Fakalato ʻo ha Fiemaʻu ʻi Masitōnia

“LAKA mai ki Masitonia, ʻo tokoniʻi kimautolu.” (Ngāue 16:9) Ko e ngaahi lea ʻeni ʻa ha tangata naʻe hā ʻi ha vīsone ki he ʻapositolo ko Paulá ʻo fakahaaʻi kiate ia ʻa e fiemaʻu ke talaki ʻa e ongoongo lelei ʻo e Puleʻanga ʻo e ʻOtuá ʻi ha feituʻu ngāue foʻou, ʻi he ngaahi kolo ʻoku tuʻu he taimí ni ʻi Kalisi.

ʻI he puleʻanga lolotonga ʻo Masitōniá, ko e toko 1 pē ʻo e Kau Fakamoʻoni ʻa Sihová ki he toko 1,840 kotoa pē ʻo e kau nofo aí. ʻOku tokolahi ai ʻa e kakai kuo teʻeki ai ʻaupito ke nau fanongo ʻo fekauʻaki mo Sihova ko e ʻOtuá. ʻIo, ʻoku ʻi ai ha fiemaʻu fakavavevave ki he kakai ʻo e puleʻanga ko ení ke nau fanongo ki he pōpoaki ʻo e melinó.—Mātiu 24:14.

Kuo fakaava ʻe he ʻOtuá ʻa e hala naʻe tokoni ke fakalato ʻa e fiemaʻu ko iá. ʻI he ʻaho ʻe taha ʻi Nōvema 2003, ne maʻu ai ʻe he ʻōfisi Masitōnia ʻo e Kau Fakamoʻoni ʻa Sihova ʻi Skopje ha telefoni taʻeʻamanekina. Ko e telefoni ia mei he Senitā Masitōnia ki he Fāitaha Fakavahaʻapuleʻangá, ʻo fakaafeʻi ʻa e Kau Fakamoʻoní ke fokotuʻu ha palepale ʻo nau fakamatalaʻi ai ʻenau ngaahi tuí ʻi ha fea ʻaho tolu naʻe teu ke kamata ʻi Nōvema 20. He faingamālie maʻongoʻonga ē ke aʻu ai ki he laui afe ʻo e kakai kuo teʻeki ai ke nau fanongo ʻi he ongoongo lelei ʻo e Puleʻangá!

Naʻe ngāue tōtōivi ha kau ngāue pole ke teuteuʻi mo fokotuʻutuʻu ha fakaʻaliʻali ʻo e ngaahi tohi kehekehe ʻa e Kau Fakamoʻoni ʻa Sihová ʻi he lea faka-Masitōniá. Ko e tatau ʻe taha ʻo e ngaahi tohi ko ení naʻe fakaʻaliʻali koeʻuhí ke lava ai ʻa e kau ʻaʻahí ʻo ʻave ha ngaahi tatau kapau naʻa nau mahuʻingaʻia ai. Naʻe ʻoange ʻe he fakaʻaliʻalí ki he tokolahi ʻa e faingamālie ke maʻu taʻetotongi ai ʻa e vai fakalaumālie fakaivifoʻoú.—Fakahā 22:17.

Naʻe tautefito hono fiemaʻu ʻe he kau ʻaʻahí ʻa e ngaahi tohi ko ia naʻá ne laveʻi ʻenau moʻuí, hangē ko e Questions Young People Ask—Answers That Work mo e Fakapulipuli ʻo e Fāmili Fiefiá.a Ko e kakai ʻe toko 98 ai ne nau ʻoange honau tuʻasilá, ʻo kole ke ʻaʻahi ange kia kinautolu ʻa e Kau Fakamoʻoni ʻa Sihová. Ko e tokolahi ai ne nau fai ʻa e ngaahi fakamatala lelei fekauʻaki mo e ngāue lelei ʻa e Kau Fakamoʻoni ʻa Sihová pea mo e tuʻunga lelei ʻo e ngaahi tohí.

Naʻe haʻu ha siana ʻe taha ki he palepalé ʻokú ne lolotonga puke ʻa e nima ʻa ʻene kiʻi tamasiʻí. Naʻe ʻeke ʻe he tamaí pe naʻe ʻi ai ha tohi maʻá e fānaú. Naʻe fakaʻaliʻali ange kiate ia ʻe he Kau Fakamoʻoní ʻa e tohi Ko ʻEku Tohi ʻo e Ngaahi Talanoa Faka-Tohitapú.b Naʻá ne sio fakavave ki ai peá ne ʻeke fiefia pe ʻoku fiha hono totongí. ʻI heʻene fanongo ko ia ʻoku poupouʻi kakato ʻa e ngāue fakaeako ʻa e Kau Fakamoʻoni ʻa Sihová ʻaki ʻa e ngaahi tokoni loto-fiefoakí, naʻá ne toe fiefia lahi ange. (Mātiu 10:8) Naʻá ne fakahaaʻi ʻa e tohí ki hono fohá peá ne pehē ange: “He tohi lelei moʻoni! Te u lau atu e foʻi talanoa ʻe taha ʻi he ʻaho kotoa pē!”

