Ngaahi Lēsoni Mahuʻinga ki he Fānaú

KO Gladys ʻoku ngāue ia ʻi ha ʻapiako ʻi Mendoza, ʻĀsenitina. ʻI he ʻaho ʻe taha naʻá ne luelue ofi atu ai ʻi ha loki ako ʻo ne fakatokangaʻi atu ha faiako ʻoku lautohi mei he Ko ʻEku Tohi ʻo e Ngaahi Talanoa Faka-Tohitapú ki heʻene fānau ako kalasi faá.a Naʻe fakafeʻiloaki ange ʻe Gladys ki he faiakó ko e taha ia ʻo e Kau Fakamoʻoni ʻa Sihová ʻo ne fakahaaʻi ange kiate ia ʻa e founga ʻe maʻu ai ʻa e ʻaonga lahi mei he tohí. ʻI he maongo kiate ia ʻa e meʻa naʻe fakamatalaʻi ange ʻe Gladys, naʻe loto ai ʻa e faiakó ke ʻai ʻa e tohí ko ha konga tuʻumaʻu ia ʻo e ngaahi lēsoni fakaakó. Kae kehe, naʻe fiemaʻu ha ngofua ia mei he poate ʻoku nau fakalele ʻa e ʻapiakó. ʻI heʻene fiefiá, naʻe fakangofua ia.

Ki mui ai, ʻi ha polokalama ʻaho makehe ʻoku fakalototoʻaʻi ai ʻa e lautohí ʻi he ʻapiakó, naʻe vaheʻi ai ʻe he faiakó ki heʻene kau akó ke nau lau ha vahe ʻo e tohí ʻi muʻa ʻi heʻenau kalasí. Ko e ola ʻo hono tali lelei ʻa e polokalamá ni, naʻe fakaafeʻi ai ʻa e faiakó ke ne fakahoko ha polokalama ʻi he televīsone fakalotofonuá. ʻI he lave ki he ʻulungāanga ʻo e fānau akó, naʻe ʻeke ange ʻe he faifakaʻekeʻeke ʻo e polokalamá kiate ia, “ʻOku anga-fēfē hoʻo ʻai ke ʻulungāanga lelei ʻa e fānaú ʻi he loki akó?” Naʻe fakamatala ʻa e faiakó ʻo pehē naʻá ne ngāueʻaki ha tohi ʻoku fakakaveinga Ko ʻEku Tohi ʻo e Ngaahi Talanoa Faka-Tohitapú. Naʻá ne fakamatala ʻo pehē neongo naʻe ʻikai te ne akoʻi ʻa e meʻa fakalotú ʻi loki ako, fakafou ʻi he tohí ni, naʻá ne fakahūhū ai ʻa e ngaahi tuʻunga fakaeʻulungāanga hangē ko e fakaʻapaʻapa, kātaki, fāʻūtaha, ngāue fakataha, talangofua mo e ʻofá. Naʻe loto-tatau ʻa e tokotaha kotoa ko e ngaahi meʻá ni ko e ngaahi lēsoni mahuʻinga ia ke ako ʻe he fānaú.

Te ke saiʻia ke fakahūhū ʻa e ngaahi tuʻunga fakaeʻulungāanga ko iá ki hoʻo fānaú? ʻE lava ke ke kole ki ha taha ʻo e Kau Fakamoʻoni ʻa Sihová ki ha tatau ʻo e tohi fakatoʻoaloto Ko ʻEku Tohi ʻo e Ngaahi Talanoa Faka-Tohitapú.

[Fakamatala ʻi lalo]