“Ko Sihova ko Hoku Tokoni”
1 ʻI he taimi naʻe fekauʻi atu ai ʻe Sīsū ʻa ʻene ʻuluaki kau ākongá, naʻá ne tala ange kiate kinautolu: “Vakai, ʻoku ou tuku atu kimoutolu ke mou hange ko e fanga sipi ʻi he lotolotonga ʻo e fanga ulofi.” (Mt. 10:16) Naʻe uesia ai kinautolu ke hoko ʻo manavasiʻi pea nau holomui? ʻIkai. Naʻa nau ngāueʻaki ʻa e ʻulungaanga naʻe fakahā ki mui ʻe he ʻaposetolo ko Paulá ʻi he taimi naʻá ne tala ange ai ki he kaungā Kalisitiané: “ʻOku tau malohi ai ke lea ʻo pehe, Ko e ʻEiki [“Sihova,” NW] ko hoku tokoni; ʻe ʻikai te u manavahe: ko e ha tū ha meʻa ʻe fai kiate au ʻe ha tangata?” (Hep. 13:6) Naʻa nau fiefia ke lau kinautolu ʻoku taau ke ngaohikoviʻi koeʻuhi ko e huafa ʻo Sīsuú, pea naʻa nau hokohoko atu ʻo ʻikai ke foʻi ʻi he faiako mo e talaki ʻo e ongoongo leleí.—Ng. 5:41, 42.
2 ʻI he ʻahó ni ko e ngāue fakamalangá ʻi māmani lahi kuo mei ngata. Hangē ko ia naʻe kikiteʻi ʻe Sīsuú, ʻoku tau hoko ʻo fehiʻanekina ʻe he kotoa ʻo e ngaahi puleʻangá. (Mt. 24:9) Ko ʻetau ngāue fakamalangá kuo fakafepakiʻi mo manukiʻi, pea ʻi he ngaahi konga ʻe niʻihi ʻo e māmaní, kuo hoko ia ʻo tapui ai. Kapau naʻe siʻi ʻetau tuí, ʻe lava ke tau ongoʻi manavahē. Kae kehe, ʻi hono ʻiloʻi ko Sihova ko hotau Tokoní ʻokú ne fakaivifoʻou kitautolu pea ʻai ke tau mālohi ke kītaki.
3 Ko e loto-toʻá ko e anga ia ʻo e hoko ʻo mālohi, taʻemāluʻia, loto-lahi. Ko e fehangahangai ia ʻo e manavahē, ilifiangofua, loto-siʻi. Naʻe fiemaʻu maʻu pē ki he kau ākonga ʻa Sīsuú ha loto-toʻa ke kātaki. ʻOku mātuʻaki fiemaʻu ia kiate kitautolu ke hao ai mei he hoko ʻo loto-foʻi ʻi he ngaahi ʻulungaanga mo e ngaahi tōʻonga ʻo ha māmani fakafepaki ki he ʻOtuá. Hono ʻikai fakalototoʻa kiate kitautolu ke fakakaukau atu ki he faʻifaʻitakiʻanga haohaoa ʻa Sīsuú, ko ha tokotaha ikuna ʻo e māmaní! (Sione 16:33) Manatuʻi foki, ko e kau ʻaposetoló naʻa nau fehangahangai mo e ngaahi ʻahiʻahi fakamamahi naʻa nau fakahā taʻemāluʻia: “ʻOku totonu pe ke fai ki he pule ʻa e ʻOtua ʻi he pule ʻa e tangata.”—Ng. 5:29.
4 Ko Kitaua ʻOku ʻIkai ko e Haʻa Holomui: ʻOku totonu ke tau feinga ke tauhi maʻu ha fakakaukau pau ki heʻetau ngāué. (Hep. 10:39) Manatuʻi maʻu pē ko Sihova ʻokú ne fekau atu kitautolu ko ha fakahāhā ʻo ʻene ʻofa mo e faimeesi ki he kotoa ʻo e faʻahinga ʻo e tangatá. ʻOku ʻikai ʻaupito te ne kole ki heʻene kau sevānití ke nau fai ha faʻahinga meʻa ʻoku ʻikai ke ʻi ai hano taumuʻa ʻaonga. Ko e meʻa kotoa pē kuo vaheʻi mai kiate kitautolu ke faí ʻe hoko foki ia ko e lelei fakaʻaufuli maʻá e faʻahinga ʻoku nau ʻofa ki he ʻOtuá.—Loma 8:28.
5 Ko ha fakakaukau fakatuʻamelie te ne tokoniʻi kitautolu ke tau hanganaki kumi ki he faʻahinga hangē ha sipí ʻi hotau feituʻú. ʻE lava ke tau fakakaukau atu ki he loto-noa ʻoku fakahāhā ʻe he kakaí ko ha fakahaaʻi ia ʻo ʻenau fakatuʻatamaki mo e ʻikai ha ʻamanaki. ʻAi ke ueʻi kitautolu ʻe heʻetau ʻofá ke tau hoko ʻo manavaʻofa mo kātaki. ʻI he taimi kotoa pē ʻoku tau tuku ai ha ngaahi tohi pe ʻilo ha mahuʻingaʻia lahi ange, ko ʻetau taumuʻá ke fai leva ha toe ʻaʻahi pea langaʻi hake ha mahuʻingaʻia. ʻOku ʻikai totonu ke veiveiua ʻetau fakakaukau ke kamata ha ako Tohitapu pe ke hoko ʻo ola lelei ʻi hono fai iá. Ka, ʻoku totonu ke tau kumi maʻu pē mo faʻa lotu ki he tokoni mo e fakahinohino ʻa Sihová, ʻo tuipau te ne tokoniʻi kitautolu.
6 ʻOku tau tui mālohi ʻe vakai ʻa Sihova ki he ngāué ʻo aʻu ki hono ngataʻangá. (Fakafehoanaki mo Filipai 1:6.) Ko ʻetau falala kakato kiate ia ko hotau Tokoní ʻoku fakaivimālohiʻi ai kitautolu, koeʻuhí ke “ʻoua naʻa ta fiu ʻi he failelei.”—Kal. 6:9.