Fakahā ʻa e Fakaʻatuʻi ki he Niʻihi Kehé​—Konga 1

¹ ʻOku tau fiefia ke sio ki he lakalakaimonū ʻo e kakai ʻa Sihová, ʻa ia ko hono olá ʻoku tupulekina ai ʻa e lahi ʻo e ngaahi fakatahaʻangá. ʻI he ngaahi feituʻu ʻe niʻihi, tautautefito ki he ngaahi kolo lalahi angé, ʻoku fakangatangata pē ʻa hono ngāueʻaki ʻa e ngaahi naunau ʻi he Kingdom Hall, ʻi he taimi ʻe niʻihi ʻoku fiemaʻu ki he ngaahi fakatahaʻangá ke nau ngāueʻaki ʻa e Kingdom Hall tatau pē. ʻI he tuʻunga ko ʻení ʻoku fiemaʻu ʻa e fakaʻatuʻi makehe ʻiate kinautolu kotoa pē ʻoku kaunga ki aí.

² Ko e fakatahaʻanga taki taha ʻokú ne ngāueʻaki ʻa e Kingdom Hall ʻoku totonu ke tauhi ia ʻi ha tuʻunga maʻa mo maau ki he ngaahi tokoua te nau hoko mai. ʻOku totonu ke fokotuʻu fakalelei ʻa e ngaahi seá, ʻoku totonu ke tuku fakalelei ʻa e ngaahi tohi ʻi he kānitá, ʻoku totonu ke tānaki ʻa e ngaahi meʻa fakafoʻituitui ʻoku ngalo ʻi he Kingdom Hall. ʻOku totonu ke ʻi ha tuʻunga maau ʻa e ngaahi fale mālōloó, fakapapauʻi ko e koá, ngaahi tauvelí, mo e pepa ki he fale mālōloó ʻoku feʻunga pea huaʻi mo e ngaahi ʻaiʻanga vevé.

³ ʻI ha mei kamata ha fakataha ʻe taha kuo fakahokohoko, ʻoku ʻikai totonu ki he faʻahinga naʻa nau kau ki he fakataha ki muʻá ke nau kei nofo fuoloa ai ʻo ʻikai ha ʻuhinga lelei, he ʻe fakaʻefiʻefi ia ki he ngaahi teuteu ki he fakataha hono hokó. Ko e hoko atu ʻo e fetalanoaʻaki fakasōsialé ko hono ola nai ʻe feʻefiʻefihi ai ʻa e loki hūʻanga ʻo fakatuaiʻi ʻa e ngaahi tokouá ʻi hono fokotuʻutuʻu maau ʻa e ngaahi meʻa ki he fakataha hoko mai. Ko e tauʻanga meʻalele takatakai ʻi he Kingdom Hall ʻoku fakangatangata nai, pea ko e anga-ʻofa ia ke ʻalu leva koeʻuhí ke ʻi ai ha tauʻanga maʻa kinautolu ʻoku hoko mai. ʻI he tafaʻaki ʻe tahá, ko kinautolu ʻoku nau kau ki he fakataha hoko maí ʻoku totonu ke ʻoua ʻe fuʻu tōmuʻa ʻenau haʻú, ʻo fakatupu ai ʻa e feʻefiʻefihi ʻi he loki hūʻangá, loki tukuʻanga valá, mo e tauʻanga meʻalelé.

⁴ ʻI he kau ki ai ha ngaahi fakatahaʻangá, ʻoku ʻi ai ha fiemaʻu makehe ki he fetokoniʻaki vāofi ʻi hono fai ʻa e ngaahi fokotuʻutuʻu ki hono fakamaʻa fakauike ʻa e Kingdom Hall. ʻOku faʻa taufetongi pē ʻa e ngaahi fakatahaʻangá ʻi ha vahaʻa taimi. ʻI he aʻu ki he taimi ʻo hoʻo fakatahaʻangá, fakapapauʻi ʻoku fai maʻu pē mo fakaʻāuliliki ʻa e fakamaʻá. Pea ʻoku ʻikai ke ʻi ai ha meʻa ke lāunga ai ʻa e ngaahi fakatahaʻanga kehe ʻoku nau ngāueʻaki ʻa e holó.

⁵ ʻI he taimi ki he taimi ʻoku ʻi ai ʻa e fiemaʻu ki he fakatahaʻanga taki taha ke liliu ʻa ʻene taimi fakatahá, ʻo hangē ko e ʻaʻahi ʻa e ʻovasia fakafeituʻú. Kapau ʻe laveʻi ha fakataha ʻe taha, ʻoku totonu ki he kau mātuʻá ke nau fakahā kei taimi ki muʻa ki he fakatahaʻanga ʻe tahá koeʻuhi ke nau fakahā ki heʻenau kau malangá ʻi he faingamālie vave tahá. Kapau ʻoku ʻi ai ha meʻa kuo fakamafaiʻi pea fakahokohoko ʻo hangē ko e Ako Ngāue Tāimuʻa, ko ha fakataha ʻa e kau mātuʻa fakafeituʻu, pe ko ha mali, ko e ngaahi fakatahaʻanga kehe pe ko ha kau ʻovasia fakafeituʻu ʻe lave ki ai ʻoku totonu ke fakahā kei taimi ki ai; koeʻuhi ke ʻoua te nau fakahokohoko ke ngāueʻaki ʻa e Kingdom Hall ʻi he taimi tatau.

⁶ ʻI ha holo ʻoku ngāueʻaki ʻe ha ngaahi fakatahaʻanga mei he ngaahi feituʻu kehekehe ʻoku totonu ki he kau ʻovasia fakafeituʻu ʻoku nau ʻaʻahi ki he ngaahi holo ko ʻení ke nau feʻilongakiʻaki ʻa e ngaahi ʻaʻahi kuo fakahokohoko ke faí. Ko e toki liliu pē ʻi he miniti fakaʻosí pe ngaahi faingataʻaʻia kehe ʻe lava ke hoko ia ʻi ha fakahokohoko ʻe ha ongo ʻovasia fakafeituʻu ʻa e ʻaʻahi ʻi he uike tatau pē.

⁷ Ko e fakaʻatuʻi anga-ʻofa ki he niʻihi kehé, fetuʻutaki lelei, palani kei taimi ki muʻa, mo e fetokoniʻakí ʻe tokoni ia ke tauhimaʻu ʻa e felāveʻi māfana ʻi he ngaahi fakatahaʻangá pea mo fakapapauʻi ai “ko e meʻa kotoa pe ke fai ke tāu mo māu.”​—1 Kol. 14:40.