Fakahīkihikiʻi Fakaʻaho ʻa Sihova
1 Ko hotau ʻOtua ko Sihová, ko ha Tokotaha-Fakatupu fakaofo, anga-ʻofa, ko e Matavai ia ʻo e moʻui mo e fiefia kotoa pē. ʻI he vakai ki heʻene tuʻu-ki-muʻá, ʻokú ne taau moʻoni ki ha fakahīkihiki mei heʻene fakatupú hono kotoa pē. ʻOku tau loto ke leaʻaki fakafoʻituitui ʻo hangē ko ia naʻe fai ʻe he tokotaha-tohi-sāmé: “Pea ʻe fakautuutu ʻeku fakamālō [“fakahīkihikiʻi,” NW] kiate koe. ʻE aʻau ʻe hoku ngutu hoʻo ngaahi fai maʻoniʻoni, ʻe ʻosi ʻa e ʻaho mo ʻeku lau hoʻo ngaahi fakamoʻui.” (Sāme 71:14, 15) Ke fai ʻa e meʻa ko ʻení, kuo pau ke tau kumi ha ngaahi founga ke fakahīkihikiʻi ai ʻa Sihova ʻi he ʻaho ki he ʻaho pea mo ueʻi ke lea lelei ʻo kau kiate ia, ʻene māʻoniʻoní, mo ʻene ngaahi tokonaki ki he fakamoʻuí.
2 ʻOku fokotuʻu ʻe he muʻaki kau Kalisitiané ha faʻifaʻitakiʻanga lelei ʻi he fakahīkihikiʻi ʻo Sihová. ʻI he lave ki he toko 3,000 naʻe papitaiso ʻi he Penitekosí, ʻoku tau lau ʻi he Ngāue 2:46, 47 (PM): “Bea naa nau alu loto taha ki he fale lotu lahi i he aho kotoabe, . . . O fakamalo [“fakahīkihikiʻi,” NW] ki he Otua, bea ofeina e he kakai kotoabe. Bea nae fakaului e he Eiki kiate kinautolu i he aho kotoabe akinautolu kuo fakamoui.” Naʻa nau ako ʻa e ngaahi moʻoni fakaofo ʻo fekauʻaki mo Sihova mo ʻene Mīsaiá. Ko ʻenau loto-fiefiá naʻe pipihi, ʻo kei fakalototoʻaʻi ai ʻa e niʻihi kehé ke fanongo mo ako pea mo fakahīkihikiʻi ʻa Sihova.
3 ʻOku Ala Maʻu ʻa e Ngaahi Faingamālie ʻi he ʻAho Kotoa Pē: ʻI he ʻahó ni ʻoku ʻilo ʻe he tokolahi ʻoku lava ke nau fakahīkihikiʻi fakaʻaho ʻa Sihova ʻaki ʻa e fakamoʻoni ʻi he founga ʻikai anga-mahení. ʻOku tokoni kiate kinautolu ʻa e teuteu ki muʻá ke ola lelei ange. Ko ha tuofefine naʻá ne fakapapauʻi ke kau ʻi he fakamoʻoni ʻi he founga ʻikai anga-mahení naʻá ne ʻilo naʻe fahiʻi ʻe ha tokotaha ia ʻa e ongo sioʻatá ʻo hū fakamālohi ki heʻene kaá. Naʻá ne telefoni ki ha ngāueʻanga ki he maumaú, pea naʻá ne teuteu ke fai ha fakamoʻoni ki he tokotaha ngāué. Naʻe kau ki heʻene teuteú ʻa e fai ha lotu ʻo kole ʻa e fakahinohino meia Sihova. Ko hono olá, naʻá ne faifakamoʻoni ki he tokotaha ngāué ʻi ha houa pea naʻá ne ʻoange kiate ia ʻa e tohi Moʻui Taʻengata.
4 Naʻe toutou feʻiloaki ha tuofefine ʻe taha mo ha kaungāʻapi ʻi he lolotonga ʻo ʻena fakaluelaloʻi ʻa ʻena kulií. ʻI he lolotonga ʻo ʻena toe fetaulakí, naʻá na fetalanoaʻaki fakamātoato ʻo fekauʻaki mo e ngaahi palopalema ʻo e moʻuí, pea naʻe iku atu ki ha toe ngaahi fetalanoaʻaki lahi ange. Faifai atu pē, naʻe kamata ha ako Tohitapu. ʻOku fakatupu tokangá, naʻe fakamoʻoniʻi ki mui ʻe he kaungāʻapí naʻe ʻikai te ne mei fiefanongo ki he Kau Fakamoʻoni ʻa Sihová kapau naʻa nau haʻu ki hono matapaá, koeʻuhi he ʻoku ʻikai ke tui ia ki he ʻOtuá pe ko e Tohitapú.
5 ʻOku malava ʻe he niʻihi ke fai ha fakamoʻoni ki he kau tangata tuʻuaki koloá pe niʻihi kehe ʻoku haʻu ki honau matapaá. Ko ha tuofefine ʻi ʻAilani naʻe ʻaʻahi ki ai ha tangata tuʻuaki ʻo e maluʻi moʻuí. Naʻá ne fakamatalaʻi ʻokú ne hanga atu ki he kahaʻú ke maʻu ai ʻa e moʻui taʻengatá. Naʻe hoko ia ko e fakakaukau mātuʻaki foʻou ki he tangatá ni ʻa ia naʻe tauhi hake ia ko ha tokotaha Katolika Loma. Naʻá ne tali ʻa e tohi Moʻui Taʻengata, ʻalu ki he fakatahá ʻi he uike hono hokó, pea naʻá ne loto ke fai haʻane ako Tohitapu. ʻI he taimí ni ko e tangata tuʻuaki koloa ko ʻení ko ha tokoua kuo ʻosi papitaiso.
6 ʻOku totonu kiate kitautolu hono kotoa ke tau tokanga ki he ngaahi faingamālie ke fakahīkihikiʻi fakaʻaho ai ʻa Sihova. ʻOku ʻaonga ke tuku ʻa e ngaahi makasiní pe ngaahi tulekí ʻi ha feituʻu ʻoku lava ke sio ki aí pea ʻe faingofua ke tuʻuaki ki he kau ʻaʻahí. ʻI he ngaahi feituʻu ʻe niʻihi ko ha taimi siʻi ʻokú ke nofo ai ʻi ha sea mālōlōʻangá te ke maʻu nai ai ʻa e ngaahi faingamālie ke faifakamoʻoni ki he niʻihi kehé ʻa ia ʻoku nau nofo hifo ʻo mālōlō ʻi ha ngaahi miniti siʻi pē. Ko e kau talavou Fakamoʻoni ʻe niʻihi ʻi he ʻapiakó ʻoku nau tuku ʻa e ngaahi tohi faka-Tohitapu ʻi honau tesí ko ha founga ia ke kamata ai ha fetalanoaʻaki mo ha tokotaha ʻokú ne fakatokangaʻi ia mo ʻeke ha ngaahi fehuʻi. ʻAi ʻi ho ʻatamaí ha Konga Tohitapu ʻe taha pe ua ʻoku lava ke ke ngāueʻakí. Kole kia Sihova ke tokoni kiate koe. ʻE tāpuakiʻi koe ʻi hoʻo fai peheé.—1 Sione 5:14.