ʻOku Hāngaifofonga Mai ʻa e ʻOtuá Kiate Koe?
ʻOku maʻu ʻe Sihova ko e Tokotaha-Fakatupu Pulé, ʻa e malava ke sió? Ko e moʻoni ʻokú ne maʻu! ʻOku fakaʻuhinga mahino mai ʻe he Tohi Tapú: “Ko ia naʻa ne ngaohi ʻa e mata, ʻo ʻikai koā te ne sioa?” (Sāme 94:9) Ko e malava ʻa Sihova ke sió ʻoku mātuʻaki māʻolunga ange ia ʻi he faʻahinga ʻo e tangatá. ʻOku ʻikai ngata pē ʻi heʻene ʻafioʻi ʻa hotau fōtunga ʻi tuʻá ka ko e toe “sivi loto” foki ia, pea ʻoku lava ke ne “fua ʻa e ngaahi loto.” (Palovepi 17:3; 21:2) ʻIo, ʻokú ne maʻu ʻa e malava ke fakafuofuaʻi ʻetau fakakaukaú, fakaueʻilotó mo e ngaahi holi ʻi lotó.
ʻOku ʻafioʻi ʻe Sihova ʻa e ngaahi tuʻunga faingataʻa ʻoku tau fetaulaki nai mo ia ʻi he moʻuí, pea ʻokú ne tali ʻetau ngaahi kolé. Naʻe tohi ʻe he tokotaha-tohi-sāmé: “Ko e fofonga ʻo Sihova ʻoku lalama ki he kau maʻoniʻoni, pea ʻoku ne fakaongo ke maʻu ʻenau tangi. He ko e loto lavea ʻoku ofi ki ai ʻa e ʻEiki, pea ʻoku ne fakamoʻui ʻakinautolu ʻoku laumalie mafesi.” (Sāme 34:15, 18) He fakafiemālie ē ke ʻiloʻi ʻoku mahinoʻi ʻe Sihova hotau ngaahi tuʻungá pea ʻokú ne fai mai ʻa e tali ki heʻetau ngaahi lotu loto-moʻoní!
ʻOku ʻafioʻi ʻe Sihova ko e ʻOtuá ʻo aʻu ki he ngaahi ngāue ʻoku fai fakapulipuliʻí. ʻIo, “ʻoku telefua mo tokaimaʻananga ʻa e meʻa kotoa pe ki he fofonga ʻo ia ʻoku tau fakamāu ki ai.” (Hepelu 4:13) Ko ia pe ʻoku lelei pe kovi ʻetau ngaahi tōʻongá, ʻoku ʻafioʻi kotoa ia ʻe he ʻOtuá. (Palovepi 15:3) Ko e fakatātaá, ʻoku pehē ʻe he Senesi 6:8, 9 “ko Noa naʻe ʻilo ki ai ha hoifua ʻi he finangalo ʻo Sihova” pea naʻá ne ‘takaua mo e ʻOtua’ moʻoní. ʻIo, naʻe maʻu ʻe Noa ʻa e hōifua mo e tāpuaki ʻa Sihová koeʻuhí naʻá ne talangofua mo pouaki ʻa e ngaahi tefitoʻi moʻoni māʻoniʻoni ʻa e ʻOtuá. (Senesi 6:22) ʻI hono kehé, ko e kakai ʻi he ʻaho ʻo Noá naʻa nau anga-fakamālohi mo fulikivanu. Naʻe ʻikai ke taʻeʻafioʻi ʻe he ʻOtuá ʻa e tuʻungá ni. Naʻá ne ‘ʻafioʻi kuo fakaututu ʻa e kovi ʻa e tangatá ʻi mamani, pea ʻoku kovi ʻatā ʻa e filioʻi kotoa pe ʻo e ngaahi fakakaukau ʻa hono lotó maʻuaipe.’ Faifai atu pē, naʻe ʻomi ʻe Sihova ʻa e fakaʻauha ki he kau fulikivanú ka naʻá ne fakahaofi moʻui ʻa Noa mo hono fāmilí.—Senesi 6:5; 7:23.
ʻE hōifua mai ʻa Sihova kiate koe? Ko e moʻoni, ko e ongo foʻi fofonga ʻo Sihová “ʻoku feleleaki ʻi mamani katoa, ke taukapoʻi ʻa e kakai ʻoku haohaoa loto kiate ia.” (2 Kalonikali 16:9) ʻOku vavé ni ke ne toe toʻo mei he foʻi māmaní ʻa e kau fulikivanú kotoa pea fakahaofi ʻa e faʻahinga ʻoku loto anga-vaivaí.—Sāme 37:10, 11.