ʻOkú Ke Langa ʻi he Tuʻunga Fē?

KO E tolonga ʻa ha fale ʻoku fakatuʻunga lahi ia ʻi he mālohi ʻo hono fakavaʻé pe tuʻungá. ʻOku ngāueʻaki ʻe he Tohi Tapú ʻi he taimi ʻe niʻihi ʻa e tefitoʻi moʻoni ko ení ʻi ha ʻuhinga fakaefakatātā.

Ko e fakatātaá, ko e palōfita ko ʻAiseá, ʻokú ne lave kia Sihova ko e ʻOtuá ko e tokotaha ʻokú ne “ai moe gaahi tuunga o mamani.” (Aisea 51:​13, PM) Ko e tuʻunga ko ení ʻokú ne fakafofongaʻi ʻa e ngaahi lao taʻealaliliu ʻa e ʻOtuá ʻa ia ʻokú ne puleʻi ʻa e ngaʻunu ʻa e māmaní mo ne pukepuke ia ʻi hono tuʻungá. (Sāme 104:5) ʻOku toe lea ʻa e Folofola ʻa e ʻOtuá, ko e Tohi Tapú, ʻo fekauʻaki mo e “gaahi tuuga” ʻa ia ʻoku fakatuʻunga ai ʻa e sōsaieti ʻo e tangatá. Ko e ngaahi meʻá ni ko e fakamaau totonu, lao mo e tuʻutuʻuni. ʻI heʻenau “auha,” pe fakavaivaiʻiʻaki ʻa e fakamaau taʻetotonú, fakameleʻí, mo e fakamālohí, ʻoku ʻi ai leva ha maumau ʻi he fokotuʻutuʻu maau ʻo e sōsaietí.—Sāme 11:​2-6, PM; Palovepi 29:4.

ʻOku toe ngāueʻaki ʻa e tefitoʻi moʻoni ko ení ʻi ha tuʻunga fakafoʻituitui. ʻI hono fakamulituku ʻa ʻene Malanga ʻiloa he Moʻungá, naʻe pehē ʻe Sīsū Kalaisi: “ʻIlonga ʻa ia ʻoku ne fanongo ki he ngāhi tala ni aʻaku, mo ne fai ki ai, te u fakatatau ia ki he tangata fakapotopoto, ʻa ia naʻa ne langa hono fale ki he maka: pea naʻe to ʻa e ʻuha, pea tafe mai ʻa e ngāhi vai, pea angi ʻa e ngāhi matangi, ʻo nau faʻafaʻaki ki he fale ko ia: ka naʻe ʻikai holo, he ne tuʻunga ki he maka. Ka ʻilonga ʻa ia ʻoku ne fanongo ki he ngāhi tala ni aʻaku, kae ʻikai fai ki ai, ʻe fakatatau ia ki he tangata vale, ʻa ia naʻa ne langa hono fale ki he ʻoneʻone: pea naʻe to ʻa e ʻuha, pea tafe mai ʻa e ngāhi vai, pea angi ʻa e ngāhi matangi, ʻo nau tuki ki he fale ko ia, pea holo ia: pea ko e holo ʻo e fale ko ia ko e holo lahi.”—Mātiu 7:​24-27.

ʻOkú ke langa hoʻo moʻuí ʻi he tuʻunga fē? ʻOku langa ʻi he ʻoneʻone ʻikai tuʻumaʻu ʻo e filōsofia fakaetangata taʻefakaʻotuá, ʻa ia ʻe iku ki he holofa ʻa hono faʻungá? Pe ʻokú ke langa ʻi he maka fefeka ʻo e talangofua ki he ngaahi lea ʻa Sīsū Kalaisí, ʻa ia te ne tokoniʻi ai koe ke ke hao moʻui ʻi he ngaahi matangi mālohi fakaefakatātā ʻo e moʻuí?