ʻOku Lelei Fēfē ʻa Hoʻo Fetuʻutakí?
“TOHI ʻOfa Fai ʻe ha Taʻu 60.” Ko e kaveinga ia ʻo ha feʻauhi maʻu pale ʻa ha pangikē ʻi Siapani ʻi he ngaahi taʻu siʻi kuo mahili atú. Naʻe fakaʻaiʻai ai ʻa e kau Siapani ʻi honau taʻu 50 tupú mo e 60 tupú ke nau fakamatalaʻi ʻa ʻenau “ngaahi ongoʻi totonu” ki honau ngaahi hoa malí. Naʻe tohi ʻe ha tokotaha feʻauhi ki hono uaifí: “Te ke kata nai, ka te u fakaʻiseʻisa kapau heʻikai te u leaʻaki ia, ko ia ko ʻeku ongoʻí eni, ʻi ha tuʻunga papau: Fakamālō atu ʻi hoʻo mali mo aú.”
ʻI he ngaahi anga fakafonua kehekehe, ʻo kau ai ʻa e niʻihi ʻi he Hahaké, kuo ʻikai fakalotolahiʻi ai ʻa hono fakahāhā tauʻatāina ʻa ʻete ngaahi ongoʻí. Neongo ia, laka hake ʻi he toko 15,000 naʻa nau tali ʻa e feʻauhi tohi-ʻofa ko iá. Naʻe mātuʻaki manakoa ia ʻo fai ai ha toe feʻauhi ʻe taha ʻi he hili iá, pea naʻe pulusi ʻa e ngaahi tohi ʻo makatuʻunga ʻi he ngaahi faitohi ko iá. ʻOku fakahuʻunga ʻe he meʻá ni ʻi honau lotó, ʻoku holi ʻa e tokolahi ke fakahaaʻi ʻa e anga ʻo ʻenau ongoʻi fekauʻaki mo honau hoa ʻofeiná. Neongo ia, ʻoku fakaʻehiʻehi ʻa e niʻihi kehe ia mei he fai peheé. Ko e hā hono ʻuhingá? ʻOku ngalingali nai koeʻuhí ʻoku fiemaʻu kia kinautolu ia ha tuʻunga ʻo e feinga mo e pōtoʻi ke fakaʻatā ai ʻa e niʻihi kehé—hangē ko ha hoa—ke ne mahinoʻi ʻa e anga ʻo ʻenau ongoʻí.
Ko Hitoshi Kato, ʻa ia naʻá ne faʻu ha tohi ʻi he penisoni mei he ngāué, ʻokú ne pehē ʻi he haʻohaʻonga ʻo e ngaahi hoa mali taʻumotuʻa ange ʻi Siapaní, ko e ngaahi vete fakalao lahi ʻoku kamataʻi ia ʻe he ngaahi uaifí koeʻuhi ko e ngaahi ʻita faiaka loloto kuo tātānaki ʻi he faai mai ʻa e ngaahi taʻú. “Ka,” ʻokú ne pehē, “ko e toe ola ia ʻo e ʻikai ke talanoaʻi ʻa e ngaahi meʻá ʻe he ongo hoa malí ʻi he taimi ʻokú na fehangahangai ai mo e ngaahi taimi faingataʻá.”
ʻI he penisoni mei he ngāué, ʻe ʻohovale nai ha husepāniti ʻi hono ʻoange kiate ia ʻe ha uaifi ha tohi veté. ʻI he ngaahi taʻu lahi kuo ʻikai nai ai ke fetalanoaʻaki ʻa e ongo meʻá ki he anga ʻo ʻena feongoʻiʻaki fakaekinauá. Kuo feinga nai ʻa e husepānití mo e uaifí ke fakahaaʻi ʻa ʻena ngaahi ongoʻí ka naʻe ʻikai te na malava ke tauhi ʻa e fetalanoaʻakí ʻi ha tuʻunga lelei. ʻI he ʻikai langa hake ha vahaʻangatae vāofi angé, ʻokú na fakatokangaʻi kuó na nōfoʻi ʻi he ngaahi fakakikihi hokohoko.
ʻE lava fēfē ke fekuki ʻa e husepānití mo e uaifí mo ʻena ngaahi faikehekehé ʻi ha founga melino pea talanoaʻi ʻena ngaahi ongoʻí ʻi ha founga lelei? Te ke mahuʻingaʻia nai ke ʻiloʻi ko e ngaahi fokotuʻu ʻaonga tahá ʻoku maʻu ia, ʻo ʻikai ʻi ha tohi ki muí ni mai ʻa ha tokotaha faleʻi ki he nofo malí, ka ʻi ha tohi motuʻa ʻa ia kuo koloaʻaki ʻi he laui senituli—ko e Tohi Tapú.