Fakamālōʻia ʻa Sihova ʻi he “ʻAho Kotoa Pe”

¹ ʻOku ʻi he Sāme 145:​2 ha talaʻofa ʻa ia naʻe fai ʻe Tēvita kia Sihova: “Ko e ʻaho kotoa pe te u fakamaloʻia ʻa e ʻAfiona; pea te u fakalangilangiʻi ho huafa, ʻo lauikuonga pea taʻengata.” ʻOku tau toe maʻu ʻa e ʻuhinga ke fakamālōʻia pea mo fakahīkihikiʻi ʻetau Tamai fakahēvaní! Ka ʻe lava fēfē ke tau faʻifaʻitaki ki he faʻifaʻitakiʻanga ʻa Tēvitá ʻi hono hakeakiʻi ʻa e tuʻunga-hau ʻo Sihová ʻi he “ʻaho kotoa pe”?

² Fakafonu Hotau Lotó ʻAki ʻa e Houngaʻia kia Sihova: Ko hono ako maʻu pē ʻa e Folofola ʻa e ʻOtuá ʻoku fakaloloto ange ai ʻetau houngaʻia ki he meʻa kuo fai ʻe Sihová, ʻokú ne lolotonga faí, pea mo ia te ne fai maʻatautolú. ʻI he tupulekina ʻetau houngaʻia ki heʻene ngaahi ngāue fakaofó, ʻe fonu ai hotau lotó fekauʻaki mo ʻene tokanga anga-leleí. (Sāme 145:7) Te tau fakahīkihikiʻi loto-fiefai ai ʻa Sihova ʻi he ngaahi tuʻunga kotoa pē.

³ Fakahīkihikiʻi ʻa Sihova ʻi he Fetalanoaʻaki Fakaʻahó: ʻI he taimi ʻoku tau fetalanoaʻaki ai mo e kaungāʻapí, kaungāakó, kaungāngāué, pea mo e niʻihi kehe ʻoku tau feʻiloaki fakaʻahó, ʻoku tau maʻu nai ha ngaahi faingamālie ke fakahā atu ai ʻetau ʻamanakí kiate kinautolu. ʻOku fakahā nai ʻe ha kaungāʻapi ʻa e hohaʻa ʻo kau ki he faihia ʻi he koló; ko ha kaungāako ʻoku hoko nai ʻo puputuʻu ʻo kau ki he ngāuehalaʻaki ʻo e faitoʻo kona tapú pe ʻulungaanga taʻetaaú; ko ha kaungāngāue te ne fakahā nai ha fakakaukau ʻo kau ki he ngaahi fekīhiaki fakapolitikale ʻe niʻihi. ʻE lava ke tau tuhu ki he ngaahi talaʻofa pea mo e ngaahi tefitoʻi moʻoni ʻi he Folofola ʻa e ʻOtuá ʻa ia ʻoku hā ai ʻa e ʻalunga totonu ke tau fai he taimí ni pea mo e fakaleleiʻanga tuʻuloa ki he ngaahi palopalemá ni. Ko e ngaahi lea pehē ʻoku leaʻaki ʻi he “taimi totonu” ʻe lava ke hoko ko ha tāpuaki!​—Pal. 15:23.

⁴ Lea ʻo Kau kia Sihova ʻi he Taimi Kotoa Pē: Ko e tokotaha ʻoku houngaʻia loloto kia Sihová ʻokú ne loto ke fakahā atu ʻa e ongoongo leleí ki he niʻihi kehé ʻi he lahi taha ʻe malavá. (Sāme 40:​8-​10) ʻI he meʻá ni ʻoku totonu ke tau ʻeke hifo kiate kitautolu, ‘ʻOku ou fai kotoa ia ʻo fakatatau ki hono fakangofua ʻe he tuʻunga ʻoku ou ʻi aí?’ Ko e tokolahi kuo nau fai ha ngaahi feʻunuʻaki feʻungamālie ʻo nau lava ai ke nau hoko ko e kau tāimuʻa tuʻumaʻu. Kapau ʻoku ʻikai malava ke fakahoko ia ʻi he tuʻunga lolotongá, ʻe lava ke tau kau ki he tāimuʻa tokoni? Koeʻuhi ko e vave mai ʻa e faʻahitaʻu Fakamanatú ko ha taimi ia ke fakalahi ʻa e ngāué, ko e māhina ko Maʻasi mo ʻEpelelí ʻe hoko ia ko ha taimi lelei ke fakalahi atu ai ʻetau ngāué ʻaki ʻa e tāimuʻa tokoní.

⁵ Tokoniʻi ʻa e Faʻahinga Foʻoú ke Kau mo Kitautolu ʻi Hono Fakamālōʻiaʻi ʻa Sihová: Ko hono kātoangaʻi ʻa e Fakamanatu ʻo e pekia ʻa Sīsuú ʻoku fakamanatu mai maʻu ai pē kiate kitautolu ʻa e ngaahi ʻuhinga ke fakafetaʻi ai kia Sihova pea mo fakahīkihikiʻi Hono huafá. Ko e taimi lelei ʻaupito ʻeni ke fakalototoʻaʻi ai ʻetau kau ako Tohitapú ke kau mo kitautolu ʻi hono talaki fakahāhā ʻa e tuʻunga-tuʻi ʻo Sihová. Enginakiʻi kinautolu ke fakakaukau mo lotu maʻu pē ki he meʻa ʻoku fakahā ʻi he palakalafi 7-9 ʻi he peesi 173-175 ʻi he tohi ko e ʻIlo ʻA Ia ʻOku Taki Atu ki he Moʻui Taʻengatá. Kapau ʻoku nau taau, ʻoku ʻikai ke ʻi ai ha ʻuhinga ke nau toumoua ai koeʻuhi pē ko e siʻi ʻenau taukeí. Ko e kau taukei ʻi he malangá ʻe lava ke nau fakahā kiate kinautolu ʻa e founga ʻo hono fai ʻa e ngāue malangaʻi ʻo e Puleʻangá. Kapau ko e kau foʻoú ʻoku lava ke nau maʻu ha loto-toʻa ke leaʻaki ʻa e ongoongo leleí ʻe lava ke nau loto-maʻu ʻe tokoniʻi kinautolu ʻe Sihova.​—Ng. 4:​31; 1 Tes. 2:2.

⁶ ʻOku tau ʻomai ha ngaahi ʻaonga tuʻuloa kiate kitautolu pea pehē ki he niʻihi kehé ʻi he taimi ʻoku tau kumi ai ke fakamālōʻia ʻa Sihova ʻi he ʻaho kotoa pē.