ʻUlungāanga Leleí ‘ʻOku Fakaogolelei Ai ae Akonaki oe Otuá’
KO KIʻI Maria ʻi Kransnoyarsk, Lūsiá, ʻokú ne leʻo-lelei ʻo hanga ai ʻe heʻene faiakó ʻo ʻai ia ke kau ʻi he kau hiva ʻa e ʻapiakó. Taimi nounou mei ai, naʻe fakaofiofi atu ai ʻa Maria ʻi he anga-fakaʻapaʻapa ki he taha ʻo ʻene kau faiakó ke fakamatalaʻi heʻikai lava ke ne hivaʻi ʻa e ngaahi foʻi hiva pau. Ko e hā hono ʻuhingá? Koeʻuhí ko e hiva ʻi he ngaahi hiva ʻoku ʻuhinga fakalotú ʻoku fepaki ia mo ʻene ngaahi tui makatuʻunga Fakatohitapú. ʻI heʻene ʻohovalé, naʻe fifili ai ʻa e faiakó, ‘Ko e hā hano maumau ʻo hono fakahīkihikiʻi ʻa e ʻOtuá fakafou ʻi he hivá?’
Ke fakahaaʻi ʻa e ʻuhinga te ne fakaʻehiʻehi ai ke hivaʻi ha foʻi hiva fekauʻaki mo ha ʻOtua ko e Tolu-Tahaʻi-ʻOtuá, naʻe fakaava ʻe Maria ʻene Tohi Tapú peá ne fakamatalaʻi ko e ʻOtuá mo Sīsū Kalaisi ʻoku ʻikai ko ha ʻOtua pē ʻe taha, pea ko e laumālie māʻoniʻoní ko e ivi ngāue ia ʻo e ʻOtuá. (Mātiu 26:39; Sione 14:28; Ngāue 4:31) ʻOku fakamatala ʻe Maria: “Ko hoku vahaʻangatae mo ʻeku faiakó naʻe ʻikai ke uesia. ʻI hono fakalūkufuá, ʻoku mau maʻu ha kau faiako lelei ʻaupito ʻi homau ʻapiakó. ʻOku nau fiemaʻu ke mau faitotonu.”
ʻI he kotoa ʻo e taʻu fakaakó, ko e tuʻu-ʻatā ʻa Maria naʻá ne maʻu ai ʻa e tokaʻi ʻa e kau faiakó ʻo tatau pē mo e kaungāakó. ʻOku pehē ʻe Maria: “Ko e ngaahi tefitoʻi moʻoni ʻa e Tohi Tapú ʻoku nau tokoniʻi au ʻi heʻeku moʻuí. ʻI he ngataʻanga ʻo e taʻu fakaakó, naʻá ku maʻu ai ha pale ki he faitotonú mo e māú, lolotonga ia naʻe maʻu ʻe heʻeku ongo mātuʻá ha tohi fakamālō fakaʻofisiale mei he ʻapiakó ki hono ʻohake lelei ʻo hona ʻofefiné.”
Naʻe papitaiso ʻa Maria ʻi ʻAokosi 18, 2001. ʻOkú ne pehē: “ʻOku ou fiefia ʻi he lava ke u tauhi ki ha faʻahinga ʻOtua fisifisimuʻa pehē hangē ko Sihová!” Ko e Kau Fakamoʻoni kei siʻi ʻa Sihova ʻi māmani lahí ʻoku nau fakahoko ʻa e ngaahi lea ʻo e Taitusi 2:10 (PM), ʻa ia ʻoku tau lau ai: “Fakaogolelei ae akonaki oe Otua, ko ho tau Fakamoui, i he mea kotoabe.”
[Fakatātā ʻi he peesi 32]
Tohi ʻo e houngaʻia mo e tohi fakaongoongolelei
[Fakatātā ʻi he peesi 32]
Ko Maria mo ʻene ongo mātuʻá hili hono papitaiso iá