Fai ʻa e Meʻa Kotoa Pē ke Lāngilangiʻia Ai ʻa e ʻOtuá

¹ He meʻa fakatupu ongoʻi foʻou ē ke feohi mo siʻotau ngaahi tokouá mo e tuofāfiné! (1 Kol. 16:​17, 18) ʻOku tau fai ʻeni ʻi he ngaahi fakatahá, ʻi he ngaahi ʻasemipilií, ʻi he ngaahi fakataha-lahí, pea ʻi he ngāue fakamalangá. ʻOku tau toe feohi foki ʻi he ngaahi meʻa ʻoku hoko ʻikai ʻi he founga mahení, ʻo hangē ko e taimi ʻoku ʻaʻahi mai ai haʻatau kau fakaafe ki hotau ʻapí. ʻI he fai peheé, ʻoku tau fakahā ai ʻa e anga-ʻofa ʻi he talitali kakaí mo e fefakalototoʻaʻakí. (Loma 12:13; 1 Pita 4:9) ʻI he taimi ʻoku fokotuʻutuʻu ai ʻa e ngaahi talitali ʻi he malí, tauhi maʻu ʻi he fakakaukaú ʻa e faleʻi lelei ʻi he Watchtower ʻo ʻEpeleli 15, 1984.

² Fokotuʻutuʻu Maau ʻa e Ngaahi Meʻa Fakasōsialé: Tatau ai pē pe ʻoku tau ‘kai pe ko ʻetau inu, pe ko ʻetau fai ha meʻa,’ ʻoku totonu ke tau “fai kotoa pe ke ongoongolelei ai ʻa e ʻOtua.” (1 Kol. 10:​31-33) ʻOku ʻikai ke fakatokangaʻi ʻa e akonaki ko ʻení ʻe he niʻihi, pea ʻoku hokohoko atu ʻa e tupu ʻa e ngaahi palopalemá koeʻuhi ko e ngaahi fakatahataha fakasōsiale ʻoku fuʻu tokolahi ki hano tokangaʻi lelei. Ko e ngaahi fakatātā ʻe niʻihi, ko ha kakai ʻe lau teau ʻoku fakaafeʻi ki ha ngaahi fakatahataha fakasōsiale ʻa ia ʻoku fai ai ʻa e ngaahi fakafiefia fakamāmaní ʻo fuʻu hulu. ʻI he taimi ʻe niʻihi ʻoku kole kiate kinautolu ʻoku ʻalu ki aí ke totongi ʻa e huú pe ngaahi totongi kehe. Ko e ngaahi fakatahataha peheé ʻoku faitatau vāofi ʻaupito mo e ngaahi meʻa fakamāmaní, ko e laumālie ʻa ia ʻoku ʻikai ke fehoanakimālie mo e tuʻunga taaú pea mo e ngaahi tefitoʻi moʻoni ʻi he Tohitapú.​—Loma 13:​13, 14; ʻEf. 5:​15-20.

³ Kuo maʻu ʻa e līpooti ko e tokolahi ʻo e Kau Fakamoʻoní kuo nau fakatahataha ʻi he ngaahi fale totongi ʻa ia ko e fakafiefia aí ʻoku ʻikai lelei pea fakamāmani pea ʻoku ʻikai ke tokangaʻi lelei. Kuo faʻa fai ʻi he ngaahi hōtelé pe feituʻu ʻeveʻevá ʻa e ngaahi meʻa meimei tatau kuo fakahāhaaʻi ko e fakaʻosinga uike ʻa e “Kau Fakamoʻoni ʻa Sihová.” Koeʻuhi ko e faingataʻa ʻo hono tokangaʻi ʻo e kulupu lalahi peheé, kuo tupu ai ʻa e ngaahi palopalema. Kuo iku ai ʻi ha ngaahi taimi ki he longoaʻa, ʻai ai ʻa e ngaahi inu ʻolokaholó ʻo fuʻu hulu, ʻo aʻu ai pē ki he fai ʻo e tōʻonga taʻetaaú. (ʻEf. 5:​3, 4) ʻOku ʻikai ke fakalāngilangiʻi ʻa Sihova ʻi he ngaahi fakatahataha fakasōsiale ʻoku hoko ai ʻa e ʻulungaanga peheé. Ko hono kehé, ʻoku nau ʻomai ai ʻa e luma ki he hingoa lelei ʻo e fakatahaʻangá pea fakatūkiaʻi ai ʻa e niʻihi kehé.​—1 Kol. 10:​23, 24, 29.

