Fanongonongo
◼ Tohi ke tuʻuaki ʻi Sanuali: Ko ha fanga kiʻi tohi motuʻa ange ʻe tolu ʻoku maʻu nai ʻi he sitoka ʻa e fakatahaʻangá, kau ai ʻa e “Vakai! ʻOku Ou Fakafoʻou ʻAe Meʻa Kotoa Pe” mo e Nofo ʻAmanaki ki he Maama Foʻou Maʻoniʻoni, lolotonga ʻoku kei ʻi he sitoká. Fepueli: Ko Hono ʻAi Hoʻo Moʻui Fakafāmilí ke Fiefia. Maʻasi: ʻIlo ʻA Ia ʻOku Taki Atu ki he Moʻui Taʻengatá. ʻEpeleli: Ko e ngaahi tatau tāutaha ʻo e Taua Leʻo mo e Awake! ʻI he feituʻu kuo toutou ngāueʻí, ʻe lava ke ngāueʻaki nai ʻa e polosiua foʻou, Ko e Hā ʻOku Fiemaʻu ʻe he ʻOtuá Meiate Kitautolú?
◼ ʻI he Fakataha Ngāue ʻo e uike ʻo Sanuali 6, ko e kau malanga ʻosi papitaiso kotoa pē te nau ʻi ai te nau maʻu ʻa e tatau ʻo e kaati Advance Medical Directive/Release mo e Identity Card ki heʻenau fānaú.
◼ Kamata ʻi Maʻasi, ko e malanga foʻou maʻá e kakaí ki he kau ʻovasia fakafeituʻú ko e “Ngāueʻaki ʻa e Akó ke Fakahīkihikiʻi ʻa Sihova.”
◼ ʻOku totonu ki he ngaahi fakatahaʻangá ke fai ha ngaahi fokotuʻutuʻu ke faingamālie ʻa hono kātoangaʻi ʻa e Fakamanatu ʻi he taʻu ní ʻi he Sāpate, Maʻasi 23, ʻi he hili e tō ʻa e laʻaá. Neongo ʻe kamata tōmuʻa ange ʻa e malangá, ko hono tufa ʻo e mā mo e uaine ʻo e Fakamanatú ʻoku totonu ke toki kamata pē ia ʻi he hili e tō ʻa e laʻaá. Vakai ki he ngaahi maʻuʻanga fakamatala ʻea fakalotofonuá ke fakapapauʻi ʻa e taimi tō ʻa e laʻaá ʻi ho feituʻú. Koeʻuhi ʻe ʻikai ke fai ha ngaahi fakataha kehe tuku kehe pē ʻa e ngāue fakamalangá ʻi he ʻaho ko iá, ʻoku totonu ke fai ha ngaahi feʻunuʻaki feʻungamālie ki he Ako Taua Leʻo ke fai ʻi ha taimi kehe. ʻE fiemaʻu ki he kau ʻovasia fakafeituʻú ke feʻunuʻaki ʻenau taimi-tēpile ki he uiké ʻo fakatatau ki he ngaahi tuʻunga ʻi he feituʻú. Neongo ʻoku lelei ki he fakatahaʻanga taki taha ke fai pē ʻene kātoanga Fakamanatú, ʻoku ʻikai nai malava pehē maʻu ai pē. ʻI he ʻi ai ha ngaahi fakatahaʻanga ʻoku nau ngāueʻaki ʻa e Fale Fakatahaʻanga tatau pē, mahalo ko ha fakatahaʻanga ʻe taha pe lahi ange ʻe lava ke nau ngāueʻaki ha fale kehe ʻi he efiafi pē ko iá. ʻOku totonu ke ʻoua ʻe fuʻu tōmui ʻa hono kamata ʻa e Fakamanatú ʻo faingataʻaʻia ai ʻa e kakai mahuʻingaʻia foʻoú ke haʻu ki ai. ʻOku totonu ke ʻoua ʻe fuʻu vāofi ʻa e taimi-tēpilé ʻo ʻikai ha taimi ia ki muʻa mo e ʻosi ʻa e kātoangá ke talitali ai ʻa e kau ʻaʻahí, fai ʻa e ngaahi fokotuʻutuʻu ke hokohoko atu ʻa e tokoni fakalaumālie ki he kau mahuʻingaʻiá, pe ko hono fai ha fefakalototoʻaʻaki. ʻI he ʻosi ha lave fakaʻāuliliki ki he ngaahi meʻá kotoa, ʻoku totonu ki he kau mātuʻá ke nau fili pe ko e hā ʻa e ngaahi fokotuʻutuʻu ʻe tokoni lelei taha kiate kinautolu te nau haʻu ki he Fakamanatú ke maʻu ʻa e ʻaonga kakató mei ai.
◼ Ko e malanga makehe maʻá e kakaí ki he faʻahitaʻu Fakamanatu ʻo e 1997 ʻe fai ia ʻi he Sāpate, ʻEpeleli 6. ʻE toki tufa atu ʻa e ʻautilainé. Ko e ngaahi fakatahaʻanga ko ia ʻoku fai ki ai ʻa e ʻaʻahi ʻa e ʻovasia fakafeituʻú, pe ha ʻasemipilī fakafeituʻu, pe ko ha ʻasemipilī ʻaho makehe ʻi he fakaʻosinga ʻo e uike ko iá ʻe fai ʻa e malanga makehé ʻi he uike hono hoko maí. ʻOku ʻikai totonu ki ha fakatahaʻanga ke ne fai ʻa e malanga makehé ki muʻa ʻi ʻEpeleli 6.
◼ ʻOku totonu ki he kulupu ʻo e kau mātuʻá ke nau tokanga ko e ngaahi fokotuʻutuʻu ʻoku hoko haké ʻoku fiemaʻu ia ʻi he taimi ʻoku kau ai ha fakatahaʻanga ki he ngaahi ʻasemipilī ʻi honau feituʻú: ʻI he taimi ʻoku fokotuʻutuʻu ai ha polokalama ʻasemipilī ʻaho makehe, ʻoku totonu ki he fakatahaʻangá ke ne fai kotoa ʻa e ngaahi fakataha angamaheni ki he uiké, tuku kehe ʻa e Malanga Maʻá e Kakaí mo e Ako Taua Leʻo ʻe kaniseli ia. ʻI he fokotuʻutuʻu ke kau ki ha ʻasemipilī fakafeituʻú, ʻe kaniseli leva ʻe he fakatahaʻangá ʻa e Akoʻanga Fakafaifekau Fakateokalatí mo e Fakataha Ngāué; ko e Ako Tohi pē ʻa e Fakatahaʻangá ʻe fai ʻi ho feituʻú he lolotonga ʻo e uike ko iá.