ʻOkú Ke Loto ke Maʻu ha Kaungāmeʻa Lelei?
KO E tokolahi taha ʻo e kakaí ʻoku nau loto ke maʻu ha ngaahi kaumeʻa lelei. Ko e malava ke vahevahe ʻa hoʻo ngaahi hokosiá mo e ngaahi kaungāmeʻa ofí ʻokú ne fakafiefiaʻi ʻa hoʻo moʻuí. Ka ʻe lava fēfē ke ke maʻu ʻa e kaumeʻa moʻoní? ʻI he meimei taʻu ʻe 2,000 kuohilí, naʻe fakahaaʻi ai ʻe Sīsū ko e kī ki he lavameʻa ʻi he vahaʻangatae fakaetangatá kotoa ko e ʻofa taʻesiokitá. Naʻá ne akoʻi: “Hange ko ia ʻoku mou loto ke fai ʻe he kakai kiate kimoutolu, mou fai tatau mo ia foki kiate kinautolu.” (Luke 6:31) Ko e fakamatala ko ení, ʻa ia ʻoku faʻa ui ko e Lao Koulá, ʻoku fakahaaʻi atu ai ʻoku fiemaʻu ke ke hoko ko ha tokotaha taʻesiokita mo nima-homo ke maʻu ai ʻa e ngaahi kaumeʻá. Ko hono ʻai mahinó, ke maʻu ha kaumeʻá, ʻoku fiemaʻu ke ke hoko ko ha kaumeʻa. Anga-fēfē?
Ko ha kaumeʻa vāofi mo māfana heʻikai lava ke fakatupulekina vave ia. He ko ē, ko e ngaahi kaumeʻá ʻoku nau mahulu lahi hake ʻi he ngaahi mahení. Ko e faʻahinga tāutaha kinautolu ʻa ia ʻokú ke pipiki fakaeongo ki ai. Ko hono fakatupulekina mo tauhi maʻu ha ngaahi haʻi vāofí ʻoku fiemaʻu ki ai ʻa e feinga. ʻOku faʻa fiemaʻu ʻi he kaumeʻá ke ke fakamuʻomuʻa ʻa e ngaahi fiemaʻu ʻa ho kaungāmeʻá ʻi haʻaú. ʻOku fevahevaheʻaki ʻe he ngaahi kaumeʻá ʻo ʻikai ngata pē ʻi heʻenau fiefiá kae toe pehē foki ki heʻenau ngaahi loto-mamahí.
ʻOkú ke fakahaaʻi ʻa e kaumeʻa moʻoní tautefito ʻaki hono fai ʻa e poupou fakaeongo mo ʻaonga ki ha tokotaha faingataʻaʻia. ʻOku fakahaaʻi ʻe he Palovepi 17:17: “Ko e kaumeʻa ʻoku ne ʻofa ʻi he taimi kotoa pe; pea ko hoto moʻoni [pe tokoua] naʻe fanauʻi maʻa ha faingataʻa.” Ko hono moʻoní, ko e ngaahi haʻi ʻo e kaumeʻá ʻoku aʻu nai ʻo toe mālohi ange ia ʻi he ngaahi haʻi fakafāmili ʻe niʻihi. ʻOku fakahaaʻi ʻe he Palovepi 18:24: “Ko ia ʻoku tokolahi hono kau feʻiloaki ko hono ʻatunga pe ʻene lusa: ka ʻoku ai ha ʻofaʻanga ʻoku maʻu ange ʻene piki ʻi hoto moʻoni [pe tokouá].” Te ke saiʻia ke ʻilo lahi ange fekauʻaki mo e founga ke fakatupulekina ai ʻa e ngaahi kaumeʻa moʻoní? Te ke saiʻia ke hoko ko e konga ʻo ha kulupu ʻo e kakai ʻa ia ʻoku ʻiloa kinautolu ʻi heʻenau feʻofaʻakí? (Sione 13:35) Kapau ko ia, ʻe fiefia ʻa e Kau Fakamoʻoni ʻa Sihova ʻi ho feituʻú ke fakahaaʻi atu ʻa e founga ke maʻu ai ʻa e ngaahi kaumeʻa moʻoní.