Faingofua, ʻIo, ka ʻOku Tonu?
ʻI SEPITEMA 2005, naʻe talaki fakahāhā loto-māfana ai ʻe he Siasi ʻIngilaní ʻa hono tukuange ʻa e The 100-Minute Bible. ʻI hono faʻu ke lau ʻi he miniti ʻe 100, ʻoku fakanounou ai ʻe he pulusinga foʻoú ni ʻa e Ngaahi Konga Tohi Tapu Faka-Hepeluú ki he ngaahi konga peesi-taha ʻe 17 pea mo e Ngaahi Konga Tohi Tapu Faka-Kalisí ki he ngaahi konga ʻe 33, ʻo toʻo atu ai ʻa e kotoa ʻo e “fanga kiʻi konga fakapipikó,” hangē ko ia ne leaʻaki ʻe ha tokotaha failīpooti ʻe taha. ʻOku faingofua hono laú, ʻio, ka ʻoku tonu?
Tuku kehe ʻa hono toʻo ʻa e huafa fakaʻotuá, ʻa e Sihová, ko ha niʻihi ʻo e ngaahi feliliuaki kehé ʻe fakatokangaʻi ia ʻe he kau ako Tohi Tapu fakamātoató. (Sāme 83:18) Ko e fakatātaá, ʻoku fakahaaʻi ʻe he konga 1 ko e ʻOtuá “naʻá ne fakatupu ʻa hēvani mo māmani ʻi ha vahaʻa taimi ko e ʻaho ʻe ono.” Kae kehe ʻoku pehē pē ʻe he Senesi 1:1: “I he kamataʻanga naʻe fakatupu ʻe he ʻOtua ʻa e ngaahi langi mo mamani.” Hili iá, ko e muʻaki fakamatalá ʻoku fakamatalaʻi ai ʻa e ngaahi ngāue lahi ange ʻo e fakatupú fekauʻaki mo e māmaní, ʻa ia ko hono fuoloá ko e “ʻaho” ʻe ono pe ngaahi vahaʻa taimi. ʻOku fakanounou leva ʻe he Senesi 2:4 ʻa e vahaʻa taimi kotoa ʻo e fakatupú, ʻo ui ia ko e “ʻaho naʻe ngaohi ai ʻe Sihova Elohimi ʻa mamani mo langi.”—Fakaʻītali ʻamautolu.
Fakatatau ki he The 100-Minute Bible, ko Siopé ko ha tangata anga-tonu, naʻe ʻohofi ia ʻe he “taha ʻo e kau tamaioʻeiki [ʻa e ʻOtuá], ʻa Sētane, . . . ʻa ia ko hono fatongiá ia ke ngāue ko e tokotaha tukuaki ʻo e faʻahinga ʻo e tangatá.” ʻOkú ke sio ki he taʻehuʻufataha hení? Ko e foʻi lea “Sētane” ʻoku ʻuhinga iá ko e “Tokotaha-Talitekeʻi.” ʻI he ʻikai ko ha tamaioʻeiki ʻa e ʻOtuá, ko hono moʻoní ko Sētané, ko e fili lahi ia ʻo e ʻOtuá mo e tokotaha naʻá ne fakanofo pē ʻa ia tonu ko e tokotaha tukuaki ʻo e faʻahinga ʻo e tangatá.—Fakahā 12:7-10.
Fēfē ʻa e Ngaahi Konga Tohi Tapu Faka-Kalisi Kalisitiane ʻo e The 100-Minute Bible? ʻI he pealapeli ʻo e sipí mo e kosí, ʻoku pehē ai ʻi he pulusinga foʻoú ʻoku saiʻia ʻa Sīsū ʻi he faʻahinga naʻa nau tokoniʻi “ha faʻahinga taha taʻemahuʻinga pē,” ka naʻe lave moʻoni ʻa Sīsū ia ʻokú ne faitāpuekina ʻa e faʻahinga ʻoku nau failelei ki hono kau muimui topuvaʻe tahá—ʻa hono “ngāhi tokoua.” (Mātiu 25:40) Ko e fakamatala fakanounou ʻo e Fakahaá ʻoku fakahaaʻi ai ki he kau lautohí ko “Loma, ʻa Pāpilone ko e lahi, ʻe fakaʻauha fakaʻaufuli ia.” Kae kehe, ʻoku ʻiloʻi ʻe he kau ako Tohi Tapú ʻoku halaʻatā ha fakamahino pehē mai ia ʻi he muʻaki hiki tohí hano ʻiloʻi pau pehē ʻo “Babilone koe lahi.”—Fakahā 17:15–18:24, PM.
Ki he faʻahinga ʻoku nau feinga ke ʻiloʻi ʻa hotau Tokotaha-Fakatupú pea mahinoʻi ʻene taumuʻá, heʻikai lava ke ʻi ai ha fetongi ia ki he Tohi Tapu kakató. Ko e moʻoni, ko hono lau ʻa e Tohi Tapú ʻe fiemaʻu ki ai ʻa e miniti laka hake he 100, ka ko hono fai iá ʻoku ʻomi ai ʻa e ngaahi pale taʻehanotatau. (Sione 17:3) Fakatauange ke ke tali ʻa e pole ko ení pea utu maʻau ʻa e ngaahi pale.—2 Timote 3:16, 17.