Fanongonongo

◼ Tohi ke tuʻuaki ʻi Maʻasi: ʻIlo ʻA Ia ʻOku Taki Atu ki he Moʻui Taʻengatá. ʻEpeleli mo Mē: Ko e ngaahi tatau tāutaha ʻo e Taua Leʻo mo e Awake! ʻI he ngāue he lolotonga ʻo e uiké pea ʻi he feituʻu kuo toutou ngāueʻí, ʻe lava ke ngāueʻaki nai ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? Sune: ʻIlo ʻA Ia ʻOku Taki Atu ki he Moʻui Taʻengatá. Tokanga taha ki hono kamata ha ngaahi ako Tohitapu.

◼ ʻOku totonu ki he ʻovasia tauhí pe ko ha tokotaha kuó ne fili ke ne ʻaotitaʻi ʻa e fakamatala paʻanga ʻa e fakatahaʻangá ʻi Maʻasi 1 pe faingamālie vave taha hili pē iá. Fai ha fanongonongo ki he fakatahaʻangá ʻi he hili ʻa e lava ʻo e ngāue ko ʻení.

◼ Ko e malanga fakahāhā makehe ki he faʻahitaʻu Fakamanatu ki he taʻu ní ʻe fai ia ʻi he ngaahi fakatahaʻanga lahi ʻi he Sāpate, ʻEpeleli 6. ʻOku fakakaveinga ʻa e malangá ko e “Tauhi ke Maʻa mei he Ngaahi ʻUli ʻo e Māmaní.” ʻOku totonu ke tau ʻi ai kotoa, pea ʻoku totonu ke tau tokoniʻi ʻa e faʻahinga mahuʻingaʻia naʻa nau haʻu ki he Fakamanatú ke nau haʻu ki he malanga ko iá. Ko e meʻa ʻoku tau fanongo ki aí ko e moʻoni ʻe hoko ia ʻo ne fakafoʻou ʻetau fakapapauʻi ke fakahōifua ki he ʻOtuá.

◼ ʻI he kolo kotoa pē, ʻi he ngaahi taimi kehekehe he lolotonga ʻo e taʻú, ʻoku ʻi ai ʻa e ngaahi ʻaho mālōlō fakamāmani ʻoku mālōlō ai ʻa e fānaú mei he akó pea ʻatā ai mei he ngāue fakamāmaní. ʻOku ʻi ai ʻa e ngaahi faingamālie lelei ʻaupito ki he fakatahaʻangá ke fakalahi ʻa e kau ki he ngāue fakafaifekaú. ʻOku totonu ke ʻilo ʻe he kau mātuʻá ʻa e taimi ʻoku hoko ai ʻa e ngaahi meʻá ni pea ʻai ke ʻilo lelei ʻe he fakatahaʻangá ki muʻa ʻa e ngaahi fokotuʻutuʻu ko ia kuo ʻosi fai ki he faifakamoʻoni fakakulupu he lolotonga ʻa e ngaahi taimi mālōloó.