Ko e Laumālie ʻo Sihová ʻOku ʻIate Kitautolu
1 ʻI he tuʻunga ko e Kau Fakamoʻoni ʻa Sihová, ʻoku tau maʻu ha ngāue lahi fakaʻulia kuo vaheʻi mai. Naʻe pehē ʻe Sīsū: “Kuo pau ke tomuʻa fanongonongo ʻa e ongoongolelei ki he ngaahi kakai kotoa pē.” (Mk. 13:10) ʻI he vakai atu mei he tuʻunga ʻo e faʻahinga ʻo e tangatá, ʻe hā ngalingali taʻemalava ʻeni, ka ʻoku ʻikai ke pehē. ʻOku tau maʻu ʻa e ivi mālohi lahi taha ʻi he ʻunivēsí ʻokú ne poupouʻi kitautolu—ko e laumālie ʻo e ʻOtuá.—Mt. 19:26.
2 Fakamoʻoni ʻi he ʻUluaki Senitulí: ʻI hono ngāueʻaki kiate ia ʻa e kikite ʻa ʻAiseá, naʻe pehē ʻe Sīsū: “Ko e Laumālie ʻo e ʻEiki ʻoku ʻiate au . . . ke u ʻalu mo e ongoongolelei.” (Luke 4:17, 18) Ki muʻa ke hāʻele hake ki hēvaní, naʻá ne tala ki heʻene kau ʻapositoló ʻe pehē pē ʻa hono fakaivimālohiʻi kinautolu ʻe he laumālie māʻoniʻoní ke faifakamoʻoni “ki he ngataʻanga ʻo māmani.” Ko ia ai, naʻe tataki ʻa Filipe ʻe he laumālie māʻoniʻoní ke malanga ki ha ʻōfisa fakaefakamaauʻanga ʻItiopea, naʻe ʻave ʻe he laumālié ʻa Pita ki ha senituliō Loma, pea naʻe fekau atu ai ʻa Paula mo Panepasa ke malanga ki he ngaahi fonua Senitailé. Ko hai ʻe fakakaukau atu ko e kakai ko ia mei he ngaahi ʻātakai peheé te nau tali ʻa e moʻoní? Ka naʻa nau tali ia.—Ng. 1:8; 8:29-38; 10:19, 20, 44-48; 13:2-4, 46-48.
3 Fakamoʻoni ʻi Onopooni: ʻOku fakamamafaʻi ʻe he tohi ʻa Fakahaá ʻa e kaunga ʻo e laumālie māʻoniʻoní ki he ngāue fakamalanga ʻi he ʻaho ní ʻaki ʻene pehē: “Ko e Laumalie mo e Taʻahine ʻoku na pehe, Haʻu. . . . Ko ia ʻoku ne loto ki ai, ke ne toʻo taʻetotongi ʻa e Vaiola.” (Fkh. 22:17) Kuo ueʻi ʻe he laumālié ʻa e kalasi fefine mali ʻa Kalaisí pea mo honau takanga ko e “fanga sipi kehe” ke malangaʻaki ʻa e ongoongo leleí ki he kakai kotoa pē. (Sione 10:16) ʻOku totonu ke tau loto-toʻa ʻi heʻetau malangá, ʻo ʻoua ʻe toumoua ke lea ki he kakai ʻo e faʻahinga kotoa pē, ʻo falala pau ʻe tokoniʻi kitautolu ʻe he laumālie ʻo e ʻOtuá. ʻOku tokonaki mai ʻe he 1998 Yearbook ʻa e fakamoʻoni tuipau ko e laumālie ʻo e ʻOtuá ʻoku hokohoko atu ʻa ʻene ʻi heʻene kau sevānití. Vakai atu ki he tali ki aí! ʻI he lolotonga ʻa e ongo taʻu fakangāue ʻe ua kuohilí, ko ha ʻavalisi naʻe laka hake ʻi he 1,000 naʻe papitaiso ʻi he ʻaho taki taha.
4 Fakapapauʻi ko e laumālie ʻo e ʻOtuá ʻe hokohoko atu ʻa ʻene ʻiate kitautolú ʻi heʻetau malangaʻaki ʻa e pōpoaki ʻo e Puleʻangá ki he lahi taha ʻo fakatatau ki he finangalo ʻo Sihová. ʻOku totonu ke fakalototoʻaʻi mo ueʻi kitautolu ʻe he ʻilo ko ʻení ke tau hanganaki feinga mālohi longomoʻui ʻi he ngāue mahuʻinga taha ʻo e Puleʻangá.—1 Tim. 4:10.