“Muʻaki Ngaahi Lave ʻIloa ki he Ngaahi Konga Tohi Fakatohitapú”
ʻI HE taʻu ʻe 25 kuo maliu atú, naʻe ʻiloʻi ai ʻe he kau ʻākeolosia ʻIsilelí ha meʻa fakaofo. ʻI ha ʻana fonualoto ʻi he ngaahi tahifo ʻo e Teleʻa Hīnomí ʻi Selusalema, naʻa nau maʻu ai ha ongo takainga tohi siliva iiki ʻoku hiki ai ha ngaahi konga tohi Fakatohitapu. Ko e lau ʻaho ʻo e ongo takainga tohí ʻoku foki ia ki he taimi ki muʻa ʻi hono fakaʻauha ʻe he kau Pāpiloné ʻa Selusalema ʻi he 607 K.M. Naʻe hiki ʻi he ongo konga tohí ʻa e konga ʻo e ngaahi tāpuaki ʻoku lēkooti ʻi he Nomipa 6:24-26. Ko e huafa fakafoʻituitui ʻo e ʻOtuá, ʻa e Sihová, naʻe hā tuʻo lahi ia ʻi he ongo takainga tohí fakatouʻosi. Ko e ngaahi mataʻi-tā tongitongí “ko e muʻaki ngāue fakameaʻa ia kuo ʻiloa mei he māmani motuʻá ʻoku lēkooti ai ʻa e ngaahi kupu mei he Tohi Tapu Hepeluú.”
Kae kehe, kuo fehuʻia ʻe he kau mataotao ʻe niʻihi ʻa e taimí pea nau fakakikihiʻi ko e ongo takainga tohí naʻe hiki ia ʻi he senituli hono ua K.M. Ko e ʻuhinga ʻe taha ki he taʻefelotoi ko ení ko e tuʻunga ʻo e ʻū muʻaki ngaahi tā ʻo e ongo takainga tohi mātuʻaki iiki ko ení naʻe ʻikai fakaʻatā ai ki ha sivisiviʻi ofi feʻunga ʻo e ngaahi fakaikiikí. Ke solova ʻa e palopalema ʻi he lau ʻahó, naʻe kamata ai ʻe ha timi ʻo e kau mataotaó ha fakatotolo foʻou. Naʻa nau ngāueʻaki ʻa e tekinolosia fakafaitā mo e hiki ʻīmisi komipiuta fakamuimui tahá ke ne ʻomai ʻa e ngaahi ʻīmisi māʻalaʻala fakaʻilekitulōnika taha ʻo e ongo takainga tohí. Ko e ngaahi ola ʻo e ngaahi ʻanalaiso foʻoú naʻe pulusi ia ki muí ni. Ko e hā ʻa e ngaahi fakamulituku naʻe aʻu ki ai ʻa e timi ʻo e kau mataotaó?
ʻUluakí, ʻoku fakamamafaʻi ʻe he kau mataotaó ko e fakamatala moʻoni fakaʻākeolosiá ʻoku poupouʻi ai ha ʻaho ki muʻa ʻi he fakaheeʻi ki Pāpiloné. Ko e vakai fakapaleokalafí—ko e taimi ʻo e meʻa naʻe tohí mei he anga hono fuó, sīpingá, tuʻungá, hokohoko ʻo e mataʻitohí mo e anga ʻo e huʻu ʻa e mataʻitohí—ʻoku fakahaaʻi ai ʻa e vahaʻa taimi tatau, ʻa ia, ko e ngataʻanga ʻo e senituli hono fitu K.M. Pea ko e fakaʻosí, ʻi he vakai ki he ʻotokalafí, ʻa e saienisi ʻo e sipelá, ʻoku fakamulitukuʻaki ai ʻe he timi ko ení: “Ko e fakamatala moʻoni fakaʻotokalafi ʻi he ongo meʻa fakamanatú [ongo takainga tohí] ʻoku fehoanaki ia mo e fakamoʻoni fakaʻākeolosia mo fakapaleokalafi fekauʻaki mo e taimi ʻo e ngaahi lea kuo tongí.”
Ko e pepa Bulletin of the American Schools of Oriental Research ʻokú ne fakanounou ʻa e fakatotolo ʻo e ongo takainga tohi silivá, ʻa ia ʻoku toe ui ko e ngaahi lea Hīnomi Ketefi kuo tongí, ʻo peheni: “Ko ia ʻe lava ke tau fakapapauʻi ʻa e fakamulituku naʻe aʻu ki ai ʻa e tokolahi taha ʻo e kau mataotaó ʻo pehē ko e ngaahi lea kuo tongi naʻe maʻu ʻi he ongo meʻa fakamanatú ʻoku fakatolonga ai ʻa e muʻaki ngaahi lave ʻiloa ki he ngaahi konga tohi Fakatohitapú.”
[Maʻuʻanga ʻo e Tā ʻi he peesi 32]
ʻAna: Pictorial Archive (Near Eastern History) Est.; ongo tā tongitongi: Photograph © Israel Museum, Jerusalem; anga-lelei ʻa e Israel Antiquities Authority