Fakamanatu ʻi Māmani Lahi ʻa e Pekia ʻa Kalaisí

¹ Kuo fakafonu kitautolu ʻe Sihova ʻaki ʻa e ngaahi meʻaʻofa lahi. Ko e ola fakalūkufua ʻo ʻene anga-leleí mo ʻene anga-ʻofá ʻoku fakamatalaʻi mahino ia ko “ʻene meʻaʻofa ko ia ʻoku taʻemalaua.” ʻIo, ko e “kelesi [“ʻofa maʻataʻatā,” NW] ʻa e ʻOtua” ʻoku mātuʻaki fakaofo he ka fakamatalaʻi ʻoku taumamaʻo ia mei heʻetau malavá.​—2 Kol. 9:​14, 15.

² Ko ʻEne Meʻaʻofa Lahi Tahá: Ko Sīsū Kalaisi, ʻi hono tuʻunga ko e Tokotaha-Huhuʻi ʻo e faʻahinga ʻo e tangatá, ʻa e meʻaʻofa lahi tahá. ʻI hono fakahaaʻi ʻene ʻofa lahi ki he māmani ʻo e faʻahinga ʻo e tangatá, naʻe foaki ʻe Sihova hono ʻAlo ʻofaʻanga mo fakatupu-pē-tahá. (Sione 3:16) Ko ha tāpuaki maʻataʻatā pehē mei he ʻOtuá ʻoku taau ke fakamanatu ʻi māmani lahi. ʻAfē pea ʻe anga-fēfē? ʻI he efiafi ʻo e Tuʻapulelulu, ʻEpeleli 1, 1999, ko e kau Kalisitiane takatakai ʻi he māmaní te nau fakamanatu ai ʻa e Kai Efiafi ʻa e ʻEikí, ʻo kātoangaʻi ai ʻa e Fakamanatu ʻo e feilaulau lahi tahá.​—1 Kol. 11:​20, 23-26.

³ Naʻe pekia ʻa Kalaisi maʻatautolu naʻa mo e “lolotonga ʻoku tau kei angahala,” pea ʻe lava ke tau fakahāhā ʻetau houngaʻia fakafoʻituituí ʻaki hono kātoangaʻi ʻa e Fakamanatu ʻo ʻene pekiá pea ʻaki hono fakaafeʻi ʻa e niʻihi kehé ke nau ʻi ai fakataha mo kitautolu ʻi he kātoanga mātuʻaki mahuʻinga ko iá.​—Loma 5:8.

⁴ Ko e Meʻa Mahuʻinga Lahi Tahá: Ko e kātoangaʻi ʻo e pekia ʻa Kalaisí ʻoku fakaeʻa tefito ai naʻá ne poupouʻi ʻa e tuʻunga-hau taʻemele ʻo e ʻOtuá. ʻOkú ne toe fakamanatu mai ai kiate kitautolu ʻoku lava ke tau fiefia ʻi ha tuʻunga maʻa ʻi he ʻao ʻo Sihová ʻaki hono ngāueʻi ʻa e tui ki he feilaulau ʻa Sīsuú, ʻo fakapapauʻi ai ʻa e fakamoʻuí. (Ng. 4:12) Ko e moʻoni, ko e meʻa mātuʻaki mahuʻinga taha ʻeni ʻo e taʻú!

⁵ Ko e ʻofa ki hotau ngaahi kaungāʻapí ʻoku fakahaaʻi ia ʻi heʻetau fakaafeʻi kinautolu ke kātoangaʻi fakataha mo kitautolu ʻa e Kai Efiafi ʻa e ʻEikí. Ko e ngaahi ʻaonga ʻo e huhuʻí ʻoku kei ʻatā ia ki he laui miliona ʻoku nau ʻilo ki heʻene mahuʻinga mamaʻo atú. (Fili. 3:8) Ko e faʻahinga ʻoku nau ngāueʻi ʻa e tui ki he feilaulau ʻa Kalaisí ʻe lava ke nau maʻu ʻa e ʻamanaki papau ʻo e moʻui taʻengatá.​—Sione 17:3.

⁶ Ko e faʻahitaʻu Fakamanatú ʻokú ne tokonaki mai ʻa e ngaahi faingamālie makehe kiate kitautolu ke fakahāhā ʻa e houngaʻia ki he ʻofa maʻataʻatā hulu atu ʻa e ʻOtuá. Ko e taimi lelei ʻaupito ʻeni ke kau faivelenga ai ki hono malangaʻi ʻa e ongoongo lelei ʻo e Puleʻanga ʻo e ʻOtuá. ʻOku fakatatali mai ʻa e ngaahi ʻaonga lahi ki he faʻahinga kotoa pē ʻoku nau fakakaukau faʻa lotu ki he meʻaʻofa taʻetotongi taʻealafakamatalaʻi ʻa Sihová pea fokotuʻutuʻu ke nau ʻi ai ʻi hono fakamanatu ʻi he taʻú ni ʻa e Kai Efiafi ʻa e ʻEikí!