Fakahāhā ʻa e Taʻe Filifilimānako ʻi Heʻetau Ngāue Fakamalangá

¹ Naʻe pehē ʻe Pita: “ʻOku ʻikai ke filifilimanako ʻa e ʻOtua . . . ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ng. 10:​34, 35) ʻOku tau fakahoko ʻetau ngāue fakamalangá ʻi he ʻahó ni ʻi he ʻilo kakato ʻo e moʻoni ko ʻeni ʻoku fakahā mahino maí. Ko ia ai, ʻoku mahuʻinga ke tau fai ha faʻahinga feinga ke ikunaʻi ha taʻofiʻanga pē te ne fakafaingataʻaʻiaʻi ʻa ʻetau ʻave ʻa e ongoongo leleí ki he toko taha kotoa pē.

² ʻI heʻetau ngāue malanga mei he fale ki he fale ʻi ha ngaahi feituʻu ʻe niʻihi, ʻoku faʻa hoko ʻo tau fetaulaki ai mo e kakai ʻoku ʻikai te nau lea ʻaki pe mahino ki ai ʻa e lea ʻoku ngāueʻaki ʻi heʻetau fakatahaʻangá. ʻOku taʻofi ʻe he taʻe mahino fekauʻaki mo e leá ʻa e kakai ʻe niʻihi mei heʻenau maʻu kakato ʻa e ʻaonga ʻo e pōpoaki ʻo fekauʻaki mo e Puleʻangá ʻoku tau malangaʻi atú. ʻOku kau ki he faʻahingá ni ʻa kinautolu ʻoku tuli, ʻa ia ʻoku nau femahinoʻaki ʻi he lea ʻo fakatātāʻaki ʻa e nimá. Ko e hā ʻa e meʻa ʻe malava ke fai ke tokoni ke ikunaʻi ʻa e taʻe mahino fekauʻaki mo e leá ʻa ia ʻokú ne taʻofi kitautolu mei hono ʻave ola lelei ʻa e ongoongo leleí ki he kakai ko iá?

³ Naʻe ʻoatu ʻe he Sōsaietí ʻi he 1991 ʻa e foomu ko e S-70a, ko e Foreign Language Follow-up Slip, ki he ngaahi fakatahaʻanga kotoa pē ʻi he ʻIunaite Seteté. Ko e taumuʻa ʻo e foomu ko ʻení ke tokoni ke fakapapauʻi ko e kakai ʻoku ʻikai te nau lea ʻi he lea ʻoku ngāueʻaki ʻi he fakatahaʻangá ʻi he ngaahi feituʻu ʻoku nau nofo aí, fakakau ki ai mo e kakai ʻoku nau femahinoʻaki ʻi he lea ʻo fakatātāʻaki ʻa e nimá, te nau maʻu ʻa e faingamālie ke maʻu ʻa e pōpoaki fekauʻaki mo e Puleʻangá ʻi heʻenau lea totonu pē ʻanautolú.

⁴ ʻI haʻo fetaulaki mo ha taha ʻi he feituʻu ʻokú ke ngāue malanga aí ʻoku tuli pe ko ha taha ʻoku ʻikai ke mahino ki ai ʻa e lea ʻoku ngāueʻaki ʻi he fakatahaʻangá, ʻoku totonu ke tohiʻi ke mahino ʻi ha taha ʻo e ngaahi foomu ko ení. ʻOku totonu ke fai ʻeni neongo ʻoku ʻikai ke hā mei he toko taha ko iá ʻa e mahuʻingaʻia ʻi he moʻoní. ʻE ʻikai nai te ke lava ke maʻu ʻa e hingoa ʻo e toko taha ko iá, ka ʻoku totonu ke ke tohiʻi hono tuʻasilá mo e lea ʻokú ne ngāueʻakí. ʻE lava ke tuku ʻa e laʻi foomú ʻi he puha ʻoku tānaki ai ʻa e lipooti ʻo e ngāue fakamalangá ʻi he Kingdom Hall. ʻE tānaki leva ʻe he sēkelitalí ʻa e ngaahi foomú, ʻo ne vakaiʻi kinautolu pe ʻoku totonu mo mahino hono tohí, pea lī ia ki he fakatahaʻanga pe kulupu ofi taha ʻoku nau tokangaʻi ʻa e kakai ʻoku nau lea ʻi he lea ko ia ʻoku fakahaá.

⁵ ʻI he taimi ʻe niʻihi ʻe ʻikai fie maʻu ke fai ʻa e meʻá ni. Ko e fakatātā, ʻoku ngalingali ʻoku ʻilo ʻe he meimei kotoa ʻo e ngaahi fakatahaʻanga lea faka-Sepeni ʻi he ʻIunaite Seteté ʻa e feituʻu ʻoku nofo ai ʻa e kakai ʻoku lea faka-Sepeni ʻi honau vāhenga-ngāué. ʻI he tafaʻaki ʻe tahá, ko ha kakai ʻoku nau lea ʻi ha faʻahinga lea ʻe taha ʻoku nau nofo movetevete lahi nai. Ko e fakatahaʻanga pe kulupu ʻoku nau ngāueʻaki ha lea pehē ʻe fie mau nai ke nau ngāue ʻi he ngaahi feituʻu lahi mo mamaʻo ʻaupito pea te nau houngaʻia ki he tokoni ke ʻilo ʻa e feituʻu ʻoku nofo ai ʻa e kakai te nau malava nai ke fai ha tokoni ki aí.

⁶ Kapau ʻoku ʻikai ke ʻi ai ha fakatahaʻanga pe ha kulupu ʻi he feituʻu kotoa ko ia ʻoku malava ke nau fai ha fakamoʻoni ʻi he lea ko ia ʻoku fie maʻú, ʻe ʻi ai nai ha toko taha malanga ʻi ha taha ʻo e ngaahi fakatahaʻanga fakalotofonuá ʻokú ne ʻiloʻi ʻa e leá pea te ne malava ke fai ʻa e toe ʻaʻahi ko iá. Kapau ʻe ʻikai ke ʻi ai ha taha ʻokú ne lea ʻi he lea ko iá neongo kuo ʻosi ʻeke ange ki he ʻovasia ʻo e koló, ʻoku totonu leva ki he ngaahi tokoua fakalotofonuá ke nau fai ʻa e lelei taha te nau malavá ke fai ha fakamoʻoni ki he faʻahinga peheé. Kuo hoko ʻo ʻaonga lahi ʻa e polosiua ko e Moʻui Fiefia ʻI He Mamani ʻO Taʻengata! ʻi he ngaahi tuʻunga peheé.

⁷ ʻOku totonu ki he toko taha malanga taki taha ke ne tokanga ke ngāueʻaki ʻa e ngaahi foomu fekauʻaki mo e kau lea mulí ʻo ka fie maʻu. Kapau ʻoku ʻikai ke maʻu ʻe he fakatahaʻanga ʻa e foomu S-70a, ʻe lava leva ke tohiʻi ʻa e fakamatala ʻoku fie maʻú ʻi ha kiʻi laʻi pepa pea ʻoatu ia ʻo hangē ko ia kuo fakamatala ki ai ʻi ʻolungá. Ko hono fai ha feinga lahi ke aʻu ki he kakai kotoa ʻa e ongoongo leleí neongo ʻa e kehekehe ʻa e leá, ʻoku tau tapua atu ai ʻa e ʻofa ʻa Sihova ko hotau ʻOtuá, ʻa ia “ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”​—1 Tīm. 2:4.