Ko e Faʻahinga Taʻumotuʻá ʻOku Nau Malanga ʻo ʻIkai ke Foʻi
1 ʻI he hoholo ʻa e kakaí ʻo motuʻá, ko e tokolahi ʻo kinautolú ʻoku nau sio atu ke mālōlō mei heʻenau ngāue fakamāmani tuʻumaʻú pea fiefia ʻi ha moʻui tauʻatāina he lolotonga ʻo e toenga ʻo honau ngaahi taʻú. ʻOku nau ongoʻi nai kuo nau fai ha ngāue lahi feʻunga pea ʻoku taau ke nau maʻu ha mālōlō. Pe ko ʻenau fiemaʻu nai ke nau fiefia ʻi he moʻuí ki he ngataʻanga ʻo ʻenau moʻuí.—Luke 12:19.
2 ʻI he tuʻunga ko e kau sevāniti fakatapui ʻa Sihová, ʻoku tau maʻu ʻe kitautolu ha vakai ia ʻoku kehe ki he moʻuí. ʻOku tau ʻilo ʻoku ʻikai ha mālōlō ia mei he ngāue ʻa e ʻOtuá. Ko ʻetau fakakaukaú ʻoku pau koeʻuhí he ʻoku tau hanganaki tauhi atu ke “aʻu ki he moʻui taʻengata.” (Siu. 21) Ko e ngaahi taʻu ʻo e ʻiló mo e taukei kuo tānaki maí ʻe ʻai ke lelei ange nai ai ʻa e ʻiloʻilo mo e faʻa fakakaukau ʻa ha taha. ʻE malava ai heni ki ha taha ke hoko ʻo poto ange pea mo mafamafatatau pea ke ne fakahāhā ha houngaʻia loloto ange ki he moʻuí. Ko e kotoa ʻo e ngaahi ʻulungaanga ko ʻení ʻoku hoko ia ʻo lelei ki ha taha ʻi hono tuʻunga ko ha faifekau ʻo e ongoongo leleí.
3 Ko e hoholo ʻo motuʻá ʻoku ʻikai ko ha meʻa ʻo e langa fakaesino pē; ʻoku toe kau ai ʻa e vakai fakaefakakaukau ʻa ha taha. Kapau ʻokú ke ʻamanekina ke moʻui fuoloa pea ʻokú ke feinga ke kei hā talavou ʻi hoʻo sio ki he kahaʻú, ʻe lahi nai hoʻo faingamālie ke fakatou maʻu ai kinaua. ʻE lava ke fakalahi atu ʻe he kakai taʻumotuʻá ʻenau moʻuí ʻaki hono fakatupulekina ʻenau ʻilo fakalaumālié pea vahevahe ia mo e niʻihi kehé.—1 Kol. 9:23.
4 Ongo Fakatātā Moʻoni ʻo e Moʻuí: ʻI hono taʻu 86, naʻe pehē ai ʻe ha tuofefine ʻe taha: “ʻI he taimi naʻá ku fakalaulauloto ai ki he ngaahi taʻu ʻe 60 kuo maliu atú talu mei heʻeku ako ʻa e moʻoní, ko e talaʻofa papau ʻa e ʻOtuá naʻe hoko ia ʻo hā maʻalaʻala ʻi hoku lotó. ʻIo, ko Sihová te ne ngāue mateaki ki he faʻahinga ʻoku nau mateakí ʻo ne ʻai ai ke tau utu ʻa e fiefia lahi.” (Sāme 18:25) Naʻe manatuʻi ʻe ha tokoua ʻe taha ʻa e founga naʻe mate ai ʻa hono uaifí ko ha meʻa fakaʻohovale fakamamahi kiate ia, hili iá, naʻe kovi ʻaupito ʻa ʻene tuʻunga moʻui leleí. Naʻá ne pehē: “Ka, ʻi he anga-ʻofa ʻa Sihová, naʻá ku toe ake feʻunga ai ke u malava ʻo hū ki he ngāue tāimuʻá ʻi he ongo taʻu ʻe ua ki muí. Ko ha fakamālō lahi ē kia Sihova koeʻuhi ko e lava ke u toe moʻui lelei fakataha mo e tupulekina ʻi he ngāue fakamalangá!”
5 Ko ha fakaongoongoleleiʻi lahi ē ko e tokolahi ʻo e faʻahinga taʻumotuʻá ʻoku nau fakapapauʻi ke hokohoko atu ke malanga ki he lahi taha ʻoku malava ʻe honau tuʻunga moʻui leleí mo e mālohí—ʻo ʻikai foʻi! ʻOku nau maʻu ʻa e ʻuhinga lelei ke kalanga ai: “ʻE ʻOtua, kuo ke akoʻi au talu ʻeku siʻi; pea kuo u fakaha hoʻo ngaahi ngaue fakaofo ʻo aʻu ki he taimi ni.”—Sāme 71:17.