Fakahā ʻa e Fakaʻatuʻí ki he Niʻihi Kehé​—Konga 2

¹ ʻOku tau loto ke tauhi maʻu ha felāveʻi lelei mo e kakai ʻoku nau nofo ʻi hotau feituʻú, ʻo aʻu ki he tuʻunga ʻoku taaú. ʻOku fiemaʻu ki he meʻá ni ke tau fakahā ʻa e fakaʻatuʻi mo tokaʻi ʻa ʻenau ngaahi totonú mo e ngaahi ongoʻí.

² ʻOku ʻiloa ʻa e Kau Fakamoʻoni ʻa Sihová ʻi he ʻulungaanga lelei. Ko hotau ngaahi tuʻunga ʻi he teuteú mo e anga ʻoku taau ʻi hotau feituʻú, ʻi he akoʻangá, pea ʻi he ngāueʻangá, pea pehē ki heʻetau ngaahi fakatahá, kuo hoko ia ko e kaveinga ʻo e ngaahi fakaongoongolelei lahi.​—Sio ki he Taua Leʻo ʻo Sune 15, 1989, peesi 20.

³ Ko e moʻoni, ko e ʻulungaanga leleí ʻoku kau ki ai ʻa e ngaahi meʻa lahi, ʻo hangē ko e faitotonú, ngāue mālohí, mo e ngaahi ʻulungaanga leleí. ʻOku kau foki ki ai mo e anga-fakaʻapaʻapa kiate kinautolu ʻoku nofo ʻi he feituʻu takatakai ʻi hotau Kingdom Hall. ʻE taʻetokaʻi nai ʻa ʻetau ʻulungaanga fakaʻotuá ʻi he ngaahi tafaʻaki kehé ʻo kapau ʻe ʻikai te tau fakaʻatuʻi ki hotau ngaahi kaungāʻapí. Naʻe enginaki ʻe Paula kiate kitautolu “ke tāu hoo mou ulugaaga moe ogoogolelei.”​—Fili. 1:​27, PM.

⁴ ʻI he taimi ki he taimi, kuo fai ha ngaahi lāunga ʻe he faʻahinga ʻoku nau nofo ofi ki ha ngaahi Kingdom Hall ʻe niʻihi koeʻuhi he ʻoku nau pehē ʻoku ʻikai ke fakahā ʻa e fakaʻatuʻí ʻe kinautolu ʻoku nau kau ki he ngaahi fakatahá. ʻOku totonu ke fakaʻehiʻehi ʻa e ngaahi tokouá mo e ngaahi tuofāfiné mei he fakatahataha ʻi he ʻaluʻanga tangata ʻi muʻa ʻi he Kingdom Hall ʻo fai ai ʻa e ngaahi fetalanoaʻaki toʻotoʻoa ʻoku lava ke ongoʻi mai ia ʻe he ngaahi ʻapi ofi maí. ʻOku ʻikai totonu ke fakaʻatā ʻa e fānaú ke nau lele ki loto mo lele ki tuʻa ʻi he Kingdom Hall. Ko hono haʻaki taʻefakakaukauʻi ʻa e ngaahi matapā ʻo e kaá pe ngaahi meʻa fakaleá ʻe lava ke fakahohaʻasi ai ʻa e feituʻu ko iá. ʻOku ʻikai ke hā lelei ʻa e fakatahaʻangá ʻi he ʻulungaanga pehē ní. ʻOku mahuʻinga foki ke tau tauhi ʻa e ngaahi tuʻutuʻuni kotoa pē ki he fefonongaʻaki ʻi he taimi ʻokú te fakaʻuli ai.​—Loma 13:​1, 2, 5.

⁵ Ko e ngaahi kaá ʻoku ʻikai totonu ke tau ia ʻi ha ʻapi ʻo ha taha kehe pe ha ngaahi feituʻu ʻe fakaʻefiʻefi ai ki he feʻaluʻaki ʻi he halá pe tapuniʻi ai ʻa e ngaahi afeʻangá.

⁶ ʻOku enginakiʻi kitautolu ʻe he Tohi Tapú ke “mou fai kotoa pe ke ongoongolelei ai ʻa e ʻOtua,” pea ʻoku kau ai mo e fakahā ʻa e fakaʻatuʻi ki he kakai ʻo tuaʻaá. (1 Kol. 10:​31-33) Kapau te tau ‘tokanga ki he meʻa ʻoku mahuʻingaʻia ai ʻa e niʻihi kehé,’ ʻe ʻikai te tau kaunoa taʻefakakaukauʻi ʻi honau ʻapí. (Fili. 2:4) Te tau toe fakaʻehiʻehi foki ʻi he kaunoa mei he ngaahi ngāue fakapisinisi ʻa e kau tangata fakatau fakalotofonuá.

⁷ Ko e fakahā ʻa e fakaʻatuʻí ki he niʻihi kehé​—fakatouʻosi ʻi loto ʻi he fakatahaʻangá mo tuaʻaá​—ko e fakahāhā ia ki tuʻa ʻa e ongoʻi ʻo hotau lotó. Ko e meʻa ʻoku tau fai mo leaʻakí ʻoku totonu ke hā mei ai ʻoku tau ‘ʻofa ki hotau kaungāʻapi ʻo hangē pe ko kitautolú.’​—Mt. 7:12; 22:39.