Haʻu ʻa Kalaisí​—ʻOku Totonu Ke Tau Ilifia ki Ai?

KO E hā ʻa e ʻīmisi ʻoku haʻu ki hoʻo fakakaukaú ʻi he fekauʻaki mo e haʻu ʻa Sīsū Kalaisí? ʻOkú ke vakai ki ai ko ha meʻa te ne ʻomi ʻa e mala, maumau mo e tautea ki he faʻahinga ʻo e tangatá? Pe ʻokú ke ʻamanaki atu te ne fakangata ʻa ʻetau ngaahi palopalemá kotoa? Ko e haʻu ʻa Kalaisí ko ha meʻa ia ke ilifia ki ai? Pe ʻoku totonu ke tau fakatuʻotuʻa atu ki ai?

ʻI he fekauʻaki mo e haʻu ʻa Kalaisí, ʻoku pehē ʻe he Tohi Tapú: “Vakai, ʻoku ne hoko mai mo e ngaahi ʻao; pea ʻe mamata kiate ia ʻe he mata kotoa pe, . . . pea ʻe lauʻaitu ʻa e ngaahi matakali kotoa pe ʻo mamani koeʻuhi ko ia.” (Fakahā 1:7) Ko e haʻu ko ení ʻoku ʻuhinga ia ki he hā mai ʻa Sīsū ʻi he kahaʻú ke fakapaleʻi ʻa e anga-tonú pea tautea ʻa e fulikivanú.

ʻI he ʻikai ke ilifia ki aí, naʻe fakatuʻotuʻa atu ʻa e ʻapositolo ko Sioné ki he haʻu ʻa Kalaisí. Hili ʻa e maʻu fakahā ʻa Sione fekauʻaki mo e haʻu ko ení pea mo ʻene ʻuhinga ki he foʻi māmaní, naʻá ne lotu fakamātoato: “ʻEiki Sisu, ke ke haʻele mai.” (Fakahā 22:20) Ka ko e hā ʻoku “lauʻaitu [ai] ʻa e ngaahi matakali kotoa pe ʻo mamani koeʻuhi ko ia”? ʻI he founga fē ʻe mamata ai kiate ia ʻa e “mata kotoa pe”? Ko e hā ʻe fakahoko ʻi he haʻu ʻa Kalaisí? ʻE ʻaonga fēfē kiate kitautolu he taimí ni ʻa e tui ki aí? Ko e kupu hoko maí ʻe tali ai ʻa e ngaahi fehuʻi ko ení.