keé pea naʻe mavaeua ʻa e fakatahaʻanga naʻá na ngāue aí ki ha ongo faʻahi. Naʻe fakafisi ʻa e kau mēmipa ʻe niʻihi ke maʻu ʻa e ngaahi ouau fakalotú kapau naʻe tokangaʻi ʻe he faifekau naʻa nau fakafepakiʻí. Naʻe fuʻu lahi ʻa e fetāufehiʻaʻaki ʻa e kau lotú ʻo nau fefakalongolongoʻaki ʻi he taimi naʻa nau ʻi he fale lotú ai ki he lotú. ʻI he taimi naʻe tukuakiʻi ai ʻa e pātele fai tukuakiʻí tonu ki he ʻulungāanga taʻetaau fakafehokotaki fakasinó naʻe toe ʻāsili ai ʻa e fakakikihí.
Naʻe kōlenga ʻa e Pīsope-Pule ʻo Canterbury ki he ongo pātelé, ʻi hono ui ʻena fepakí ko “ha kanisā” mo “ha fakaongoongokoviʻi fakamā ʻa e huafa ʻo Hotau ʻEikí.” ʻI he 1997 naʻe loto ai ʻa e taha ʻo e ongo pātelé ke ne mālōlō. Ko e tokotaha ʻe tahá naʻá ne piki ki hono lakangá kae ʻoua kuo aʻu ki he taimi kuo pau ke ne toki mavahe ai koeʻuhi ko ʻene aʻu ki he taʻumotuʻa pau ki he mālōloó. Kae kehe, naʻá ne hoko atu pē ʻo aʻu ki he toki hoko ʻa e mōmeniti fakaʻosí, ʻo ne mālōlō ʻi hono taʻu 70, ʻi he ʻaho 7 ʻo ʻAokosi, 2001. Naʻe lave ʻa e Church of England Newspaper ʻo pehē ko e ʻaho naʻá ne mālōlō aí ko e ʻaho kātoanga ʻo “Sangato” Vikitilisiasi. Ko hai ʻa “Sangato” Vikitilisiasi? Ko ha pīsope ia ʻi he senituli hono faá ʻa ia naʻe līpooti ʻo pehē naʻe haha koeʻuhi naʻá ne fakafisi ke faitau ʻi ha kau tau. ʻI hono fakahaaʻi ʻa e faikehekehe ʻi he fakakaukaú, naʻe pehē ʻe he pepá: “Ko e fakafisi ke tau ʻi ha tau fakasiasí naʻe ʻikai ko ha ʻulungāanga ia [ʻo e pātele mālōloó].”
Ko e ongo pātele ko iá naʻe mei lava ke na kalofi ʻa e fakatupu maumau kia kinaua tonu mo e niʻihi kehé kapau naʻá na ngāueʻaki ʻa e akonaki ʻi he Loma 12:17, 18: “ʻOua te mou totongi ʻene kovi ʻaki ʻa e kovi. Mou tomuʻa fakakaukauʻi hoʻomou ngaahi meʻa ke ha lelei ki he kakai fulipe. Mou nofo melino pe mo e kakai kotoa pe, ʻo kapau ʻe ala lava.”
Fēfē koe? Kapau ʻoku fakaʻitaʻi koe ʻe ha taha, ʻoku fakaʻaiʻai koe ʻe he tāufehiʻá ki ha faitau fakaelea? Pe ʻokú ke fakaʻehiʻehi mei he ngaahi lea fefeká pea hanganaki fakamelino ai pē? Kapau ʻokú ke fakaʻitaʻi ha taha, ʻokú ke fakaʻehiʻehi mei he tokotaha ko iá pea ʻamanaki ʻe ʻufiʻufi ʻe he taimí mo ha manatu nounou ʻa e palopalemá? Pe ʻoku ueʻi koe ke ke kole fakamolemole? Pe ʻokú ke kole fakamolemole pe fakaaʻu ia ki ha tokotaha ʻe taha, ko e feinga ke fakamelinó ʻe tokoni ia ki hoʻo leleí. ʻE lava ke tokoniʻi kitautolu ʻe he akonaki Fakatohitapú ke fakaleleiʻi naʻa mo e ngaahi fepaki fuoloá, hangē ko ia ʻoku fakahaaʻi ʻi he kupu hoko maí.