Naʻe fakaofiofi atu ha palōfesa ʻo e filōsofiá ki he palepalé. Naʻá ne fuʻu mahuʻingaʻia ʻaupito ʻi he lotú ʻi he tuʻunga fakalūkufuá kae tautautefito ki he ngaahi tui ʻa e Kau Fakamoʻoni ʻa Sihová. ʻI heʻene sio ko ia ʻi he tohi Mankind’s Search for God,c naʻe pehē ʻe he palōfesá: “He ʻuhinga lelei moʻoni ko e fakamatala ʻoku fakahāʻí! Ko e founga tofu pē ia naʻá ku fakakaukau atu ʻoku totonu ke fakahaaʻi ʻaki ʻa e ngaahi meʻá.” Ki mui ai, naʻe haʻu ha kau ako mei heʻene ʻapiakó ki he palepalé pea nau kole ange pe ʻe lava ke nau maʻu haʻanau ngaahi tatau tonu ʻo e tohi ko ia naʻe maʻu ʻe he palōfesá. Naʻa nau fiemaʻu ke ako ʻa e tohi tatau. Naʻa nau tui te ne ngāueʻaki ʻa e fakamatalá ʻi he taimi te ne faiako ai ʻi heʻene ngaahi lēsoní.

Naʻe ʻoange ʻe he fakaʻaliʻalí ki he kakai ʻe niʻihi ʻa honau ʻuluaki faingamālie ke lau mo fanongo ai ki he ngaahi moʻoni Fakatohitapú. Naʻe omi ke sio ai ha kulupu ʻo ha kau taʻu hongofulu tupu naʻe tuli. Naʻe fai ʻe he taha ʻo e Kau Fakamoʻoní ha fetalanoaʻaki nounou mo kinautolu, fakataha mo e tokoni mei ha taʻahine naʻá ne fakamatalaʻi ia ʻi he lea fakaʻilongá. ʻI hono ngāueʻaki ʻa e ngaahi fakatātā mei he tohi Ko e Moʻungaʻi Tangata Lahi Taha Kuo Moʻui Maí,d naʻá ne fakamatalaʻi naʻe fakamoʻui ʻe Sīsū ʻa e kau mahakí, kau ai mo e kau tulí. Naʻa nau fiefia ke “ako” ʻa e talaʻofa ko ia ʻa e Tohi Tapú ʻe vavé ni ke hanga ʻe Sīsū ʻo fai ʻa e meʻa tatau ki he kakai ʻoku nau nofo ʻi he māmaní ʻi hotau ʻaho ní. Ko ha tokolahi ʻo kinautolu ne nau tali fiefia ʻa e ngaahi tohi makatuʻunga Fakatohitapú, pea naʻe fai ʻa e ngaahi fokotuʻutuʻu ki ha tokotaha Fakamoʻoni ʻokú ne ʻiloʻi ʻa e lea fakaʻilongá ke ʻaʻahi kia kinautolu.

Tuku kehe ʻa e faka-Masitōniá, naʻe toe ala maʻu ʻa e ngaahi tohí ʻi he faka-Pilitāniá, Toaké mo e ʻAlipēniá. Ko ha tangata ʻe taha naʻe ʻikai ke lea faka-Masitōnia naʻá ne kole ki ha ngaahi tohi ʻi he lea faka-Pilitāniá. Hili hono maʻu ʻa e ngaahi ʻīsiu ʻo e ongo makasini Taua Leʻo mo e ʻĀ Hake!, naʻá ne pehē ʻokú ne lea faka-Toake. ʻI he taimi naʻe fakahāhā ange ai ʻa e ngaahi tohí ʻi heʻene lea ʻaʻaná, naʻá ne fuʻu ʻohovale lahi ʻaupito! Naʻá ne ʻiloʻi ʻoku fiemaʻu ʻe he Kau Fakamoʻoni ʻa Sihová ke tokoniʻi ʻa e tokotaha kotoa.

He fakamoʻoni lelei moʻoni ē naʻe fakahoko ʻi he taimi ko iá, pea he fakalototoʻa moʻoni ‘ke sio ki he fuʻu kakai tokolahi ko ia ne nau fakahāhā ʻa e mahuʻingaʻia ʻi he moʻoni ʻo e Tohi Tapú! ʻIo, naʻe fakaava ʻe Sihova ʻa e hala ke fakamafola ai ʻa e ongoongo lelei ʻo e Puleʻangá ki he kakai tokolahi ange ʻi Masitōnia.

[Fakamatala ʻi lalo]

pPuha/Fakatātā ʻi he peesi 9]

KO HA FAKALAKALAKA MAHUʻINGA!

Naʻe hoko ha foʻi laka lahi ki muʻa ʻi Mē 17, 2003 ʻi he ngaahi feinga ko ia ke fakamafola ʻa e ongoongo lelei ʻo e Puleʻanga ʻo e ʻOtuá. Naʻe fakatapui ha ʻōfisi ʻo e Kau Fakamoʻoni ʻa Sihová ʻi Skopje. Naʻe hokohoko atu ʻa e ngāue langá ʻo fakalahi liunga fā ai ʻa e ngaahi falé ʻi hono tuʻunga ki muʻá.

ʻOku ʻi ai ʻa e ngaahi fale mavahevahe lalahi ʻe tolu ʻa ia ʻoku ʻi ai ʻa e ʻōfisi ʻokú ne tokangaʻi e ngāué mo e ʻōfisi liliú pea pehē foki ki he ngaahi nofoʻanga, ko ha peito mo e loki fō. Ko Guy Pierce, ko ha mēmipa ʻo e Kulupu Pule ʻa e Kau Fakamoʻoni ʻa Sihová, naʻe ʻi ai ʻo ne fakahoko ʻa e malanga fakatapuí. Ko e kau ʻaʻahi mei he ngaahi fonua kehekehe ʻe hongofulu ne nau kau ki he polokalama fakatapuí. Ne nau fiefia kotoa ke mamata ʻi he ngaahi fuʻu fale foʻou fakaʻofoʻofá.

[Mape ʻi he peesi 8, 9]

(Ki he konga tohi kuo fokotuʻú, sio ki he tohi)

PULUKĀLIA

MASITŌNIA

Skopje

ʻALIPĒNIA

KALISI

[Fakatātā ʻi he peesi 8]

Skopje, Masitōnia