ʻAmelika Tokelau ko e Faiʻanga ʻo e Ngaahi Fakataha-Lahi Fakavahaʻapuleʻanga ʻi he 1998

Hangē ko ia naʻe fanongonongo ʻi he Tokonaki, ʻOkatopa 5, 1996, ʻi he fakataha fakataʻu ʻa e Watch Tower Bible and Tract Society of Pennsylvania, ʻoku fokotuʻutuʻu ʻe he Kulupu Pulé ke fai ha ngaahi fakataha-lahi fakavahaʻapuleʻanga he lolotonga ʻo e 1998. Fakataha mo e ngaahi fakataha-lahi fakavahe angamahení, ʻe fai ha ngaahi fakataha-lahi fakavahaʻapuleʻanga ʻi ʻAmelika Tokelau pea pehē ki ʻAfilika, ʻĒsia, ʻIulope, ʻAmelika Latina, feituʻu Kalipiané, mo e Pasifiki Sauté.

Ko e niʻihi ʻo e ngaahi fakataha-lahi makehé ni ʻe fai ia ʻi ʻAmelika Tokelau, pea ʻe fakaafeʻi ki ai ʻa e kau fakafofonga mei he feituʻu takatakai ʻi he māmaní. Pehē foki, ʻoku ʻamanekina ʻe ʻi ai ʻi he ngaahi fakataha-lahi fakavahaʻapuleʻangá ni ʻa e kau misinalé. Ko e kau misinale pea mo e niʻihi kehe ʻi he ngāue makehe ʻi he vāhenga mulí ʻoku nau taaú ʻe fakaafeʻi ke nau ʻi ha taha ʻo e ngaahi fakataha-lahí ni ʻi honau fonuá pe ofi ki ai.

ʻE ʻoatu ʻe he vaʻá ʻa e fakahinohino ki he ngaahi fakatahaʻangá fekauʻaki mo e fakataha-lahi fakavahaʻapuleʻanga ʻa ia ʻe fakaafeʻi ki ai ʻa e kau malangá. ʻE ʻoatu ʻa e fakamatala fekauʻaki mo e ʻaho pea mo e ngaahi fokotuʻutuʻu ʻoku fai ki he kau fakafofonga kuo filí. Ko e kau malanga ʻoku nau fakakaukau ke fakafonu ʻa e ngaahi tohi kole ke fili ko ha fakafofongá ʻoku nau loto nai ke kamata hono tānaki ʻenau paʻangá ʻi he fakatuʻotuʻa atu ki he ngaahi meʻa makehé ni.