Fakamoʻoni ha “Pimi” ki he Moʻoni Fakahisitōlia ʻa e Tohi Tapú
KO E foʻi lea “pimi” ʻoku ʻasi tuʻo taha pē ia ʻi he Tohi Tapú. ʻI he ngaahi ʻaho ʻo Tuʻi Saulá, naʻe pau ai ke ʻave ʻe he kau ʻIsilelí ʻenau ngaahi meʻangāue mētalé ke fakamata ʻe he kau tuki ukamea Filisitiá. “Naʻe fakamoʻoniʻi ko e totongi ki he fakamatá ko ha pimi ki he ngaahi mataʻi palaú pe ki he ngaahi huo kelí pea ki he ngaahi meʻangāue mata-tolú pea ki he ngaahi tokí pea ki hono ngaohi fakavave ʻa e tao fakateka pulú,” ko e fakamatala ia ʻa e Tohi Tapú.—1 Samiuela 13:21, NW.
Ko e hā ʻa e pimi? Ko e tali ki he fehuʻi ko iá naʻe kei misiteli ia ʻo aʻu mai ki he 1907 T.S. ʻi he taimi naʻe keli hake ai ʻa e ʻuluaki maka-fua pimí ʻi he kolo motuʻa ko Kēselí. Ko e kau liliu Tohi Tapu ʻo e ngaahi taimi ki muʻá naʻa nau faingataʻaʻia ʻi hono liliu ʻo e foʻi lea “pimi.” Ko e fakatātaá, naʻe liliu ʻe he Paaki Motuʻa ʻa e 1 Samiuela 13:21: “Ka naa nau maʻu ae kili fakamata ki he huo keli, bea ki he hele, moe gaahi huhu, bea moe gaahi toki, bea ke fakamata ae mea kini.”
ʻOku ʻiloʻi ʻe he kau mataotao he ʻaho ní ko e pimí ko ha mamafa ia ʻi he meʻafuá ʻoku fakaʻavalisi ki he kalami ʻe 7.82, pe fakafuofua ko ha vahe tolu ʻe ua ʻo ha sikeli, ʻa e ʻiuniti ʻo e fua mamafa tefito faka-Hepeluú. Ko ha fua pimi ʻo e kongokonga silivá ʻa e totongi naʻe hilifaki ʻe he kau Filisitiá ki he kau ʻIsilelí ki hono fakamata ʻenau ngaahi meʻangāué. Ko e founga fua sikelí naʻe ʻikai toe ngāueʻaki ia ʻi he tō ʻa e puleʻanga Siutá mo hono kolomuʻá, ʻa Selusalema, ʻi he 607 K.M. Ko ia, ʻoku anga-fēfē ʻa e fakamoʻoni ʻa e fua pimí ki he moʻoni fakahisitōlia ʻa e konga tohi faka-Hepeluú?
ʻOku taukaveʻi ʻe he kau mataotao ʻe niʻihi ʻo pehē ko e ngaahi konga tohi ʻo e Tohi Tapu Faka-Hepeluú, kau ai ʻa e tohi ʻUluaki Samiuelá, ko hono taimí ko e kuonga Kalisi-Lomá, naʻa mo e aʻu hono fuoloá ʻo lau mei he senituli hono uá ki he ʻuluaki K.M. Ko ia ai, ʻoku taukaveʻi ʻo pehē “ʻoku nau . . . ‘taʻefakahisitōlia,’ ʻo siʻisiʻi pe ʻikai hano mahuʻinga ki hono toe fokotuʻu ha ‘ʻIsileli fakatohitapu’ pe ha ‘ʻIsileli motuʻa,’ ʻa ia ko kinaua fakatouʻosi ko ha faʻu fakaetohi faka-Siu pē mo faka-Kalisitiane ʻi onopooni.”
Kae kehe, ʻi he lave ki he fua pimi naʻe fakahaaʻi ʻi he 1 Samiuela 13:21 (NW), ʻoku pehē ʻe William G. Dever, ko e palōfesa ʻo e ʻākeolosia mo e tupuʻanga fakamatakali ʻo e tangatá ʻi he Hahake Ofí: “ʻOku ʻikai lava ke pehē naʻe ‘ʻiloʻi’ [ia] ʻe he kau hiki-tohi naʻe moʻui ʻi he vahaʻa taimi Kalisi-Lomá ʻi he ngaahi senituli hili ʻa e mole atu pea ngalo ʻa e ngaahi fua ko ení. Ko hono moʻoní, ko e kiʻi konga tohi fakatohitapu ko ení . . . naʻe ʻikai mahinoʻi ia ka ʻi he toki aʻu mai ki he konga ki muʻa ʻo e senituli hono 20 T.S., ʻi hono ʻiloʻi ʻa e ʻuluaki ngaahi fakatātā fakaʻākeolosia moʻoní, ʻoku ʻasi ai ʻa e foʻi lea pîm ʻi he faka-Hepeluú.” ʻOku hoko atu ʻa e palōfesá: “Kapau ko e ngaahi talanoa fakatohitapú ko e ‘ngaahi faʻu fakaetohi’ kotoa ʻo e kuonga Kalisi-Lomá, naʻe anga-fēfē ʻa e hoko ʻa e talanoa tefito ko ení ʻo ʻi he Tohi Tapu Faka-Hepeluú? Ko e moʻoni, ʻe fakafepaki nai ha taha ʻo pehē ko e meʻa fekauʻaki mo e pîm ko ha ‘fakaikiiki pē ia.’ Ke fakapapauʻi; kae hangē ko ia ʻoku ʻiloʻi leleí, ‘ko e hisitōliá ʻoku ʻi he tuʻunga fakaikiiki.’”
[Fakatātā ʻi he peesi 29]
Ko ha meʻafua mamafa pimi ko ha vahe tolu ʻe ua nai ia ʻo ha sikeli