Ki he Kau Lautohí

Ko e makasini ʻokú ke lau he taimi ní naʻe kamata pulusi ia ʻi Siulai 1879. Kuo liliu e ngaahi meʻá talu mei ai pea pehē ki he makasini ko ení. Kamata ʻi he ʻīsiu ko ení, te ke fakatokangaʻi ha ngaahi liliu lahi ange ʻi he fokotuʻutuʻu ʻo e Taua Leʻo. Ko e hā ʻe kehé?

ʻI he ngaahi fonua lahi, ʻoku ʻalu ke tokolahi ange ʻa e kakai ʻoku nau maʻu fakamatala mei he ʻinitanetí pea ongoʻi fiemālie ʻi he foungá ni. Mei ha lomiʻi pē he netí, ʻe lava ke nau maʻu ʻa e ngaahi fakamatala ʻa ia ko e ʻInitanetí pē ʻoku ala maʻu aí. ʻOku lahi ʻa e ngaahi tohi, makasini mo e nusipepa ʻoku lava ke lau ʻi he ʻinitanetí.

ʻI he saiʻia ko eni ʻa e kakaí ke ngāueʻaki ʻa e ʻinitanetí, kuo mau fokotuʻu ʻemau Uepisaiti www.jw.org, ʻo ʻai ia ke fakamānako ange mo faingofua ange ki hono ngāueʻakí. Ko e kau ʻaʻahi ki he saití ʻe lava ke nau lau ʻa e ngaahi tohi ʻa ia ʻoku hā ai laka hake ʻi he ngaahi lea ʻe 430. Kae kehe, ʻoku kamata he māhiná ni, ko e ngaahi kupu ʻe niʻihi naʻe pulusi tuʻumaʻu ʻi heʻemau ngaahi makasiní ʻe ʻasi atu ia ʻi heʻemau Uepisaití pē.a

Koeʻuhi ʻe kamata ke lahi ange ʻemau ngaahi kupu ʻe pulusi atu ʻi he ʻinitanetí pē, ko e pulusinga ʻo e Taua Leʻo maʻá e kakaí ʻe holoki hifo ia mei he peesi ʻe 32 ki he 16, ʻo kamata ʻi he ʻīsiu ko ení. Kuo pulusi ʻa e Taua Leʻo ki he ngaahi lea ʻe 204. Ko e fokotuʻutuʻu fakanounou ko ení, ʻe faingofua nai he taimí ni ke liliu ʻa e makasiní ki he ngaahi lea lahi ange.

Ko ʻemau ʻamanakí ia ke hoko ʻa e ngaahi feʻunuʻaki ko ení ke ne ʻai kimautolu ke aʻu ki he kakai tokolahi ange mo e pōpoaki fakahaofi moʻui ʻo e Tohi Tapú. ʻOku mau fakapapauʻi ke hokohoko atu hono ʻomai ha tokonaki ʻaonga ʻo e fakamaama mo e fakamatala fakamānako—fakatouʻosi ʻi hono pulusí mo e ʻinitanetí—ke maʻu ʻaonga mei ai ʻemau kau lautohi tokolahi ʻa ia ʻoku nau fakaʻapaʻapaʻi ʻa e Tohi Tapú pea loto ke ʻilo ʻa e meʻa ʻoku akoʻi ʻe he Tohi Tapú.

Kau Faipulusí