Puha Fehuʻi

◼ Ko e hā ʻoku totonu ai ke tau fai ha tokanga makehe ki hotau valá mo e teuteú ʻi he taimi ʻoku tau ʻaʻahi ai ki he ngaahi fale ʻo e Sōsaietí ʻi Brooklyn, Patterson, mo Wallkill, Niu ʻIoké, pea mo e ngaahi ʻōfisi vaʻa ʻi māmani lahí?

ʻOku ʻamanekina mei he kau Kalisitiané ke tauhi maʻu ha ʻulungaanga taau. ʻI he taimi kotoa pē, ko hotau valá mo e teuteú ʻoku totonu ke tapua mei ai ʻa e anga taau mo e molumalu ʻo taau mo e kau sevāniti ʻa Sihova ko e ʻOtuá. ʻOku moʻoni ʻeni tautefito ʻi he taimi ʻoku fai ai ha ʻaʻahi ki he ngaahi fale ʻo e Sōsaietí ʻi Niu ʻIoké, pea ki he ngaahi vaʻa takatakai ʻi he māmaní.

ʻI he lolotonga ʻo e 1998, ʻe fai ʻa e ngaahi fakataha-lahi fakavahe mo fakavahaʻapuleʻanga. ʻOku laui afe hotau ngaahi tokoua mei he ngaahi fonua lahi te nau ʻaʻahi ki he ʻuluʻi ʻapitanga ʻo e Sōsaietí ʻi Niu ʻIoké pea pehē ki he ngaahi vaʻa ʻi he ngaahi fonua kehé. ʻIkai ʻi he taimi pē ʻoku ʻaʻahi ai ki he ngaahi fale ko iá kae pehē foki ki he taimi kehé, ʻoku fiemaʻu kiate kitautolu ke ‘tau ʻai ke tau ongolelei ʻi he meʻa kotoa pe ko e kau sevaniti ʻa e ʻOtuá,’ kau atu ki ai hotau vala tāú mo e teuteú.​—2 Kol. 6:​3, 4.

ʻI he lāulea ki he mahuʻinga ʻo e vala tāú mo e teuteú, ʻoku fakamatala ʻa e Organized to Accomplish Our Ministry ki he fiemaʻu ke maʻa fakasino, vala taau, pea mo e teuteu lelei ʻi he taimi ʻoku tau kau ai ki he ngāue fakafaifekaú pea mo hono maʻu ʻa e ngaahi fakataha faka-Kalisitiané. Pea ʻi he peesi 131, palakalafi 2, ʻoku pehē ai: “ʻE ngāueʻaki tatau pē ʻi hono fai ha ʻaʻahi ki he ʻapi Pēteli ʻi Brooklyn pe ha taha pē ʻo e ngaahi ʻōfisi vaʻa ʻa e Sōsaietí. Manatuʻi, ko e hingoa Pētelí ʻoku ʻuhingá ko e ‘Fale ʻo e ʻOtuá,’ ko ia ko hotau valá, teuteú mo e ʻulungāngá ʻoku totonu ke tatau ia mo e meʻa ʻoku ʻamanekina meiate kitautolu ʻi he taimi ʻoku tau kau ai ki he ngaahi fakataha ki he lotú ʻi he Fale Fakatahaʻangá.” Ko e tuʻunga māʻolunga tatau ko ʻení ʻoku totonu ke tokanga ki ai ʻa e kau malanga ʻo e Puleʻangá mei he feituʻu fakalotofonuá pea pehē ki he faʻahinga mei he ngaahi feituʻu mamaʻo atú ʻa ia ʻoku nau haʻu ke mamata mo feohi mo e ngaahi mēmipa ʻo e fāmili Pētelí pea ke ʻaʻahi ki he ngaahi ʻōfisi vaʻá.

Ko hotau valá ʻoku totonu ke ʻi ai haʻane tākiekina pau ʻi he niʻihi kehé ki he founga ʻoku nau vakai mai ai ki he lotu moʻoni ʻa Sihová. Kae kehe, kuo fakatokangaʻi ʻi he taimi ʻoku fai ai ha ʻaʻahi ki he ngaahi fale ʻo e Sōsaietí, ko e ngaahi tokoua mo e tuofāfine ʻe niʻihi ʻoku nau hehema ke ʻai noaʻia ʻaupito honau valá. Ko e ngaahi vala peheé ʻoku ʻikai ke feʻunga ia ʻi he taimi ʻoku fai ai ha ʻaʻahi ki ha taha ʻo e ngaahi ʻapi Pētelí. ʻI he meʻa ko ʻení, hangē ko e ngaahi tafaʻaki kehe kotoa ʻi heʻetau moʻui faka-Kalisitiané, ʻoku tau holi ke tauhi maʻu ʻa e ngaahi tuʻunga māʻolunga tatau ko ia ʻokú ne fakafaikehekeheʻi ʻa e kakai ʻa e ʻOtuá mei he māmaní ʻaki ʻetau fai ʻa e ngaahi meʻa kotoa pē ke lāngilangi ai ʻa e ʻOtuá. (Loma 12:2; 1 Kol. 10:31) ʻOku lelei foki ke tau lea ki heʻetau kau ako Tohitapú mo e niʻihi kehe te nau ʻaʻahi nai ki Pēteli ʻi he ʻuluaki taimí pea fakamanatu kiate kinautolu ʻa e mahuʻinga ʻo hono fai ha tokanga ki he vala mo e teuteu ʻoku tāú.

Ko ia, ʻi hono fai ha ʻaʻahi ki he ngaahi fale ʻo e Sōsaietí, ʻeke hifo kiate koe: ‘ʻOku taau hoku valá mo e teuteú?’ (Fakafehoanaki mo Maika 6:8.) ‘ʻOku tapua lelei atu ai ʻa e ʻOtua ʻoku ou lotu ki aí? ʻE fakaleluʻi pe mamahi ʻa e niʻihi kehé ʻi hoku fōtungá? ʻOku ou fokotuʻu ha faʻifaʻitakiʻanga lelei ki he niʻihi kehe ʻoku nau ʻaʻahi nai ʻi he ʻuluaki taimí?’ ʻOfa ke hoko maʻu pē hotau valá mo e teuteú ke ‘teungaʻia ʻi he meʻa kotoa pe ʻa e tokateline ʻa hotau ʻOtua Fakamoʻuí.’​—Tai. 2:10.