Motuʻa kae ʻIkai Taʻofia
TUPU mei he taʻumotuʻá, ʻoku faingataʻaʻia fakaesino ai ʻa e tokolahi, ʻo nofo mavahe mei he niʻihi kehe ʻi he sōsaietí. Naʻe ʻikai ko e tuʻunga eni naʻe ʻi ai ʻa Fernand Rivarol, ʻa ia naʻá ne mate ʻi hono taʻu 95 ʻi Siniva, Suisalani. Naʻá ne nofo tokotaha, he naʻe mālōlō ʻa hono uaifí pea naʻe ʻi ai pē ʻa e ʻapi mavahe ʻa hono ʻofefine ne ʻosi malí. Neongo ko e taimi lahi tahá naʻá ne nofo maʻu ai ʻi ʻapi, naʻe ʻikai te ne taʻelata. Naʻá ne faʻa tangutu ʻi ha tēpile ʻi loto fale, ʻo ngāueʻaki ʻa e telefoní ʻi he tā ki he kakaí ke talanoa fakalaumālie mo kinautolu.
Lolotonga ʻa ʻene moʻui mohu fiefiá, naʻe ʻi ai ha taimi naʻe taʻofia moʻoni ai ʻa Fernand. Ko e hā hono ʻuhingá? ʻI hoko pē ʻa Fernand mo hono uaifí ko e ongo Fakamoʻoni longomoʻui ʻa Sihova ʻi he 1939, naʻe mapuna hake ai ʻi ʻIulope ʻa e Tau II ʻa Māmaní. Naʻe pipiki ʻa Fernand ki heʻene fili makatuʻunga he Tohi Tapú ke ʻoua te ne fakatupu ha maumau ki ha taha. Koeʻuhi ko e meʻa ko iá, naʻe mole ai ʻene ngāué pea naʻe pau ke ne ngāue pōpula ʻi ha vahaʻa taimi—ko e fakakātoá ko e taʻu ʻe nima mo e konga—ʻa ia naʻe fakamavaheʻi ai ia mei hono uaifí mo hono kiʻi ʻofefiné he lolotonga ʻa e taimi ko iá.
ʻI he fakakaukau atu ki aí, naʻe pehē ʻe Fernand: “Ki he kakai tokolahi, naʻe hā ngali naʻá ku tukuange ha ngāue malu pea liʻaki taʻetokoniʻi ʻa hoku fāmilí. Naʻe fehiʻa ʻa e kakaí ʻiate au pea tōʻongafai kiate au ʻou hangē ha tokotaha faihiá. Neongo ia, ʻi heʻeku fakakaukau atu ki he ngaahi taʻu faingataʻa ko iá, ʻoku ou manatuʻi lelei ai ʻa hono poupouʻi mo tokoniʻi kimautolu ʻe Sihová. Kuo mahili atu talu mei ai ha ngaahi taʻu lahi, ka ko ʻeku falala kia Sihová ʻoku kei fefeka pē ʻo hangē ko ē ʻi he taimi ko iá.”
Ko e tuí ni naʻá ne ueʻi ʻa Fernand ke ne vahevahe atu ʻa ʻene ʻamanaki Fakatohitapú ki he niʻihi kehé ʻi he telefoní. Kapau naʻá ne talanoa lelei mo ha taha, naʻá ne meiliʻi ha tohi Fakatohitapu ki he tokotaha ko iá. Ki mui ai, naʻá ne toe tā ki he tokotaha ko iá ke ʻiloʻi pe naʻá ne fiefia ʻi hono lau ʻa e tohí. ʻI he taimi ʻe niʻihi naʻe faʻa tali mai ai ʻa e kakaí ʻi he faitohi ʻo fakahaaʻi ʻenau houngaʻiá, ʻa ia naʻe ʻai ai ia ke ne fiefia lahi.
ʻE fetuʻutaki atu nai ha taha ʻo hangē ko Fernand kia koe ʻi ho feituʻú. Fēfē ke ke fanongo ki he meʻa te ne leaʻakí koeʻuhi ke ke ʻiloʻi ai ʻa e meʻa ʻokú ne tui ki aí? Ko e Kau Fakamoʻoni ʻa Sihová ʻoku nau fiefia maʻu pē ke vahevahe atu kiate koe ʻa ʻenau tuí.