“ʻOkú Ne Tokoniʻi Au ke Aʻu ki he Loto ʻo e Kakaí”
KO Porto Alegre, ko ha kolo tuʻu matāfanga ʻi Pelēsila fakatonga, naʻe talitali ai ʻi ha taimi ki muʻa ha konifelenisi fakavahaʻapuleʻanga fekauʻaki mo e ngaahi ʻīsiu fakasōsiale. Naʻe laui mano ʻa e kakai mei he ngaahi fonua ʻe 135 naʻa nau fakatefua ai ki he konifelenisí. Lolotonga ʻa e ngaahi taimi mālōloó, ko ha kulupu ʻo e Kau Fakamoʻoni mei ha fakatahaʻanga ʻi Porto Alegre naʻa nau fakaofiofi atu ki ha fuʻu tokolahi ʻo e kau fakafofongá ke vahevahe atu kia kinautolu ʻa e pōpoaki Fakatohitapu ʻo e Puleʻangá. Naʻe anga-fēfē ʻenau fetuʻutakí?
“Naʻa mau ngāueʻaki ʻa e kiʻi tohi Good News for People of All Nations,” ko e fakamatala ia ʻa Elizabete, ko ha tāimuʻa. Naʻá ne toe tānaki mai: “Ko e tokolahi ʻo e kau fakafofongá kuo teʻeki ai ke nau fanongo fekauʻaki mo e ongoongo lelei ʻo e Puleʻangá, ka naʻa nau tali lelei ʻemau pōpoakí. Naʻa mau talanoa mo e kakai mei Falanisē, Naisīlia, Polivia, Siaina, ʻInitia, mo ʻIsileli. Ki he kau fakafofonga ʻe niʻihi, naʻa mau maʻu ha ʻū tohi Fakatohitapu ʻi heʻenau leá tonu, ʻa ia naʻa nau tali fiefia.”
ʻI Mekisikou, ko ha tāimuʻa ʻoku hingoa ko Raúl, ʻokú ne toe ngāueʻaki ʻa e kiʻi tohi ko ení mo ha ngaahi ola lelei. ʻI ha taimi ki muʻa, naʻá ne fakaofiofi ai ki he tangata ʻAlepea taʻu 80 ʻa ia naʻe toki mole atu hono uaifí ʻi he maté. Hili hono lau ʻe he tangatá ʻa e peesi ko ia ʻi he kiʻi tohí ʻoku fakahāhā ai ʻa e pōpoakí ʻi he faka-ʻAlepeá, naʻá ne tō loʻimata ʻi he fiefia. Ko e hā hono ʻuhingá? Ko e talaʻofa ko ia ʻa e ʻOtuá ʻe ʻikai toe ʻi ai ha maté, hangē ko ia ʻoku fakahā ʻi he Fakahā 21:3, 4, naʻe maongo loloto kiate ia ʻi he taimi naʻá ne lau ai ia ʻi heʻene lea tuʻufonuá. ʻI ha toe taimi ʻe taha, lolotonga ʻa e faifakamoʻoni ʻikai ʻi he founga anga-mahení, naʻe fetaulaki ai ʻa Raúl mo ha tangata naʻe lea faka-Potukali. Ko e tangata foki ko iá naʻe toe mole ha taha naʻe ʻofa ai ʻi he maté—ko hono fohá. Naʻe ʻai ʻe Raúl ke ne lau ʻa e peesi lea faka-Potukalí ʻi he kiʻi tohí. Hili hono lau iá, naʻe fakahaaʻi ʻe he tangatá ʻokú ne loto ke ako lahi ange fekauʻaki mo e Tohi Tapú, pea naʻá ne tali ha ako Tohi Tapu.
Naʻe ngāueʻaki ʻe Raúl ʻa e Good News for People of All Nations ke faifakamoʻoniʻaki ki he faʻahinga ʻoku lea faka-Falanisē, Hinitī, Kōlea, Lūsia, Mike, Pēsia, Pilitānia, Sapoteki, Siaina, Siamane mo e faka-ʻAmīnia. ʻOkú ne pehē: “Kuó u toki sio ko e meʻa mahuʻinga moʻoni ke ngāueʻaki ʻa e meʻangāué ni ʻi heʻeku ngāue fakafaifekaú. ʻOkú ne tokoniʻi au ke aʻu ki he loto ʻo e kakaí neongo kapau ʻoku ʻikai te u lea ʻi heʻenau leá.”
ʻI he lahi mo lahi ange ʻa e kakai ʻoku nau folau ʻo nofo ʻi mulí, ʻoku tau maʻu ai ʻa e ngaahi faingamālie lahi ange ke tau hoko ʻo fetuʻutaki mo e faʻahinga ʻoku nau lea ʻi ha lea kehe. Te tau malava ai ke vahevahe ʻa e pōpoaki ʻo e Puleʻangá mo kinautolu ʻaki hono ngāueʻaki ʻa e kiʻi tohi Good News for People of All Nations. ʻOkú ke toʻotoʻo holo ia?
[Fakatātā ʻi he peesi 32]
Ko Raúl mo e kiʻi tohi ʻokú ne tokoniʻi ia ke aʻu ki he loto ʻo e kakaí