ʻE Malava Fēfē ke Tau Lavaʻi ʻEtau ʻItá?

¹ ʻOku tau moʻui ʻi ha māmani ʻitangofua. Ko e taʻefemahinoʻakí, fakamaau taʻetotonú, pe ngaahi ongoʻi feifeitamaki kehe ʻo e moʻui fakaʻahó ʻokú ne fakatupunga ha faingataʻa lahi. Ko ia ai, ʻoku totonu ke tau ako ke fiemālie. Te tau malava ʻo kamata ʻi he ʻaho taki taha ʻaki ha fakakaukau pau​—ʻo fakahā ʻa e faʻa-kātaki, anga-faingofua, mo e loto-fiefia. ʻOku fakahā mai kiate kitautolu ʻe he Tohitapú: “Ko ia ʻoku fakatotoka ki he ʻita ʻoku lelei hake ʻi ha fuʻu mafi: pea ko ia ʻoku puleʻi hono loto ʻi ha taha ʻoku hamu ha kolo.”​—Pal. 16:32.

² Ko e hā te tau malava ke fai kapau ʻe kamata ke tau ongoʻi ʻita? ʻI he lelei ange ke ʻoua te tau vave ke fakahā ʻa e ʻitá, ʻoku totonu ke tau fakakaukau ki ha meʻa ʻe malava ke iku ki ai mei he meʻa te tau faí. (Pal. 14:17) ʻI he tuʻunga ko ia ʻoku tau ʻita pea ʻikai te tau ʻilo pe ko e hā ʻa e ʻuhingá, ʻoku totonu ke tau anga-fakatōkilalo mo faitotonu ʻo kole ha tokoni. (Pal. 15:22) Ko e feinga ke mahino ʻa e ʻuhinga ʻo e angafai ʻa e niʻihi kehé, ʻe tokoni ia kiate kitautolu ke tau mapuleʻi ʻetau ngaahi ongoʻí.​—Pal. 19:11.

³ ʻI he tafaʻaki ʻe tahá, kapau ʻoku tau ʻai faainoa ha taha ke loto-mamahi, ʻoku totonu ke tau kole fakamolemole kiate ia. Ko e fakatātā, kapau ʻe haʻu ha taha ʻo malaki ho vaʻé, te ke hehema nai ke ke ʻita. Ka ʻi heʻene kole fakamolemolé, ʻe mole atu hoʻo ʻitá. ʻE kei mamahi pē nai ho vaʻé, ka naʻe fai ʻa e ʻapasia ki hoʻo totonú. ʻI he tuʻunga meimei tatau, ko e ngaahi tōʻonga leleí, fakataha mo e anga-fakaʻapaʻapá mo e loto-fiefiá, te ne fakaleleiʻi ʻa e loto-mamahí pea tauhi maʻu ʻa e vahaʻangatae lelei mo e niʻihi kehé.

⁴ ʻI he feangainga mo e tuʻunga ʻokú ne fakatupunga ʻiate kitautolu ke tau ongoʻi ʻitá, ʻe ʻaonga kiate kitautolu ke ʻilo ʻa e founga ke tau lea ʻo kau ki heʻetau ʻitá ʻo ʻikai ke ʻohofi ʻa e tokotaha ko ē. ʻOku ʻi ai ʻa e fuʻu faikehekehe lahi ʻi he vahaʻa ʻo e leá: “Fuʻu vale!” pe “Te u tukiʻi koe,” mo e lea pē ʻo pehē “ʻOku ou fuʻu loto-mamahi.” ʻOku ʻikai ke ʻaonga ʻa e lea ʻitá koeʻuhi ʻokú ne langaʻi ʻa e tokotaha kehé ke ne totongi ʻaki ʻa e kovi ʻa e kovi. (Pal. 15:​1, 18) Ko e tokolahi taha ʻo kitautolu ʻoku tau angaʻaki ke ongoʻi ʻita ʻi ha taimi. ʻOku fakahā ʻe he Tohitapú naʻa mo Sihova ʻokú ne ongoʻi ʻita. (Sēf. 2:​2, 3; 3:8) Ko ia, ko e ongoʻi ʻo e ʻitá ʻoku ʻikai ko ha angahala ia ʻiate ia.​—ʻEf. 4:​26, 27.

⁵ Ko ʻetau moʻui ʻo fakafehoanaki ki he Folofola ʻa e ʻOtuá ko e maluʻi pē ia ʻe taha kiate kitautolu ʻi he māmani fakamālohi ko ʻení. (Sāme 119:105) Kuo vavé ni ke fai ʻe he ʻOtuá ʻa e fakamaau ʻo e ngaahi puleʻangá. Lolotonga ʻo e taimi ko ʻení, ʻoku fiemaʻu ke tau fakapapau ke ʻoua te tau faʻifaʻitaki ki he ngaahi founga ʻo e māmani ʻitangofua ko ʻení. Ko hono mapuleʻi ʻetau ʻitá ʻe pau ʻene tokoni ke tau tauhi ʻa e vahaʻangatae lelei mo e niʻihi kehé pea ko e mahuʻinga taha ʻo e meʻá ni kotoa, te ne tokoniʻi kitautolu ke tau hokohoko atu ke maʻu ʻa e hōifua mo e tāpuaki meia Sihova.​—Sāme 119:165.