Fakamanatu ki he Sēkelitalí mo e ʻOvasia Ngāué
Ko ha fanongonongo ʻi he tatau ʻo Fepueli ʻo e Ko ʻEtau Ngāue Fakafaifekau ʻo e Puleʻanga ʻi he taʻu taki taha ʻoku fakahanga ia ki he sēkelitalí mo e ʻovasia ngāué ke “fakamanatu ʻa e ngāue ʻa e kau tāimuʻa tuʻumaʻú kotoa.” Ko e hā ʻa e taumuʻa hono fai ʻo e fakamanatú ni? ʻOku fakapapauʻi nai ai pe ko hai ʻokú ne fiemaʻu ha tokoni ke aʻusia ʻa e houa ʻoku fiemaʻú ki muʻa ke ngata ʻa e taʻu fakangāué.
Ko e kau tāimuʻa tuʻumaʻú naʻe fiemaʻu ke nau lavaʻi ʻa e houa ʻe 1,000 ʻi he taʻu taki taha ʻi he ngāue fakamalangá. ʻI he ngataʻanga ʻo Fepuelí, ʻoku ʻiloʻi ai ʻe he kau tāimuʻa ʻe niʻihi ʻoku ʻikai ke aʻu ʻenau houa naʻe fiemaʻú, pea hoko ai ʻa e meʻá ni ʻo fakalotosiʻi. Ko e kau mātuʻá ʻoku nau faʻa tokoni lahi ki he kau tāimuʻá, ʻo ʻoange kiate kinautolu ʻa e fakalototoʻa mo e ngaahi fokotuʻu ʻaonga. ʻE lava ʻa e meʻa ko iá ke tokoni ki he kau tāimuʻá ke nau lavaʻi ʻenau ngaahi fiemaʻu ki he taʻú pe ʻikai nai ke nau fakangatangata ʻenau ngāue tāimuʻá.
ʻE houngaʻia moʻoni ʻa e kau tāimuʻá ʻi he tokanga loto-moʻoni ʻa e kau mātuʻá ʻi he meʻá ni. ʻE toe maʻu foki ai ʻe he fakatahaʻangá ʻa e ʻaonga ʻaki ʻenau maʻu ʻa e kau tāimuʻa ʻoku nau fiefia ʻi heʻenau ngāue fakamalangá, ʻo nau tauhi maʻu ai pē ʻenau anga-tonú ki heʻenau ngāue kuo vaheʻí.