Ko ha Faʻifaʻitakiʻanga ʻo e Faitotonú

KO Nelma ko ha tokotaha ngaahi ʻulu ia ʻi Cruzeiro do Sul, Pelēsila naʻá ne fehangahangai ki muí ni mo hano ʻahiʻahiʻi ʻo ʻene anga-tonu faka-Kalisitiané. ʻI he taimi naʻe hoko ai ha tāfea ʻi hono feituʻú, naʻe maʻu ai ʻe Nelma ha vala ko e meʻaʻofa ange ʻaki ʻe he taha ʻo ʻene kau kasitomaá. ʻI heʻene vakaiʻi ʻa e ʻū valá, naʻá ne maʻu hake ai ʻa e paʻanga naʻe feʻunga hono lahí mo e paʻanga ʻe $1,000 (U.S.) ʻi he kato ʻo ha talausese.

Ko e paʻanga naʻe maʻu ʻe Nelma naʻe feʻunga nai ia mo hono vāhenga ʻi he māhina ʻe fitú, pea naʻá ne fuʻu fiemaʻu moʻoni ia. Naʻe maumau ʻa hono falé ʻi he tāfeá, pea naʻe mole ʻa e ngaahi koloa lahi ʻa ʻene tamaí mo e toenga ʻo e fānaú. ʻI he paʻangá, ʻe malava ai ke ne fakaʻosi ʻa e monomono ʻo hono ʻapí pea kei toe pē ke tokoni ʻaki ki hono kāingá. Kae kehe, ko e konisēnisi ʻo Nelma ne akoʻi ʻe he Tohi Tapú naʻe ʻikai te ne fakaʻatā ia ke ne tauhi ʻa e paʻangá.—Hepelu 13:18.

Pongipongia ʻi he ʻaho ʻe tahá, naʻá ne ʻalu ai ki he ngāué ki muʻa ʻi he taimi kamata anga-maheni ʻa e pisinisí ʻo ne fetuʻutaki ki he fefine pisinisi naʻá ne meʻaʻofa ange ʻaki ʻa e valá. Naʻe fakamālō ange ʻa Nelma kiate ia ʻi he valá ka naʻá ne tānaki ange heʻikai lava ke ne tauhi ʻa e meʻa naʻá ne maʻu ʻi lotó. Naʻe fiefia lahi ʻa e fefiné ʻi heʻene maʻu ʻa e paʻangá. Naʻá ne fakamavaheʻi ia ke totongi ʻaki ʻa ʻene kau ngāué. “Ko e faitotonú ko ha meʻa ia ʻoku ʻikai te te faʻa loko maʻu,” ko e lau ia ʻa e fefine pisinisí.

Ko e moʻoni, ʻe ongoʻi nai ʻe he niʻihi ko e faitotonú ʻoku ʻikai ke ʻi ai hano lelei makehe. Kae kehe, ko e faitotonú ko ha ʻulungāanga ia ʻoku fakamahuʻingaʻi lahi ʻe he faʻahinga ʻoku nau feinga ke fakahōifuaʻi ʻa e ʻOtua moʻoni ko Sihová. (Efeso 4:​25, 28) Naʻe pehē ʻe Nelma: “ʻE ʻikai lava ke u mohe ʻi he poʻulí kapau naʻá ku fai ha meʻa kehe.”