“Kātaki ʻo Tali ʻEku Meʻaʻofa Vaivaí Ni”

KO E fakalea eni ʻo ha tohi naʻe maʻu ʻe he ʻōfisi vaʻa ʻo e Kau Fakamoʻoni ʻa Sihova ʻi Lūsiá. Naʻe maʻu fakataha mo e tohí ha fuʻu puha lahi naʻe fonu ʻi he ngaahi sitōkeni niti.

Ko e meʻaʻofa ia naʻe ʻave ʻe Alla taʻu 67, ko e taha ʻi he Kau Fakamoʻoni ʻa Sihova ʻi ha fakatahaʻanga ʻi he Hahake Mamaʻo ʻo Lūsiá. Kuo tauhi ʻa Alla kia Sihova ʻo laka hake ʻi he taʻu ʻe hongofulu, ʻo malangaʻi faivelenga ʻa e ongoongo lelei ʻo e Puleʻangá. Kae kehe, naʻe hoko fakafokifā ha pā kālava ʻo mamatea ai ha konga ʻo hono sinó. Neongo ia, koeʻuhi ko e ʻofa ʻa Alla, kuó ne muimui ai ʻi ha ʻalunga ʻo hangē ko e fefine Kalisitiane ʻi he ʻuluaki senitulí ko Toakase, ʻa ia naʻá ne ngaohi ʻa e ngaahi kofu maʻá e kaungātuí.—Ngāue 9:​36, 39.

Naʻe pehē ʻe Alla ʻi heʻene tohí: “ʻOku ʻikai ngaue hoku vaʻé, ka ʻoku kei lava pē ke ngaue hoku nimá. Ko ia ʻoku fai ʻeku malangá ʻi he faitohi.” Naʻá ne tānaki mai: “ʻOku ou pehē lolotonga ʻoku kei ngaue hoku nimá, te u niti ha ngaahi sitōkeni māfana. ʻOku ou loto ke ʻoange ʻa e ngaahi sitōkeni ko ení ki he ngaahi tokoua mo e ngaahi tuofāfine ʻa ia te nau langa ʻa e ngaahi Fale Fakatahaʻanga ʻi he ngaahi feituʻu momoko ʻo hangē ko e Hahake Mamaʻó mo Saipīlia.”

Naʻe pehē ʻe Sīsū Kalaisi ʻo fekauʻaki mo ʻene kau muimui moʻoní: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:35) Ko e ʻofa hangē ko ia naʻe fakahā ʻe Alla ko ha fakaʻilonga ia ʻe ʻiloʻiʻaki ʻa e kau ākonga moʻoni ʻa Sīsuú.