ʻOkú Ke Manatuʻi?
Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
ʻI hono tokoniʻi fakalaumālie ʻe he ngaahi mātuʻa kuo hikí ʻenau fānaú, ko e hā ʻoku totonu ai ke nau fakakaukau fekauʻaki mo e leá?
ʻOku ngalingali ʻe ako ʻe he fānaú ʻa e lea ʻa e feituʻú ʻi he ʻapiakó pea ʻi honau ʻātakaí. ʻE lava ke ʻaonga ia ki ha kiʻi tama ke ne ʻilo ha lea laka hake ʻi he tahá. ʻOku totonu ke fakakaukau ʻa e mātuʻá ki he feituʻu ʻe mahinoʻi lelei taha ai ʻe he fānaú ʻa e moʻoní pea nau fakalakalaka fakalaumālié, ʻi he feohi mo ha fakatahaʻanga ʻoku ngāueʻaki ai ʻa e lea ʻa e feituʻú pe ko ha fakatahaʻanga ʻoku ngāueʻaki ai ʻa e lea ʻa e faʻahinga ʻoku hiki maí. ʻOku fakamuʻomuʻa ʻe he ngaahi mātuʻa Kalisitiané ʻa e ngaahi fiemaʻu fakalaumālie ʻenau fānaú ʻi heʻenau saiʻia fakafoʻituituí.—w17.05, p. 9-11.
ʻI he ʻeke ʻe Sīsū kia Pita: “ʻOkú ke ʻofa ʻiate au ʻo lahi hake ʻi he ngaahi meʻá ni?” ʻOku ʻuhinga ki he hā ʻa e “ngaahi meʻá ni?” (Sione 21:15)
ʻOku hā ngali naʻe ʻuhinga ʻa Sīsū ki he ika naʻe fokotuʻunga ofi aí/pe ko e pisinisi toutaí. Hili ʻa e pekia ʻa Sīsuú naʻe toe foki ʻa Pita ki heʻene ngāue ki muʻá—ʻa e toutaí. ʻOku totonu ke fakakaukauʻi ʻe he kau Kalisitiané ʻa e tuʻunga ʻoku ʻi ai ʻi honau lotó ʻi he ngāue paʻangá.—w17.05, p. 22-23.
Ko e hā naʻe kole ai ʻe ʻĒpalahame ki hono uaifí ke ne pehē ko iá ko hono tuofefine? (Sēn. 12:10-13)
Ko hono moʻoní, ko Selá ko e tuofefine tamai-taha ia ʻo ʻĒpalahame. Kapau naʻe pehē ʻe Sela ko iá ko hono uaifi, naʻe mei tāmateʻi ʻa ʻĒpalahame pea naʻe ʻikai mei lava ke fanauʻi mai ʻa e hako naʻe talaʻofa ʻe he ʻOtuá kiate iá.—wp17.3, p. 14-15.
Ko e hā ʻa e founga naʻe ngāueʻaki ʻe Elias Hutter ke tokoniʻi ʻa e faʻahinga naʻa nau loto ke ako ʻa e lea faka-Hepeluú?
Naʻá ne loto ke malava ʻa e kau akó ʻo fakafaikehekeheʻi ʻa e tupuʻanga ʻo e ngaahi foʻi lea faka-Hepelū ʻi he Tohi Tapú pea mo ha lea fakapipiki mei muʻa pe fakapipiki mei mui fekauʻaki mo ia. Ki he taumuʻa ko iá, naʻá ne pulusi ʻa e lea tefitó ʻi he faʻunga matolu ka ko e lea fakapipiki mei muʻá pe fakapipiki mei muí ʻo ʻikai ʻi he faʻunga matolu. ʻOku maʻu ʻa e founga meimei tatau ʻi he fakamatala ʻi lalo ʻi he New World Translation of the Holy Scriptures—With References.—wp17.4, p. 13-14.
Ko e hā ʻa e ngaahi meʻa tefito ʻoku totonu ke ne tākiekina ʻa e vakai ʻa ha Kalisitiane fekauʻaki mo hono tauhi ha meʻafana ke maluʻiʻaki ia mei he faʻahinga kehe ʻo e tangatá?
Ko e niʻihi eni: ʻOku vakai ʻa e ʻOtuá ki he moʻuí ʻoku toputapu. Naʻe ʻikai fakaʻaiʻai ʻe Sīsū ʻa hono kau muimuí ke nau toʻo heletā ko ha maluʻi. (Luke 22:36, 38) ʻOku fiemaʻu ke tau tuki ʻetau ngaahi heletaá ke hoko ko e ngaahi mataʻi-palau. ʻOku mahuʻinga ange ʻa e moʻuí ʻi he meʻa fakamatelié. ʻOku tau fakaʻapaʻapaʻi ʻa e konisēnisi ʻo e niʻihi kehé, pea loto ke hoko ko e faʻifaʻitakiʻanga lelei. (2 Kol. 4:2)—w17.07, p. 31-32.
Ko e hā ʻoku kehe ai ʻa e fakamatala ʻa Mātiu ki he tupu hake ʻa Sīsuú mei he fakamatala ʻa Luké?
ʻOku fakahangataha ʻa Mātiu kia Siosifa, hangē ko ʻene fakafeangai ki he feitama ʻa Melé mo e pōpoaki fakaʻotua ke ne hola ki ʻIsipite pea toki foki ki mui ai. ʻOku fakahangataha ange ʻa Luke kia Mele; ko e fakatātaá, ko ʻene ʻaʻahi kia ʻIlisapetí mo ʻene fakafeangai ʻi he nofo ai pē ʻa e kiʻi tamasiʻi ko Sīsuú ʻi he temipalé.—w17.08, p. 32.
Ko e hā ʻa e ngaahi meʻa ʻe niʻihi naʻe hao mai mei ai ʻa e Tohi Tapú?
Ko e ʻuhinga ʻo e ngaahi foʻi lea mo e kupuʻi lea naʻe ngāueʻaki ʻi he Tohi Tapú kuo liliu ʻi he faai mai ʻa e taimí. Kuo tākiekina ʻe he ngaahi meʻa fakapolitikale ʻoku hokó ʻa e lea anga-mahení. Kuo ʻi ai ʻa e fakafepaki ki hono liliu ʻa e Tohi Tapú ki he ngaahi lea anga-mahení.—w17.09, p. 19-21.
ʻOku ʻi ai hatau ʻāngelo tauhi?
ʻIkai. Naʻe lea ʻa Sīsū ki heʻene kau ākongá fekauʻaki mo e kau ʻāngelo ʻoku nau mamata ki he fofonga ʻo e ʻOtuá. (Māt. 18:10) Naʻá ne pehē ʻoku mahuʻingaʻia ʻa e kau ʻāngeló ʻi heʻene kau ākongá, ʻo ʻikai pehē ʻoku maluʻi fakaemana ʻe he kau ʻāngeló ʻa e tokotaha taki taha ʻo kinautolu.—wp17.5, p. 5.
Ko e hā ʻa e tuʻunga māʻolunga taha ʻo e ʻofá?
Ko e a·gaʹpe ʻa e tuʻunga māʻolunga taha ʻo e ʻofá ʻi heʻene makatuʻunga ʻi he ngaahi tefitoʻi moʻoni totonú. ʻE lava ke kau ki ai ʻa e ongoʻi māfana. Ka ʻoku tapua atu ai ʻa e ngaahi tefitoʻi moʻoni māʻolunga hangē ko e ngāue taʻesiokita maʻá e lelei ʻa e niʻihi kehé.—w17.10, p. 7.