Tokanga Telia Naʻa Hala ʻa e Anga-ʻOfá
1 Kuo ʻiloa ʻa e kakai ʻa Sihová ʻi heʻenau loto ke anga-ʻofa mo e nima-homo. ʻOku faʻa hā ia ʻi ha founga fakamatelie ʻi heʻetau faʻifaʻitaki ki he Samēlia anga-fakakaungāʻapi ʻa ia naʻe lea ʻa Sīsū ʻo fekauʻaki mo ia ʻi heʻene talanoa fakatātā fakaueʻiloto. (Luke 10:29-37) Ka, ko e niʻihi ko ia ʻoku ʻikai taau ke fai ha tokoni fakamatelie ki aí te nau feinga nai ke nau ngāuekoviʻaki ʻetau anga-ʻofá. Ko ia ai, ko ʻetau ʻofa ki he niʻihi kehé kuo pau ke mafamafatatau mo e “ʻilo kanokano mo e ongoʻi ʻo e totonu.”—Fili. 1:9.
2 ʻI Loto ʻi he Fakatahaʻangá: Ko e fakatātā, ʻe pehē nai ʻe ha toko taha kuó ne taʻe maʻu ha ngāue pe toe fakahā mo ha ngaahi ʻuhinga kehe ke ne kole ha tokoni. ʻI he taimi ʻe niʻihi ko e faʻahinga ia ko ʻení ʻoku ʻikai te nau kumi fakamātoato ki haʻanau ngāue ka ʻoku nau loto pē kinautolu ia ke tokonaki mai ʻe he niʻihi kehé ʻa e ngaahi meʻa ʻoku fie maʻu ki he moʻui ʻa kinautolú. ʻI he fekauʻaki mo e faʻahinga peheé naʻe tuʻutuʻuni ʻe he ʻaposetolo ko Paulá: “Ka ʻikai fie ngaue ha taha, pea ʻoua foki naʻa ne kai.”—2 Tes. 3:10.
3 “He ʻoku hokonoa” ha meʻa kiate kitautolu hono kotoa, ko ia kapau ʻoku tau fie maʻu ha meʻa fakamatelie, ʻo ʻikai “[haʻatau] meʻakai ki he ʻanai,” ʻoku totonu ke ʻoua te tau fuʻu hohaʻa fau ki ai, koeʻuhi he ʻoku tokonaki ʻe Sihova maʻanautolu ʻoku ʻofa kiate ia mo fai hono finangaló. (Koh. 9:11; Mt. 6:11, 31, 32) ʻOku ʻaonga nai ki he toko taha fie maʻu tokoní ke ne talanoa mo ha taha ʻo e kau mātuʻá. ʻOku ʻilo nai ʻe he kau mātuʻá ha ngaahi polokalama fakapuleʻanga kuo fokotuʻu ke fai ha tokoni pea te nau tokoni nai ke fakafonu ʻa e ngaahi foomú pe ʻoku nau ʻilo ʻa e ngaahi fie maʻu ki he ngaahi polokalama peheé. ʻI ha tuʻunga pē, ʻe lava ke fakafuofua ʻe he kau mātuʻá ʻa e ngaahi tuʻunga ʻo e toko taha taki taha ʻoku kole tokoní mo fakapapauʻi ʻa e meʻa ʻe faí.—Fakafehoanaki mo 1 Tīmote 5:3-16.
4 Kau Kākā ʻi he Fefonongaakí: ʻOku hokohoko mai hono maʻu ʻe he Sosaieté ha ngaahi fakamatala ʻo kau ki he niʻihi ʻi he ngaahi fakatahaʻangá naʻe kākaaʻi ʻi he paʻanga pe ngaahi meʻa fakamatelie ʻe he kau kākā ʻi he fefonongaakí. ʻOku totonu ke ʻoua te tau ʻohovale ʻi he meʻa ko ʻení, koeʻuhi naʻe fakatokanga ʻi he Tohi Tapú “ko e kakai kovi mo fakahekeheke te nau fakaaʻau atu mei he kovi ki he kovi, heʻenau kākāʻi ʻa e kakai kehe, pea kākāʻi mo kinautolu.” (2 Tīm. 3:13) ʻOku faʻa taku ʻe he kau kākā ko ʻení ʻoku nau tukuvakā pea ʻoku nau fie maʻu ha paʻanga koeʻuhi ke totongi ʻaki ha meʻakai mo ha meʻa ke nau foki ai ki honau ʻapí. Neongo ʻe ongo moʻoni nai, ka ʻi he taimi lahi taha ko ʻenau fakangalingali pē ka ʻoku ʻikai ko e Kau Fakamoʻoni ʻa Sihova ʻa kinautolu ia.
5 Kapau ʻe kole ha tokoni ʻe ha sola, ʻoku fakapotopoto ke kumi faleʻi mei ha taha ʻo e kau mātuʻa ʻi he fakatahaʻangá, ʻa ia ʻe lava ke takimuʻa ʻi hono fakapapauʻi pe ko e tokoua ʻa e toko taha ko iá. ʻOku totonu ke fai ha telefoni ki ha taha ʻo e kau mātuʻa ʻi he fakatahaʻanga ko ia ʻoku taku ʻoku kau ki ai ʻa e toko tahá koeʻuhi ke fakapapauʻi ʻa e tuʻunga ʻo e toko taha ko iá. Ko e ngaahi tokoua mo e tuofāfine moʻoni ʻoku hoko ha fie maʻu taʻe ʻamanekina kiate kinautolú ʻe mahino pē ia kiate kinautolu ʻa e faʻahinga fakaʻekeʻeke ʻoku fai ko ha maluʻi ia kiate kinautolu hono kotoa ʻoku kaunga ki aí. ʻI he tafaʻaki ʻe tahá, ʻe fakaeʻa ai ʻa e kau kākaá ʻi he sivi fakalautelau peheé. ʻOku ʻikai fie maʻu ke fuʻu hulu ʻa ʻetau huʻuhuʻu kiate kinautolu hono kotoa pē ʻoku ʻikai te tau ʻiloʻí ka kuo pau ke tau tokanga telia naʻa ko e kau kākā anga-fulikivanu.—Sio foki ki he km 9/80, peesi 2.
6 Naʻe faleʻi mai ʻe he Tuʻi poto ko Solomoné: “ʻOua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai.” (Pal. 3:27) ʻI heʻetau ngāueʻaki ʻa e ʻiloʻilo fakapotopotó, ʻe lava ke tau hokohoko atu ʻa ʻetau fakahā ʻa e manavaʻofá ka kei tokanga telia naʻa hala ʻa e anga-ʻofá.