Ngāueleleiʻaki ʻa e Ngaahi Tohi Motuʻá
1 Kuo tauhi ʻe he tangatá ʻa e ngaahi tohi motuʻa ʻe laui miliona ʻi he ngaahi laipelí ʻi he tuliki kotoa pē ʻo e foʻi māmaní. Ka, ko e hā ʻa e ʻaonga tuʻuloa kuo nau fai maʻá e matakali ʻo e faʻahinga ʻo e tangatá? (Koh. 12:12) ʻOku mahuʻinga lahi ange ʻa e ngaahi tohi ia ʻokú ne fakahanga ʻa e tokangá ki he Puleʻanga ʻo e ʻOtuá pea ki he meʻa te ne fai maʻá e faʻahinga ʻo e tangatá. Ko e lahi taha ʻa e ngaahi fakatahaʻangá ʻoku nau maʻu ʻi he sitoká ha ngaahi tohi pehē kehekehe. ʻI he lolotonga ʻo Sanualí te tau tuʻuaki ai ki he kakaí ʻa e Fāʻūtaha ʻi he Lotu ki he ʻOtua Moʻoni Pē Taha pe ngaahi tohi motuʻa kehe ʻoku maʻu ʻe he fakatahaʻangá.
2 ʻOku ʻI Ai Honau Mahuʻinga Moʻoni: Lolotonga ʻoku ʻi ai ʻa e niʻihi ʻiate kitautolu ʻoku nau ongoʻi ko e ngaahi tohi ko ʻení kuo ʻosi hono taimí ʻi hono fakafehoanaki atu ki heʻetau ngaahi tohi foʻou angé, kuo pau ke tau manatuʻi ʻoku nau maʻu ʻa e moʻoni Fakatohitapu. Ko e pōpoaki ʻo e Puleʻangá ʻokú ne fakamatalaʻí ʻoku kei mahuʻinga ʻi he ʻahó ni, pea kapau ʻe fai ha tokanga ki ai, ʻe lava ke hoko ia ko ha fakahaofi moʻui. (Sione 17:3) Ko ia ai, ʻoku totonu ke tau fai ha feinga makehe ke ngāueleleiʻaki ʻa e ngaahi tohi motuʻa ko ʻení.
3 ʻI hono fakamamafaʻi ʻa honau mahuʻingá ko e meʻa ia naʻe hokosia ʻe ha fefine naʻá ne maʻu ha ngaahi tohi motuʻa lahi ʻa e Taua Leʻó mei heʻene kui fefiné. Naʻe ʻeke ange ʻe ha Fakamoʻoni ki he fefiné pe ʻoku ʻi ai haʻane fakakaukau ki he mahuʻinga moʻoni ʻo e ngaahi tohí. Naʻe tali ange ʻe he fefiné: “ʻOku ʻikai te u ʻilo honau mahuʻingá, ka ʻe lava fēfē ke u ʻiloʻi?” Naʻe tali ʻe he fefiné ha ako Tohitapu, peá ne haʻu ki he moʻoní, pea hili iá naʻá ne tuku tauhi ʻa e laipeli ʻa ʻene kui fefiné. He toki meʻa tukufakaholo mahuʻinga ē ko hono tānaki ʻa e ngaahi tohi motuʻá!
4 Ngāueʻaki Kinautolu: Tānaki atu ki hono tufa ʻa e ngaahi tohi motuʻá mei he fale ki he falé, fakapapauʻi ke tuʻuaki kinautolu ʻi hono fai ha toe ʻaʻahi ki he kakai ʻokú ke ʻilo ʻoku nau fiefia ke lau ʻetau ngaahi tohí, kau atu ki ai mo e faʻahinga ʻoku nau tukuhau ki he Taua Leʻo mo e Awake! pea mo kinautolu ʻi hoʻo tufaʻanga makasini paú. Ki he faʻahinga ʻokú ke ako mo kinautolu ʻa e Tohitapú, ko hono filifili ʻa e ngaahi tohi motuʻá ʻe lava ke tokonaki mai ai ha makatuʻunga ki he ʻilo ʻa ia ʻe fālahi ange ai ʻenau mahinoʻi ʻa e moʻoní. ʻOua ʻe ngalo ke maʻu ha faʻahinga tohi motuʻa pē ʻoku ʻikai ke ʻi hoʻo ngaahi tohi fakafoʻituituí. ʻI he founga ko ʻení, te ke fokotuʻutuʻu ai ha laipeli fakateokalati mahuʻinga, ʻa ia ʻe lava ke ngāueʻaki ke fakakoloaʻi ʻaki hoʻo vahaʻa taimi ako fakafoʻituituí.
5 ʻI he ʻikai ke tuku tauhi ʻetau ngaahi tohi motuʻá, ʻai ke tau ngāueleleiʻaki kinautolu ke fakaʻaiʻai ʻa e kakai ʻoku tau fetaulaki mo iá ke “manavahe ki he Otua, bea ke fai ki he ene gaahi fekau.”—Koh. [Tagata Malaga] 12:13, PM.