Founga Hono Fokotuʻutuʻu ʻo e Kulupu Pulé

ʻOKU faʻu e Kulupu Pule ʻa e Kau Fakamoʻoni ʻa Sihová ʻaki ʻa e kau tangata ʻosi fakatapui ʻa ia ko e kau sevāniti pani kinautolu ʻa e ʻOtuá. ʻOku nau ngāue ko e kau fakafofonga ʻo e kalasi tamaioʻeiki anga-tonu mo potó, ʻa ia ʻoku nau maʻu ʻa e fatongia ko hono tokonaki ʻo e meʻakai fakalaumālié pea mo hono ʻoatu ʻo e fakahinohino mo e fakaʻaiʻai ki he ngāue fakamalanga ʻo e Puleʻangá ki māmani kotoa.—Mt. 24:14, 45-47.

Ko e fakataha ʻa e Kulupu Pulé ʻoku fai ia ʻi he uike taki taha, pea ʻoku faʻa fakahoko ia ʻi he ʻaho Pulelulú. ʻOku fakaivia ʻe he ngaahi fakataha fakauike ko ení ʻa e fanga tokouá ni ke nau ngāue fāʻūtaha. (Sāme 133:1) ʻOku ngāue ʻa e kau mēmipa ʻo e Kulupu Pulé ʻi he ngaahi kōmiti kehekehe. ʻI hono tokangaekina ʻo e ngaahi fiemaʻu ki he ngāue ʻo e Puleʻangá, ʻoku tokangaʻi leva ʻe he kōmiti taki taha ʻa ʻene tafaʻaki, hangē ko ia ʻoku fakaikiiki atu ʻi laló.

◼ KŌMITI KOUʻOTINEITA: ʻOku ʻi he kōmití ni ʻa e kouʻotineita ʻo e kōmiti taki taha ʻo e ngaahi kōmiti kehe ʻo e Kulupu Pulé pea mo ha sekelitali ʻa ia ko e mēmipa foki ia ʻo e Kulupu Pulé. ʻOku fakapapauʻi ʻe he kōmití ni ʻoku lele lelei mo lavameʻa ʻa e ngaahi kōmití hono kotoa. ʻOkú ne toe tokangaʻi foki ʻa e ngaahi fiemaʻu fakatuʻupakē lalahí, ngaahi fakatangá, ngaahi fakatamaki fakanatulá, pea mo ha ngaahi fiemaʻu fakavavevave kehe ʻa ia ʻoku uesia ai ʻa e Kau Fakamoʻoni ʻa Sihová ʻi māmani lahi.

◼ KŌMITI KAU NGĀUÉ: Ko e fanga tokoua ʻi he kōmiti ko ení kuo fakafatongiaʻaki hono tokangaʻi ʻo e ngaahi fokotuʻutuʻu ki he ngaahi lelei mo e tokoni fakafoʻituitui mo fakalaumālie ki he ngaahi mēmipa ʻo e fāmili Pētelí ʻi māmani lahi. ʻOku tokangaʻi ʻe he kōmití ni ʻa e fili mo hono fakaafeʻi ko ia ʻo e kau mēmipa foʻou ʻo e ngaahi fāmili Pētelí pea pehē ki hono tali ʻo e ngaahi fehuʻi fekauʻaki mo ʻenau ngāue Pētelí.

◼ KŌMITI PULUSI: ʻOku tokangaʻi ʻe he kōmití ni ʻa hono paaki, pulusi pea mo hono fakafolau ʻo e ngaahi tohi Fakatohitapú ki māmani lahi. ʻOkú ne tokangaʻi ʻa e ngaahi faiʻanga pulusí mo e ngaahi koloa ʻoku maʻu pea ngāueʻaki ʻe he ngaahi kautaha kehekehe ʻoku ngāueʻaki ʻe he Kau Fakamoʻoni ʻa Sihová. ʻOku tokangaʻi ʻe he kōmití ni hono levaʻi lelei ʻo e ngaahi tokoni fakapaʻanga ko ia ki he ngāue ʻo e Puleʻangá ʻi māmani lahí.

◼ KŌMITI NGĀUE: Ko kinautolu ʻi he kōmití ni ʻoku nau tokangaʻi ʻa e ngāue fakamalangá pea mo e ngaahi meʻa fekauʻaki mo e ngaahi fakatahaʻangá, kau tāimuʻá, kau mātuʻá, pea mo e kau ʻovasia fefonongaʻakí. ʻOkú ne tokangaʻi hono teuteu ʻo ʻEtau Ngāue Fakafaifekau ʻo e Puleʻanga pea mo hono vahe ki he kau ako ʻo e ʻapiako ko Kiliatí mo e Akoʻanga Ako Fakafaifekaú, haʻanau ngaahi vāhenga-ngāue hili ʻenau ʻosi mei he akó.

◼ KŌMITI FAIAKO: ʻOku tokangaʻi ʻe he kōmití ni ʻa e fakahinohino ʻoku ʻoatu ʻi he ngaahi ʻasemipilií, fakataha-lahí pea mo e ngaahi fakataha ʻa e fakatahaʻangá. ʻOkú ne fokotuʻutuʻu ʻa e ngaahi polokalama fakalaumālie ki he ngaahi mēmipa ʻo e fāmili Pētelí pea tokangaʻi foki ʻa e ngaahi ako kehekehe, hangē ko e Akoʻanga Kiliatí, pea mo e Ako Ngāue Tāimuʻá, kaeʻumaʻā hono teuteu ʻo e ngaahi polokalama hiki ongo mo e vitioó foki.

◼ KŌMITI FAITOHI: Ko e fatongia ia ʻo e kōmití ni ko hono tokangaʻi ʻa e fakalea ʻi he tohí ʻa e meʻakai fakalaumālie ke pulusi pea mo tufaki ki he fanga tokouá pea mo e kakaí foki. ʻOku ʻoatu ʻe he kōmití ni ʻa e ngaahi tali ki he ngaahi fehuʻi Fakatohitapú pea fakangofua ʻa e ngaahi naunau hangē ko e ngaahi ʻautilaine malangá mo e tulamá. ʻOkú ne toe tokangaʻi foki mo e ngāue liliu leá ʻa ia ʻoku fakahoko ʻi māmani lahí.

ʻOku fakatatau ʻe Paula ʻa e fakatahaʻanga ʻo e faʻahinga paní ki ha sino fakaetangata pea fakamamafaʻi ai ʻa e ngaahi feituʻu mahuʻinga ʻoku ʻi ai ʻa e mēmipa kotoa ʻo kau ai foki ʻenau ngāue fakatahá, ʻofá, mo e fāitaha ʻi hono fakahoko ko ia ʻo e ngāue naʻe tuku mai ʻe he ʻOtuá. (Loma 12:4, 5; 1 Kol.1Ko 12:12-31) ʻOku tokonaki mai ʻe he ʻUlú, ʻa Sīsū Kalaisi, ki he ngaahi mēmipa kotoa ʻo e sinó ʻa e meʻa ʻoku fiemaʻú ki ha fāitaha lelei, fepoupouaki, pea mo e fakahinohino Fakatohitapú foki. (Ef. 4:15, 16; Kol. 2:19) ʻI he foungá ni ʻoku fokotuʻutuʻu ai ʻa e Kulupu Pulé ke ne takimuʻa ʻi hono tataki kinautolu ʻe Sihova ʻaki ʻa e laumālie māʻoniʻoní.