⁴ ʻOku fakalototoʻaʻi ʻa e kau Kalisitiané ke fakahaaʻi ʻa e anga-ʻofa ʻi he talitali kakaí, ka ʻoku totonu ke fakahanga ʻa e fakamamafá ki he fetalanoaʻaki fakalaumālié. (Loma 1:​11, 12) ʻOku faʻa sai tahá ʻa e ngaahi fakatahataha iikí. ʻOku pehē ʻi he tohi ko e Our Ministry ʻi he peesi 135-136: “ʻI he ngaahi taimi, ʻoku fakaafeʻi nai ai ha ngaahi fāmili ki ha ʻapi ki he feohi faka-Kalisitiane. . . . ʻOku ʻuhinga lelei, ko kinautolu ʻoku nau fai ʻa e talitalí ʻi he ngaahi meʻa peheé ʻoku totonu ke nau ongoʻi fakafoʻituitui ʻoku ʻiate kinautolu ʻa e meʻa ʻoku faí. ʻI hano tuku ʻi he fakakaukaú ʻa e meʻa ko ʻení, ko e kau Kalisitiane ʻiloʻiló kuo nau sio ko e potó ia ʻa hono fakangatangata ʻa e lahi ʻo e kulupu peheé pea mo e fuoloa ʻo e ngaahi fakatahatahá.” Naʻe fakahaaʻi ʻe Sīsū ʻoku ʻikai fiemaʻu ʻa e ngaahi teuteu lahi peheé kapau ko ʻetau taumuʻá ke fakalototoʻaʻi fakalaumālie ʻa hotau ngaahi kaumeʻá.​—Luke 10:​40-42.

⁵ Ko e meʻa lelei ia ke fakahā ʻa e anga-ʻofa ʻi he talitali kakaí ki he kaungā Kalisitiané. Kae kehe, ʻoku ʻi ai ha faikehekehe lahi ʻi he fakatahataha siʻisiʻi pē ʻi hotau ʻapí pea mo ha meʻa ʻoku ʻai ʻo fuʻu hulu ʻo hā ai ha laumālie fakamāmani ʻi ha fale totongi. ʻI he taimi ʻokú ke fakaafeʻi ai ʻa e niʻihi kehé ke hoko ko hoʻo kau fakaafé, ʻoku totonu ke ke fakapapauʻi ko koe ʻoku ʻi ai ʻa e fatongia kakato ki he meʻa ko ia ʻoku faí.​—Sio ki he Taua Leʻo ʻo ʻEpeleli 1, 1993, peesi 28-31.

⁶ Ko e moʻoni, kuo tāpuakiʻi ʻe Sihova ʻa kitautolu ʻaki ʻa e fetokouaʻakí ʻa ia ʻoku tau maʻu mei ai ʻa e fakalototoʻa fakatupu ongoʻi foʻou ʻokú ne ueʻi kitautolu ke hokohoko atu ʻi he ngaahi ngāue leleí. (Mt. 5:16; 1 Pita 2:12) ʻI hono fakahāhā ʻa e ʻulungaanga maau mo e fakaʻatuʻi ʻi he ngaahi meʻa ʻoku fai fakasōsialé, te tau ʻomai ai maʻu pē ʻa e lāngilangi ki hotau ʻOtuá pea hoko ʻo langa hake ki he niʻihi kehé.​—Loma 15:2.