Ko e Mālohi ʻo e ʻEleló
KO E ʻelelo ʻo e silafí ʻoku aʻu ki he senitimita ʻe 45 hono lōloá pea ʻoku molū mo mālohi feʻunga ke ne pakiʻi ʻa e ngaahi lau ʻo e ʻakaú mei he ngaahi vaʻá. Ko e ʻelelo ʻo e tofuaʻa puluú ʻoku mamafa tatau ia mo e ʻelefānite ʻe taha. Fakaʻuta atu ki he mālohi ʻoku fiemaʻu ke ueʻi ʻaki iá!
Ko e ʻelelo ʻo e tangatá ʻoku fuʻu valevale ia ke fakafehoanaki ki ai ʻi hono lahí, mamafá mo e mālohí. Ka neongo ia, ʻoku mafai lahi ange ia. “Ko e mate mo e moʻui ʻoku puke ʻe he ʻelelo,” ko e lau ia ʻa e Tohi Tapú ki he kupu siʻi ko eni ʻi he sino ʻo e tangatá. (Palovepi 18:21) Ko e moʻoni, kuo tuʻo fiha eni ʻetau fanongo ʻi he mālohi fakatupu-mate ʻo e ʻelelo ʻo e tangatá ʻi hono ngāueʻaki ʻi he ngaahi fasituʻu mo e ngaahi fakamoʻoni loi kuo fakatupunga ai ʻa e maumau, naʻa mo e mate ki he faʻahinga maʻukovia taʻehalaiá?
ʻOku pehē pē hono maumauʻi ʻa e ngaahi kaungāmeʻa fuoloá ʻe he ngaahi fakamatala fakatupulotomamahí. Kuo laiki ʻa e ngaahi ongoʻí ʻe he ngaahi lea fefeká. “ʻE tuku ʻafe hoʻomou fakamamahiʻi hoku laumalie, ʻO laiki au ʻaki ha koto lea?” ko e kalanga ia ʻa Siope ʻa ia naʻe fakamamahiʻi lahi ʻe hono kaungāmeʻá. (Siope 19:1 [Siope 19:2, PM]) Naʻe ʻomai ʻe he ākonga ko Sēmisí ha fakatātā mahino ʻo e mālohi fakaefakaʻauha ʻo e ʻelelo taʻemapuleʻí: “Ko e ʻelelo ko e kupu siʻi, pea ʻoku lau meʻa lalahi. Vakai, hono ʻuke ʻa e meʻi afi ʻoku vela ai ʻa e fuʻu vao! Pea ko e ʻelelo ko ha afi ia.”—Semisi 3:5, 6.
ʻI he tafaʻaki ʻe tahá, ko e mālohi ʻo e ʻeleló ʻe lava ke toe foaki-moʻui. Ko e ngaahi lea kaungāongoʻi mo fakanongá kuo fakahaofi ai ʻa e niʻihi mei he loto-mafasiá mo e taonakitá. Ko e tokanga ki he faleʻi alafalalaʻangá, kuo fakahaofi ai ʻa e tokolahi ʻo e kau ngāuehalaʻaki ʻo e faitoʻo kona tapú mo e kau faihia anga-fakamamahí, mei he mate mutukiá. Ko e moʻoni, ko e fua ʻo e ʻelelo ʻo ha tokotaha māʻoniʻoni ko ha “ʻakau ʻo e moʻui,” mo e “apele koula ʻi he ainga siliva, ko e lea ia ʻoku tautaungamalie hono leaʻaki.”—Palovepi 15:4; 25:11.
Kae kehe, ko hono ngāueʻaki lelei taha ʻo e ʻeleló, ko hono fakahīkihikiʻi ʻa Sihova ko e ʻOtuá, ʻo talaki ʻa e ongoongo lelei ʻo e Puleʻanga ʻo e ʻOtuá, pea mo akoʻi ki he niʻihi kehé ʻa e ngaahi moʻoni mahuʻinga ʻi he Tohi Tapú. Ko e hā hono ʻuhingá? Naʻe pehē ʻe Sīsū: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.”—Sione 17:3; Mātiu 24:14; 28:19, 20.