Ko Daniel mo Hono Kaati Fakaʻilonga Fakataha-Lahí

NAʻE valokiʻi ʻe Sīsū ʻa e kau taki lotu fiemāʻoniʻoní ʻa ia naʻa nau hoko ʻo ʻita ʻi he taimi naʻa nau sio ai ki he fanga kiʻi tamaiki tangatá ʻoku nau fakamālōʻiaʻi fakahāhā ʻa e ʻOtuá. ʻI heʻene feʻungamālié, naʻe ʻeke ange ʻe Sīsū kia kinautolu: “Kuo teʻeki koā ke mou lau, ʻo pehe, Ko e ngutu ʻo e tamaiki mo e valevale kuo ke tuʻutuʻuni mei ai hao fakamalo.”—Mātiu 21:​15, 16.

ʻOku ʻomi ʻe he taʻu ono ko Daniel, ʻa ia ʻokú ne feohi mo e fakatahaʻanga lea faka-Lūsia ʻi Siamane, ʻa e fakamoʻoni ʻoku kei fakamālōʻiaʻi pē ʻe he fānaú ʻa Sihova. Naʻá ne maʻu ha fakataha-lahi ʻa e Kau Fakamoʻoni ʻa Sihová ʻi Duisburg, fakataha mo ʻene faʻeé mo hono tuofefiné. Ko e fuofua taimi eni ke nau maʻu ai ha fuʻu fakataha-lahi pehē. Naʻe foʻou ʻa e meʻa kotoa pē: ko e hōtelé, fuʻu kau fanongó, taʻutu maʻu ʻi he ʻaho ʻe tolu, ko e papitaisó pea pehē foki ki he tulamá. Kae fēfē ʻa Daniel ia? Naʻe ala faʻifaʻitakiʻanga ʻa hono ʻulungāangá.

ʻI he ʻaho Mōnite hili ʻa e fakataha-lahí, ʻi honau ʻapí ai pē, naʻe tuʻu hengihengia hake ai ʻa Daniel ke ʻalu ki he akó. Ka ko e hā ʻa e meʻa naʻe kei pineʻi ki hono sāketí? Ko e kaati fakaʻilonga naʻá ne fakahaaʻi ia ko ha tokotaha maʻu fakataha-lahí! Naʻe fakamatala ange ʻene faʻeé kiate ia: “Kuo ʻosi ʻa e fakataha-lahí. Toʻo ā hoʻo kaati fakaʻilongá he ʻahó ni.” Ka naʻe tala ange ʻe Daniel: “ʻOku ou fiemaʻu ʻa e tokotaha kotoa ke nau sio ki he feituʻu naʻá ku ʻi aí pea mo ʻiloʻi ʻa e meʻa naʻá ku akó.” Ko ia ʻi he ʻahó kotoa ʻi he akó, naʻá ne laukauʻaki ʻene tui ʻa ʻene kaati fakaʻilongá. ʻI he ʻeke ange ʻe heʻene faiakó ʻo kau ki aí, naʻá ne fakamatalaʻi ange ʻa e polokalama ʻo e fakataha-lahí kiate ia.

ʻI heʻene fai peheé, naʻe muimui ai ʻa Daniel ʻi he faʻifaʻitakiʻanga ʻa e laui afe ʻo e tamaiki tangata mo e tamaiki fefine kuo nau fakamālōʻiaʻi fakahāhā ʻa Sihova ʻi he faai mai ʻa e ngaahi senitulí.