Fuʻu ʻAkau Taʻu Foʻoú—Ko ha Fakaʻilonga Faka-Lūsia? Ko ha Fakaʻilonga Faka-Kalisitiane?

“ʻI HE kamataʻanga ʻo e 1830 tupú, naʻe kei lave pē ai ki he ʻakau lanu mata maʻu peé ko ha ‘foʻi fakakaukau faka-Siamane manakoa.’ ʻI he ngataʻanga ʻo e hongofuluʻi taʻu ko iá, naʻe ‘hoko ia ko ha anga fakafonua’ ʻi he ngaahi ʻapi ʻo e kau māʻolunga ʻi St. Petersburg. . . . Ko e ngaahi ʻapi pē ʻo e haʻa faifekaú pea mo e fanga kiʻi fale ʻo e kakai māʻulaló naʻe ʻikai ke ʻi ai ʻa e tōʻonga ʻo hono fokotuʻu ʻo ha fuʻu ʻakau lanu mata maʻu peé ʻi he senituli hono 19. . . .

“Ki muʻa aí, ko e fuʻu ʻakaú . . . naʻe ʻikai ke fai ha leleiʻia tefito ai. Ko e vakai ki ai ko ha fakaʻilonga ʻo e maté mo ʻene fehokotaki mo ‘pulotú’ fakatatau ki he talatukufakaholo faka-Lūsiá, pea pehē ki he talatukufakaholo ʻo hono fokotuʻu ʻo e fuʻu ʻakaú ʻi he ngaahi ʻato ʻo e ngaahi fale tali fonongá, naʻe ʻikai fehoanaki ia mo e ngaahi liliu ʻi he fakakaukaú naʻe hoko ʻi he vaeuaʻanga ʻo e senituli hono 19. . . . ʻOku mahinoʻi kakato ʻi he hoko ko ia ʻo talí, ʻe maʻu ai ʻe he talatukufakaholo mulí ʻa e ʻuhinga tatau ʻa ia naʻe taku ki he fuʻu ʻakau Kilisimasi ʻi he Hihifó, ʻa ʻene fehokotaki ki he tuʻunga-lea Kilisimasí. . . .

“Ko e founga ʻo hono ʻai ʻa e fuʻu ʻakaú ko e fakaʻilonga faka-Kalisitiané naʻe ʻikai ke faingofua ia ʻi Lūsia. Naʻe fetaulaki ia mo e fakafepaki mei he Siasi ʻOfotokisií. Naʻe mamata ʻa e haʻa faifekaú ʻi he kātoanga foʻoú ki he ‘tōʻonga fakatēmenioó,’ ko ha talatukufakaholo fakapangani, ʻa ia naʻe ʻikai haʻane kaunga ʻaʻana ki he ʻaloʻi ʻo e Fakamoʻuí, pea ʻikai ko ia pē, ko ha talatukufakaholo ia mei he Hihifó.”​—Palōfesa Yelena V. Dushechkina, toketā ʻo e ngaahi saienisi fakaeleá ʻi he ʻUnivēsiti Fakapuleʻanga St. Petersburg.

[Maʻuʻanga ʻo e Tā ʻi he peesi 32]

Faitā: Nikolai Rakhmanov