Ko e Hā ʻa e Meʻaʻofa ʻe Lava Ke Tau Foaki kia Sihová?

NAʻE pehē ʻe Sīsū ʻi he taimi ʻe taha: “ʻOku ʻi ai ʻa e fiefia lahi ange ʻi he foaki atú ʻi he maʻu maí.” (Ngā. 20:35) Ko e foʻi moʻoni tefito ko iá ʻoku kaunga ki hotau vahaʻangatae mo Sihová. Ko e hā hono ʻuhingá? Kuo ʻomai ʻe Sihova ʻa e ngaahi meʻaʻofa lahi ʻokú ne ʻai kitautolu ke tau fiefia, ka ʻe lava ke tau maʻu naʻa mo e fiefia lahi ange ʻi hono foaki ha meʻaʻofa kia Sihova. Ko e hā ʻa e meʻaʻofa ʻe lava ke tau foaki kia Sihová? ʻOku pehē ʻi he Palōveepi 3:9: “Fakalāngilangiʻi ʻa Sihova ʻaki hoʻo ngaahi meʻa mahuʻingá.” Ko ʻetau “ngaahi meʻa mahuʻingá” ʻoku kau ki ai ʻa hotau taimí, hotau ngaahi talēnití, hotau mālohí, mo ʻetau koloa fakamatelié. ʻI heʻetau ngāueʻaki ʻa e ngaahi koloa ko iá ke ʻai ke laka ki muʻa ʻa e lotu moʻoní, ʻoku tau foaki ai ha meʻaʻofa kia Sihova, pea ʻi he fai peheé ʻoku tau maʻu ai ʻa e fiefia lahi.

ʻI heʻene hoko mai ki heʻetau koloa fakamatelié, ko e hā te ne tokoniʻi kitautolu ke ʻoua te tau tukunoaʻi ʻa hono foaki ʻa ʻetau meʻaʻofa kia Sihová? Naʻe tala ʻe he ʻapositolo ko Paulá ki he kau Kolinitoó ke nau “tuku mavahe ha meʻa” ko ha tokoni. (1 Kol. 16:2) Ko e hā ʻe lava ke ke faí kapau ʻokú ke loto ke maʻu ha fakamatala lahi ange fekauʻaki mo e ngaahi founga ʻo e tokoní ʻoku ala maʻu ʻi ho feituʻú? Kātaki ʻo sio ki he puha ʻi laló.

Ko e tokoni ʻi he ʻinitanetí ʻoku ʻikai malava ke fai ʻi he fonua kotoa pē. Kae kehe, ko e fakamatala ki he ngaahi founga kehe ʻo e tokoní ʻoku lava ke maʻu ia ʻi he peesi uepi ki he tokoní. ʻI he fonua ʻe niʻihi, ko ha fakamatala ʻi he peesi ko iá ʻoku ʻomi ai ʻa e tali ki he ngaahi fehuʻi ʻoku toutou ʻeke fekauʻaki mo e tokoní.