Hono ʻIkai Sai ke ʻI Ai Maʻu Pē!
1 ʻI he ngaahi hongofuluʻi taʻu ʻi ʻIulope Hahake, naʻe tapui ai ʻa e tokolahi ʻo siʻotau ngaahi tokouá mei he fakataha maʻá e kakaí. Fakaʻuta atu ki heʻenau fiefiá ʻi he taimi naʻe toʻo ai ʻa e fakataputapuí pea malava ke nau fakataha fakatahataha ʻi he tauʻatāiná!
2 ʻI he fekauʻaki mo ʻene ʻaʻahi ki ha fakatahaʻanga pehē ʻe taha, naʻe tohi ʻe ha ʻovasia fakafeituʻu: “ʻI he efiafi Tūsité, ʻi he kamataʻanga pē ʻo ʻeku ʻaʻahí, naʻe maumau ʻa e naunau hitá. ʻI tuʻá, naʻe ofi ʻa e ʻeá ʻi he ʻaisí, pea ʻi lotó, naʻe tikilī pē nai ʻe 5 Celsius. Naʻe tangutu pē ʻa e ngaahi tokouá ʻoku nau tui honau ngaahi koté, sikaafí, kofu nimá, tataá, mo e ngaahi putí. Naʻe ʻikai malava ʻe ha taha ke muimui ʻi he Tohitapú, koeʻuhi naʻe ʻikai malava ke huke ʻa e ngaahi pēsí. ʻI heʻeku tuʻu ʻi he peletifōmú mo hoku sutí, naʻá ku mokoʻīʻī, pea ʻi he taimi kotoa pē naʻá ku lea aí, naʻá ku lava pē ke sio ki heʻeku mānavá. Ka ko e meʻa naʻe maongo kiate aú naʻe ʻikai te u fanongo ki ha foʻi lea ʻe taha ʻo ha lāunga. Naʻe pehē ʻe he ngaahi tokouá kotoa hono ʻikai fakafiefia mo lelei ke ʻi ai!” Ko e ngaahi tokoua ko iá, naʻe ʻikai te nau teitei fakakaukau ke liʻaki ʻa e fakataha ko iá!
3 ʻOku Pehē ʻEtau Ongoʻí? ʻOku tau lotoʻaki ʻa e faingamālie ke fakatahataha tauʻatāina ʻi heʻetau ngaahi fakataha fakauiké? Pe ʻoku tau fakamaʻamaʻaʻi ʻa e ngaahi fakatahá ʻi he ngaahi tuʻunga ʻoku faingamālie angé? Ko hono maʻu maʻu pē ʻa e ngaahi fakatahá ʻoku ʻikai nai ke faingofua, pea ʻoku ʻi ai nai ʻa e ngaahi taimi ʻoku tau maʻu ai ha ʻuhinga totonu ki he ʻikai ke tau ʻi aí. Ka, ʻoua ʻaupito naʻa ngalo, ʻoku ʻi ai ʻa e faʻahinga ʻiate kitautolu, neongo ʻa e hoholo ke motuʻá, ko e ngaahi palopalema faingataʻa ʻo e moʻui leleí, ngaahi faingataʻaʻia fakaesino, ngaahi taimi ngāue lahi, pea mo e ngaahi fatongia mamafa kehe, ʻoku nau sio ki he mahuʻinga ʻo e ngaahi fakatahá pea ʻoku nau meimei maʻu maʻu pē ia. Ko ha ngaahi faʻifaʻitakiʻanga lelei ē kiate kitautolu ke muimui ai!—Fakafehoanaki mo Luke 2:37.
4 Tau ʻai ia ko e meʻa ke tau angaʻaki ke poupouʻi ʻa e lotu moʻoní ʻaki hono maʻu ʻa e kotoa ʻo ʻetau ngaahi fakataha faka-Kalisitiané, mei ha kulupu ako tohi siʻisiʻi ki ha fakataha-lahi lahi ange. Ko e hā ʻoku totonu ai ke tau mātuʻaki fakamātoato ʻi hono maʻu ʻa e ngaahi fakatahataha ko ʻení? Koeʻuhí ko ha fekau fakaʻotua ia ke tau fakatahataha fakataha. Ka ʻoku ʻi ai ʻa e ngaahi ʻuhinga mahuʻinga kehe. ʻOku fiemaʻu kiate kitautolu kotoa ʻa e ʻaonga ʻo e fakahinohino fakaʻotuá pea mo e tokoni ʻa e laumālie māʻoniʻoní, ʻa ia ʻoku maʻu ʻi he ngaahi fakatahá. (Mt. 18:20) ʻOku langa hake ai kitautolu ʻi he fefakalototoʻaʻaki ʻi he taimi ʻoku tau feohi ai mo hotau ngaahi tokouá.—Hep. 10:24, 25.
5 ʻI he fakakehé, naʻe pehē ʻe Pita, “ʻEī, ʻoku sai ʻetau ʻi heni.” (Luke 9:33) ʻOku totonu ke tau ongoʻi tatau fekauʻaki mo e kotoa ʻo ʻetau ngaahi fakataha faka-Kalisitiané. ʻOku moʻoni, hono ʻikai sai ke ʻi ai maʻu pē!