ʻOku Malava ʻa e Māmaní ʻo Fāʻūtaha?

ʻOKU hanga atu nai hotau māmaní ki he kamataʻanga ʻo e melinó pe ʻoku tau ʻi he ngutungutu ʻo e fakatamakí? ʻOku hā ngali ʻe malava ke ʻi ai ʻa e fakaʻuhinga fakatupu tuipau ki he anga ʻo e vakai taki taha.

ʻI he tafaʻaki ko eé, ko e kau taki ʻe niʻihi ʻi he māmaní ʻoku nau fakahā mo e falala-pau ko e melino fakamāmanilahí ko ha taumuʻa ia ʻoku lava ke aʻusia—mahalo pē koeʻuhí he ka ʻikai, ko e māmaní ia ʻe ʻi ha tuʻunga ʻoku fuʻu fakalilifu ke fai ha fakakaukauloto ki ai. Ka ʻi he tafaʻaki e tahá, ʻoku ongoʻi manavahē ʻaupito ai ʻa e tokolahi ki he ngaahi fehuʻi hangē ko ení: Ko e ngaahi puleʻanga fē ʻoku nau maʻu ʻa e ngaahi meʻatau fakatupu ʻauha lahi tahá? Te nau fakatoʻotoʻa ke ngāueʻaki? Ko e hā ʻe hokó ʻo kapau naʻa nau ngāueʻaki ia?

ʻOku fakahaaʻi ʻe he hisitōliá ko e feʻauʻauhí mo e tomuʻa fehiʻá kuó na fakafepakiʻi ha ʻamanaki pē ki he fāʻūtahá, pea ʻoku faʻa hanga ʻe he lotú ʻo tafunaki ʻa e taú kae ʻikai ke taʻotaʻofi. Naʻe hiki ʻe he fainusipepa ko James A. Haught ʻo pehē: “Ko ha meʻa pē ʻokú ne ʻai ke māvahevahe ʻa e kakaí ʻoku lava ke ne fakatupunga ʻa e fakafili, pea ko e lotú ʻoku kau ia ʻi he meʻa ʻoku mālohi ʻaupito ʻene fakatupunga ʻa e māvahevahé. “Neongo ʻa e tui fakaemāmani ko ia ʻoku hanga ʻe he lotú ʻo ʻai e kakaí ke nau ‘leleí,’ ʻoku hā mahino mai ʻoku fakatupunga ʻe he lotú ia ʻa e kakaí ke nau fai ʻa e ngaahi meʻa mātuʻaki fakalilifu ʻaupito.” ʻOku maʻu ʻe he faʻu-tohi ko Steven Weinberg ha vakai meimei tatau. ʻOkú ne tohi: “Ki he kakai leleí ke fai ʻa e meʻa ʻoku koví, ʻoku malava ia ʻi he māvahevahe ʻoku fakatupunga ʻe he lotú.”

ʻOku ʻi ai nai ha toe ʻamanaki ʻe malava hotau māmaní ʻo fāʻūtaha? ʻIo! Ka ko e matavai ki he fāʻūtaha ʻa e māmaní ʻoku ʻikai mei he tangatá pe mei he ngaahi lotu ʻoku fokotuʻu ʻaki ʻa e fakakaukau ʻa e tangatá, ʻa ia te tau vakai leva ki ai.

[Fakamatala ʻi he peesi 3]

ʻOku hangē ʻa e māmaní ko ha pulu-ʻesi ʻoku mei pahū?